ក្រុមហ៊ុនណាខ្លះ កំពុងនាំមុខលើទីផ្សារស្មាតហ្វូន 5G?

2020-04-29 04:03:20
ចំនួនមតិ 0 | ចំនួនចែករំលែក 0

ចន្លោះមិនឃើញ

តម្រូវការស្មាតហ្វូន 5G មានការកើនឡើងគួរឲ្យកត់សម្គាល់នៅត្រីមាសទី ១ ឆ្នាំ ២០២០ បើប្រៀបធៀបនឹងពេលដូចគ្នាកាលពីឆ្នាំ ២០១៩ ហើយ Samsung គឺជាអ្នកនាំមុខគេក្នុងការលក់ស្មាតហ្វូន 5G។ នេះបើតាមរបាយការណ៍របស់ Strategy Analytics។

នៅត្រីមាសទី ១ នេះ មានស្មាតហ្វូន 5G ចំនួន ២៤,១ លានគ្រឿង បានលក់ចេញលើទីផ្សារ ហើយក្នុងនោះ Samsung លក់ចេញបាន ៨,៣ លានគ្រឿង ដែលម៉ូដែលពេញនិយមមាន Galaxy S20 5G និង S20 Ultra 5G។ Huawei តាមពីក្រោយយ៉ាងប្រកៀកប្រកិតដែលអាចលក់បាន ៨ លានគ្រឿង។

ចំណុចខុសគ្នារវាង Samsung និង Huawei គឺត្រង់ថា Huawei បញ្ចេញលក់ស្មាតហ្វូន 5G លើទីផ្សារជាច្រើនរួមមានអាមេរិក កូរ៉េខាងត្បូង និងតំបន់ខ្លះៗនៅអឺរ៉ុប។ ចំណែក Huawei វិញសប្បាយចិត្តនឹងតម្រូវការខ្ពស់នៅប្រទេសចិន ទោះបីមានផ្ទុះជំងឺកូវីដ១៩ក្ដី។ ចំណាត់ថ្នាក់លេខ ៣ គឺបានទៅលើ vivo ដែលលក់បាន ២,៩ លានគ្រឿង។

បច្ចុប្បន្ននេះប្រទេសចិនជាអ្នកនាំមុខគេសម្រាប់តម្រូវការស្មាតហ្វូន 5G ហើយទីផ្សារដូចជាអឺរ៉ុប អាមេរិក និងកូរ៉េខាងត្បូង ប្រហែលជាមិនអាចដណ្ដើមតំណែងពីចិនបាននោះទេនៅត្រីមាសបន្តបន្ទាប់។ ហេតុនេះគេនៅរង់ចាំមើលថា Samsung អាចបន្តកាន់កាប់តំណែងកំពូលនៅត្រីមាសបន្ទាប់បានឬយ៉ាងណា៕

ប្រភព៖ Sammobile ប្រែសម្រួល៖ សុខហេង