រឿងរ៉ាវពីក្រោយប្អូនស្រី គីម ជុងអ៊ុន អាចសក្ដិសមជាមេដឹកនាំស្រីទី១នៃកូរ៉េខាងជើង

2020-04-28 06:05:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្អូនស្រីបង្កើតរបស់មេដឹកនាំកូរ៉េខាងជើង លោក គីម ជុងអ៊ុន គឺអ្នកស្រី គីម យ៉ូជុង កើតនៅថ្ងៃទី ២៦ កញ្ញា ឆ្នាំ ១៩៨៧ ដែលនាងបានរៀបការជាមួយលោក ឆូ ស៊ុង កូនប្រុសនៃអនុសេនីយ៍ទោលលោក ឆូ រីយ៉ុងហេ។

ការអប់រំ

នៅឆ្នាំ ១៩៩៦ គីម យ៉ូជុង ត្រូវបានបញ្ជូនទៅរៀននៅប្រទេសស្វីស ហើយបានសិក្សាសាលារដ្ឋមួយឈ្មោះថា Liebefeld Hessgut ហើយក្រោយមកបងប្រុសរបស់នាង លោក គីម ជុងអ៊ុន ក៏បានមកសិក្សានៅប្រទេសនេះដែរ ប៉ុន្តែសាលាផ្សេងគ្នា។ អ្នកទាំងពីរត្រូវបន្លំខ្លួនសិក្សានៅប្រទេសគេ និងរស់នៅជាមួយមីង និងពូ ដោយមានអ្នកបម្រើ និងអ្នកយាមគ្រប់ពេលវេលា។

យ៉ាងណាមិញ គេមិនដឹងច្បាស់ពីសកម្មភាពរបស់ប្អូនស្រីតែមួយ លោក គីម ជុងអ៊ុន នៅពេលត្រឡប់មកកូរ៉េខាងជើងនៅអំឡុងឆ្នាំ២០០០ និង២០០១ឡើយ។ រហូតដល់ឆ្នាំ ២០០៧ នាងត្រូវបានគេដឹងថា បានបញ្ចប់ការសិក្សានៅសាកលវិទ្យាល័យ គីម អ៊ីលស៊ុង ទីក្រុងព្យុងយ៉ាង ផ្នែកវិទ្យាសាស្ត្រកុំព្យូទ័រ។

មនុស្សជំនួយការជំនិតនៃមេដឹកនាំកូរ៉េខាងជើង

គីម យ៉ូជុងបានចូលរួមកិច្ចការការងារបក្សពលករកូរ៉េ (Workers' Party of Korea) នៅឆ្នាំ២០០៧ ដែលធ្វើជាលេខាផ្ទាល់របស់ឪពុកគឺលោកគីម ជុងអ៊ីល រហូតដល់លោកទទួលមរណភាពនៅឆ្នាំ២០១១។ ប្អូនស្រី គីម ជុងអ៊ុន បានបន្តធ្វើការងារបក្ស និងមានប្រជាប្រិយភាពមិនចាញ់បងប្រុសខ្លួនប៉ុន្មានឡើយ។ នាងបានក្ដោបដំណែងជាអគ្គនាយិកានៃអគ្គនាយកដ្ឋានឃោសនា និងការពារការកេងប្រវ័ញ្ច និងក្រោយមកក្លាយជាសមាជិកតំណាងនៃបក្ស។

រំលឹកកាលពីចូលរួមការងារបក្សដំបូងនៅឆ្នាំ ២០០៧ គីម យ៉ូជុង ធ្លាប់មានស្នាដៃជោគជ័យលើគម្រោងជាច្រើន រហូតដល់ត្រូវបានដំឡើងឋានៈជាលេខារបស់ឪពុក។ នាង ត្រូវបានរៀបចំឲ្យធ្វើជាអ្នកដឹកនាំក្រុមនារីប្រចាំប្រទេស ជំនួសដោយមីងរបស់ខ្លួននៅចុងឆ្នាំ ២០១៣។

