ទូរសព្ទ 5G ម៉ាក Nokia ដំបូងលេចមុខជាផ្លូវការ (វីដេអូ)

2020-03-20 01:36:01
ចំនួនមតិ 0 | ចំនួនចែករំលែក 0

ចន្លោះមិនឃើញ

HMD បានប្រកាសចេញ Nokia 8.3 5G ដែលជាស្មាតហ្វូន 5G ម៉ាក Nokia ដំបូងរបស់ខ្លួន។ ក្រុមហ៊ុនបានចាត់ទុកស្មាតហ្វូនជាស្មាតហ្វូនសម្រាប់ពិឃាដពពួក Flagship ដោយអួតលើអេក្រង់ល្អ មានកាមេរ៉ា ៤គ្រាប់ និងការទ្រាំទ្រសេវា 5G។

ស្មាតហ្វូននេះបំពាក់អេក្រង់ទំហំ ៦,៨១ អ៊ីញ ជាប្រភេទ Puredisplay អាចបង្ហាញរូបភាពក្នុងកម្រិត FullHD+។ វាជាបន្ទះអេក្រង់ HDR ដែលទ្រាំទ្រនឹងមុខងារ Adaptive ដោយវាអាចកែសម្រួលពន្លឺអេក្រង់ ផ្អែកតាមបរិយាកាសជុំវិញ។ នៅលើអេក្រង់មានចោះរន្ធសម្រាប់បំពាក់កាមេរ៉ា Selfie ទំហំ ២៤MP ដែលជា Sensor របស់ ZEISS។

កាមេរ៉ាបួនគ្រាប់ខាងក្រោយក៏ជា Sensor ZEISS ដែលមានកាមេរ៉ាមេទំហំ ៦៤MP និងកាមេរ៉ា Ultra-Wide ទំហំ ១២MP បង្កើតឡើងដោយផ្ដោតលើការថតវីដេអូ និងការផលិតរូបនៅទីងងឹត។ ពីរគ្រាប់ទៀតគឺ Sensor វាស់ជម្រៅ និងកាមេរ៉ាប្រភេទ Macro សម្រាប់ការថតរូបកៀកនឹងវត្ថុ។

នៅផ្នែកខាងក្នុងគឺមានបំពាក់ឈីប Snapdragon 765G ជាមួយជម្រើស RAM ទំហំ ៦GB ឬ ៨GB មានបង្កប់ដោយ Modem 5G សម្រាប់ទ្រាំទ្រសេវា 5G។ វាដំណើរការដោយប្រព័ន្ធប្រតិបត្តិការ Android 10 ហើយដោយសារតែជាផ្នែកមួយនៃកម្មវិធី Android One ដូចនេះធានាថាទទួលបានការអាប់ដេត OS រយៈពេល ២ ឆ្នាំ និងការអាប់ដេតពង្រឹងសុវត្ថិភាពរយៈពេល ៣ ឆ្នាំជារៀងរាល់ខែ។ ទំហំផ្ទុកវិញគឺមានទំហំ ៦៤GB និង ១២៨GB និងមានរន្ធសម្រាប់ដោតមេមូរីកាតផងដែរ។

ស្មាតហ្វូននេះដំណើរការដោយថ្មទំហំ ៤៥០០ mAh ដែលអាចសាកក្នុងល្បឿន ១៨ វ៉ាត់។ វាមានជម្រើសពណ៌តែមួយគត់គឺ Polar Night ជាមួយតម្លៃលក់ចាប់ពី ៥៩៩ អឺរ៉ូ (ប្រមាណ ៦៤០ដុល្លារ) មានលក់ចាប់ពីអំឡុងត្រីមាសទី ៣៕

ប្រភព៖ GSMarena ប្រែសម្រួល៖ សុខហេង