អ្នកប្រើ Zoom ប្រចាំថ្ងៃកើនដល់ ៣០០លាននាក់ ទោះផ្ទុះរឿងអាស្រូវច្រើន
- 2020-04-23 03:17:43
- ចំនួនមតិ 0 | ចំនួនចែករំលែក 0
អ្នកប្រើ Zoom ប្រចាំថ្ងៃកើនដល់ ៣០០លាននាក់ ទោះផ្ទុះរឿងអាស្រូវច្រើន
ចន្លោះមិនឃើញ
នៅថ្ងៃទី ២១ ខែមេសា អ្នកប្រើប្រាស់កម្មវិធីប្រជុំតាមអនឡាញ Zoom មានចំនួនជាង ៣០០លាននាក់ ដែលកើនឡើង ៥០% ធៀបនឹងចំនួនអ្នកប្រើប្រចាំថ្ងៃដែលមាន ២០០លាននាក់ កាលពីដើមខែ។ នេះជាការលើកឡើងរបស់លោក Eric Yuan នាយកប្រតិបត្តិក្រុមហ៊ុន Zoom។
ដោយសារវិធានការគម្លាតសុវត្ថិភាព និងការតម្រូវឲ្យមនុស្សរាល់គ្នានៅផ្ទះតាមតែអាចធ្វើទៅបាន នាំឲ្យគេងាកទៅប្រើប្រាស់កម្មវិធីប្រជុំតាមអនឡាញ ដើម្បីអាចបន្តធ្វើកិច្ចការជាក្រុម និងភ្ជាប់ទំនាក់ទំនងជាមួយមិត្តភ័ក្ដិក៏ដូចជាក្រុមគ្រួសារបាន។ Zoom បានក្លាយជាកម្មវិធីពេញនិយមបំផុតមួយ ដោយអាចស្ថិតនៅតំណែងកំពូលទាំងនៅលើ Apple App Store និង Google Play Store នៅចុងខែមីនា។
ប្រជាប្រិយភាពដែលផ្ទុះឡើងខ្លាំង ក៏នាំឲ្យ Zoom ជួបរឿងក្រពុលមុខជាច្រើនផងដែរ ជាពិសេសគឺទាក់ទងនឹងសុវត្ថិភាពនៃភាពជាឯកជនរបស់អ្នកប្រើប្រាស់ ដោយជនដែលមានបំណងមិនល្អអាចចូលរំខានការប្រជុំណាមួយបានយ៉ាងងាយ ហើយអាចលួចយកព័ត៌មានឯកជនរបស់អ្នកប្រើប្រាស់ផដែរ។ កាលពីថ្ងៃពុធ Zoom បានប្រកាសចេញ Version ថ្មីនៃកម្មវិធី Zoom ដែលមានបន្ថែមមុខងារមួយចំនួនអាចជួយដោះស្រាយបញ្ហាទាំងនេះ៕