ក្រោមការបញ្ជារបស់បងប្រុស នាងត្រូវបានចាត់ធ្វើជាអគ្គនាយិកាសកម្មនៃគណៈកម្មការការពារជាតិ នៅមុនពេលឡើងជាអគ្គនាយិកានៃអគ្គនាយកដ្ឋានឃោសនា និងការពារការកេងប្រវ័ញ្ច នៅចុងឆ្នាំ ២០១៤។

នាងត្រូវបានគេកត់សម្គាល់ថា ជាជំនួយការផ្ទាល់ដែលដើរតាមបងប្រុសខ្លួនយ៉ាងជិតស្និទ្ធ រហូតបានរៀបចំឲ្យមានជំនួបធំរវាងប្រធានាធិបតីសហរដ្ឋអាមេរិក លោក ដូណាល់ ត្រាំ និងកូរ៉េខាងជើងនៅឆ្នាំ ២០១៨ នារដូវកាលកីឡាអូឡាំពិក។

ការទម្លាក់ឋានៈនៅឆ្នាំ២០១៩

ប៉ុន្តែក្រោយនៅឆ្នាំ២០១៩ លោកស្រី គីម យ៉ូជុង ត្រូវបានទម្លាក់ឋានៈ បន្ទាប់ពីរៀបចំកិច្ចចរចាសម្រាប់ជំនួបលើកទី២ រវាង ប្រធានាធិបតីអាមេរិក លោក ដូណាល់ត្រាំ និងមេដឹកនាំកូរ៉េខាងជើង លោក គីម ជុងអ៊ុន កាលពីចុងខែកុម្ភៈ នៅក្រុងហាណូយ ប្រទេសវៀតណាម មិនទទួលបានផ្លែផ្កា។ ប្អូនស្រីមេដឹកនាំខាងលើ បានបង្ហាញខ្លួនជាសាធារណៈឡើងវិញ នៅក្នុងរយៈពេល ៥២ថ្ងៃ ក្រោយស្ថានការណ៍ ដើម្បីបន្សាបនូវពាក្យចចាមអារ៉ាមដែលថា អ្នកស្រីត្រូវរងការពិន័យដាក់ទោសដោយសារការបរាជ័យជុំវិញជំនួបកំពូលកន្លងមក។

ប្អូនស្រីបង្កើត គីម ជុងអ៊ុន អាចនឹងក្លាយជាមេដឹកនាំស្រីទី១នៃកូរ៉េខាងជើងដែរឬទេ?

ស្របពេលថ្មីៗក្នុងខែមេសា ២០២០ សារព័ត៌មានអន្តរជាតិ CNN បានចុះផ្សាយពីបញ្ហាសុខភាពធ្ងន់ធ្ងររបស់មេដឹកនាំកូរ៉េខាងជើងលោកគីម ជុងអ៊ុន រហូតដល់ស្លាប់ ហើយគេងាកមកចាប់អារម្មណ៍លើអ្នកស្នងតំណែងថ្មី នឹងបានទៅលើប្អូនស្រីបង្កើតវ័យ ៣៣ឆ្នាំជាមិនខាន ក្រោមមូលហេតុអ្នកដឹកនាំប្រទេស ត្រូវតែជាសាច់ឈាមត្រកូល" គីម" ខណៈដែលបងប្រុសធំម្នាក់ទៀត លោក គីម ជុងណាម ត្រូវបានគេធ្វើឃាតកាលពីឆ្នាំ ២០១៧ នៅប្រទេសម៉ាឡេស៊ី។ យ៉ាងណាមិញ ចំពោះការឡើងបន្តរបស់អ្នកស្រី នៅមិនទាន់មានការបញ្ជាក់បែបណាឡើយ៕

ប្រភព៖ Biography ប្រែសម្រួល៖ ស៊ិន សាវ៉េត