Podolski ៖ Ozil នៅតែអស្ចារ្យ ខណៈ Arteta ល្អជាង Emery
- 2020-05-19 09:33:12
- ចំនួនមតិ 0 | ចំនួនចែករំលែក 0
Podolski ៖ Ozil នៅតែអស្ចារ្យ ខណៈ Arteta ល្អជាង Emery
ចន្លោះមិនឃើញ
កីឡាករ Mesut Ozil នៅតែជាកីឡាករអស្ចារ្យម្នាក់ ចំណែក Mikel Arteta ស័ក្ដិសមជាង Unai Emery ក្នុងនាមជាគ្រូបង្គោល Arsenal ដឹកនាំខ្សែប្រយុទ្ធសញ្ជាតិអាល្លឺម៉ង់។ នេះជាការលើកឡើងរបស់ Lukas Podolski អតីតខ្សែប្រយុទ្ធរបស់ក្រុមកាំភ្លើងធំ។
Podolski ប្រាប់ Sky Sport អំពីកីឡាករជួយឱ្យអាល្លឺម៉ង់ឈ្នះ World Cup ឆ្នាំ២០១៤ រូបនេះថា ៖"គ្មានអីនិយាយច្រើនទេ គាត់ជាកីឡាករអស្ចារ្យម្នាក់។ ពេលខ្លះមានបញ្ហាជាមួយគ្រូបង្វឹក ឬមានបញ្ហារបួស។ រឿងដែលតែងកើតឡើងនៅក្នុងបាល់ទាត់ ហើយពេលខ្លះអ្នកត្រូវដោះស្រាយចំពោះស្ថានការណ៍នេះ"។
Podolski ដែលលេងឱ្យ Arsenal បាន ៦០ប្រកួត អំឡុងឆ្នាំ ២០១២-២០១៥ យល់ឃើញថា Ozil និងArteta ហាក់ល្អជាមុន ព្រោះពួកគេធ្លាប់លេងជាមួយគ្នា និងយល់ចិត្តគ្នា។ Ozil បានត្រឡប់មកទីលានវិញ ហើយលេងល្អជាងមុន ខុសកាលពីអតីតគ្រូបង្គោល Unai Emery នៅដឹកនាំ។
កីឡាករក្លឹបទួរគី Antalyaspor បញ្ជាក់បែបនេះ ៖"ពេលខ្លះអ្នកមានគ្រូ ហើយអ្នកមិនអាចដោះស្រាយជាមួយគាត់បាន។ គាត់ (គ្រូ) មានការយល់ឃើញលើបាល់ទាត់ខុសគ្នា។ Arteta ត្រឡប់មក Arsenal វិញ អ្នកឃើញទេ ក្រុមមានការរៀបចំ ប្រឹងប្រែង និងមានវិន័យច្រើនជាងមុន។ ខ្ញុំសង្ឃឹមថា ពួកគេអាចបង្កើតបានក្រុមល្អមួយ សម្រាប់ពីរឆ្នាំខាងមុខទៀត។ ពួកគេអាចធ្វើបាន តែត្រូវធ្វើជាមួយគ្នា"។
រដូវកាលនេះ Arsenal ហាក់កាន់តែយ៉ាប់ខ្លាំង ដោយឈរនៅលេខរៀងទី៩ក្នុងតារាង Premier League ប៉ុន្តែកីឡាករសញ្ជាតិអាល្លឺម៉ង់យល់ឃើញថា ការប្រជែងនៅលីគកំពូលអង់គ្លេស មិនងាយស្រួលឡើយ បើទោះប្រកួតជាមួយក្រុមតូចៗក្ដី មិនដូចលីគប្រទេសផ្សេង មានតែ២បីក្រុមខ្លាំងៗប៉ុណ្ណោះ ដណ្ដើមគ្នាលើកពាន៕