ស៊ុំ វណ្ណា៖ បើគេស្រែកឃ្លានការឈ្នះ យើងក៏ស្រែកឃ្លានការឈ្នះដូចគ្នា

2020-07-03 09:13:36
ចំនួនមតិ 0 | ចំនួនចែករំលែក 0

ចន្លោះមិនឃើញ

"បើគេស្រែកឃ្លានការឈ្នះ យើងក៏ស្រែកការឈ្នះដូចគ្នា ក្នុងដីរបស់យើង យើងនឹងធ្វើឱ្យបានល្អ"។ ជាការលើកឡើងរបស់លោក ស៊ុំ វណ្ណា គ្រូបង្គោលក្លឹបភ្នំពេញក្រោន នារសៀលថ្ងៃសុក្រទី៣ ខែកក្ដដា ឆ្នាំ២០២០ ក្នុងសន្និសីទសារព័ត៌លើបណ្ដាញសង្គម YouTube ផ្លូវការក្លឹបភ្នំពេញក្រោន។

ការលើកឡើងខាងលើធ្វើឡើង គឺឆ្លើយតបទៅនឹងសំណួរ ថាតើលោក ស៊ុំ វណ្ណា យល់យ៉ាងណាចំពោះក្លឹបបាល់ទាត់វិសាខា ដែលនឹងត្រូវជួបភ្នំពេញក្រោន នាថ្ងៃអាទិត្យខាងមុខ។

អតីតគ្រូក្រុមស៊ីម៉ាក់ បានបញ្ជាក់បន្ថែមថា បើប្រៀបធៀបរវាងក្រុមភ្នំពេញក្រោននិងវិសាខា អំពីគុណភាពកីឡាករ ធន់ធានមនុស្ស រចនាសម្ព័ន្ធ និងការរៀបផ្សេងៗគឺប្រហាក់ប្រហែលគ្នា។ យ៉ាងណាលោក និងកូនក្រុម បានត្រៀមខ្លួនរួចរាល់ហើយ ទាំងកម្លាំងកាយចិត្តស្មារតី និងប្ដេជ្ញាធ្វើឱ្យបានល្អបំផុត សម្រាប់ការប្រកួតមួយនេះ ដើម្បីរក្សាស្ថានភាពល្អមួយ ឬបន្តរក្សាតំណែងលេខមួយ នៅតារាងពិន្ទុលីគកំពូលកម្ពុជា MCL ឆ្នាំ២០២០។

លោកគ្រូ ស៊ុំ វណ្ណា ពន្យល់ ៖"សម្រាប់ការប្រកួត លេងក្នុងដីរបស់យើង ទោះជាក្រុមរបៀបពីណា ស្ថានភាពណាក៏ដោយ គឺយើងត្រូវតែធ្វើឱ្យបានល្អ ដើម្បីរំកិលខ្លួន រក្សាខ្លួនក្នងស្ថានភាពល្អមួយ"។

មកដល់ដំណាក់កាលនេះ អតីតគ្រូបង្គោលក្លឹបវេស្ទឺនភ្នំពេញ បានចាត់ទុកក្រុមទាំង១៣នៅលីគកំពូលកម្ពុជា ជាក្រុមខ្លាំងទាំងអស់ មិនថាក្រុមធំឬតូចឡើយ។

សម្រាប់បញ្ហាកីឡាកររបួសវិញ គ្រូបង្គោលដដែលបានបង្ហើបថា មានតិចតូចប៉ុណ្ណោះ ខណៈកីឡាករមួយចំនួនធំ បានត្រៀមខ្លួនហើយ ដើម្បីប្រយុទ្ធយកជ័យជម្នះ។

គួរបញ្ជាក់ថា ឆ្លងកាត់៥ប្រកួតកន្លងមក ម្ចាស់ពានរង្វាន់លីគកំពូល ៦សម័យកាលភ្នំពេញក្រោន មិនទាន់ស្គាល់ពាក្យចាញ់ទេ មាស១៣ពិន្ទុុឈរលេខ១បណ្ដោះអាសន្ន តាមពីក្រោយដោយ ព្រះខ័នរាជស្វាយរៀង៕

អត្ថបទ៖ អ៊ុំ សុភក្តិ