ពិធីករ សុខ រ៉ាស៊ី ចែករំលែកបទពិសោធន៍ឈឺក្បាល ពេលទិញរថយន្តបន្តពីជនជាតិបរទេស ប្រិយមិត្តគួរដឹង

2020-04-22 03:00:27
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក សុខ រ៉ាស៊ី ពិធីករទូរទស្សន៍ ថ្មីៗនេះ លោកបានជួបរឿងឈឺក្បាលមួយកើតចេញពីការទិញរថយន្តបន្តពីជនជាតិបរទេស ហើយមិនទាន់បានកាត់ឈ្មោះ។

លោក រ៉ាស៊ី បានបញ្ចេញពីករណីនេះ នៅលើហ្វេសប៊ុករបស់ខ្លួន ដោយលោកចង់ទុកវាជាបទពិសោធន៍សម្រាប់បងប្អូនប្រជាពលរដ្ឋផ្សេងទៀត ដែលមានតម្រូវការប្រើប្រាស់រថយន្ត គួរប្រយ័ត្ន ចៀសវាងមានបញ្ហាដូចជារូបលោក។ ពិធីករទូរទស្សន៍បានឲ្យដឹងថា កាលពីប៉ុន្មានខែមុនលោក បានទិញរថយន្តមួយគ្រឿងម៉ាក មែសឺដេស ក្នុងតម្លៃមួយដែលលោកមិនបានបញ្ចេញឲ្យដឹង។

រថយន្តនោះ លោកបានទិញបន្តពីជនបរទេសមួយរូប ដែលមិនទាន់បានផ្ទេរកម្មសិទ្ធិនៅឡើយ ហើយដោយសារតែបែបនេះហើយ ទើបលោកបានជួបរឿងឈឺក្បាលនៅពេលនេះ។ "សូមប្រយ័ត្ន អ្នកដែល ទិញរថយន្តពីជនបរទេស មិនទាន់ ផ្ទេរកម្មសិទ្ធិ សូមប្រយ័ត្នជួប បញ្ហាដូចខ្ញុំ"។

រូបតំណាង

បញ្ហាដែលលោក រ៉ាស៊ី ចង់ចែករំលែកដល់ប្រិយមិត្តអ្នកគាំទ្រ ក៏ដូចជាបងប្អូនប្រជាពលរដ្ឋទាំងអស់នោះ គឺថា រយៈពេលជាង ៣ខែមកហើយ លោកនៅមិនទាន់អាចធ្វើការផ្ទេរកម្មសិទ្ធិលើចលនទ្រព្យមួយនេះបាននៅឡើយ។ មូលហេតុ បុរសជនជាតិបរទេសជាម្ចាស់រថយន្តមុននោះ មិនទាន់បានចូលខ្លួនមកធ្វើឯកសារផ្ទេរសិទ្ធិឲ្យលោកដែលជាម្ចាស់ទ្រព្យក្រោយនៅឡើយ។

តាមលោក រ៉ាស៊ី បុរសជនជាតិបរទេសដែលមិនដឹងថាមានឈ្មោះអ្វីនោះ បច្ចុប្បន្នបាន និងកំពុងរស់នៅខេត្តព្រះសីហនុ។ ប៉ុន្តែម្ចាស់ដើមរថយន្តរូបនេះ បានខកខានចូលខ្លួនមកធ្វើឯកសារផ្លូវច្បាប់លើទ្រព្យដែលបានដោះដូរនេះម្ដងជាពីរដង។ "គាត់នៅ ក្រុងព្រះសីហនុ គាត់បានឆ្លងឆ្លើយ ជាមួយខ្ញុំថា ថ្ងៃនេះ ថ្ងៃនោះ ឥលូវជិត 3ខែ ទើបគាត់ប្រាប់ថា ចង់អោយគាត់ទៅ(មកជួយផ្ដិតមេដៃលើលិខិតផ្ទេរសិទ្ធិ) លុះត្រាយើងចំណាយលុយ ខ្លួនឯង"។

តាមប្អូនប្រុសលោក អៀង ចេនឡា ម្ចាស់ដើមរថយន្ត បានតម្រូវឲ្យលោកជួយចេញការចំណាយលើសំបុត្រយន្តហោះ សម្រាប់ការធ្វើដំណើររបស់គេ ទើបគេព្រមមក។ ដូច្នេះហើយ មកត្រឹមថ្ងៃទី ២២ មេសា នេះ លោកមិនទាន់អាចដំណើរការផ្ទេរសិទ្ធិលើទ្រព្យរបស់លោកបាននៅឡើយ ដោយលោករង់ចាំអស់រយៈពេល3ខែកន្លងមកហើយ។

"ការផ្ទេរកម្មសិទ្ធិរថយន្តពី ជនបរទេស បើគ្មានសាមីខ្លួន ជាជនបរទេស មកផ្ដិតមេដៃទេ មិនអាចផ្ទេរសិទ្ធ បានទេ! សូមអ្នកដែលយល់ដំណោះស្រាយ រឿងនេះ ជួយ ផ្តល់យោបល់ផង!”។ លោក សុខ រ៉ាស៊ី បញ្ជាក់បន្ថែម៕

អត្ថបទ៖ ទារិកា