Apple ចាប់ផ្ដើមសួរអ្នកប្រើ iPhone អំពីឆ្នាំងសាកដែលមានក្នុងប្រអប់
- 2020-07-06 02:41:06
- ចំនួនមតិ 0 | ចំនួនចែករំលែក 0
Apple ចាប់ផ្ដើមសួរអ្នកប្រើ iPhone អំពីឆ្នាំងសាកដែលមានក្នុងប្រអប់
ចន្លោះមិនឃើញ
Apple បានចាប់ផ្ដើមបញ្ចេញការស្ទង់មតិទៅកាន់អ្នកប្រើប្រាស់ iPhone អំពីការប្រើប្រាស់ដុំសាក iPhone ដែលមានបញ្ចូលក្នុងប្រអប់។ ការស្ទង់មតិគឺមុនការប្រកាសចេញ iPhone 12 នាចុងឆ្នាំ ដែលលេចឮថា Apple អាចនឹងដកដុំសាក និងកាសស្ដាប់ចេញពីប្រអប់ជាលើកដំបូង។
ការស្ទង់មតិរបស់ Apple មានសួរអ្នកប្រើប្រាស់ ថាពួកគេធ្វើបែបណាចំពោះដុំសាក iPhone ចាស់ ក្រោយពីប្ដូរស៊េរី iPhone ថ្មី។ Apple បានផ្ដល់ជម្រើសចំនួន ៦ ឲ្យអ្នកប្រើប្រាស់ជ្រើសរើស ដែលមានដូចខាងក្រោម ៖
ខ្ញុំបានលក់ដុំសាក ទៅជាមួយ iPhone របស់ខ្ញុំ
ខ្ញុំបាត់ដុំសាក
ខ្ញុំឲ្យទៅសមាជិកគ្រួសារ ឬមិត្តភ័ក្ដិ
ខ្ញុំនៅប្រើប្រាស់វានៅផ្ទះ
ខ្ញុំនៅប្រើប្រាស់វានៅក្រៅ (កន្លែងធ្វើការ, សាលារៀន ឬកន្លែងដទៃទៀត)
ខ្ញុំនៅមានវា ប៉ុន្តែមិនប្រើទេ
គួរដឹងថាពីមុនមក Apple ធ្លាប់សួរអ្នកប្រើប្រាស់ទាក់ទងនឹងផលិតផលរបស់ខ្លួនដែរ។ ក្រុមហ៊ុនធ្លាប់បានផ្ញើការស្ទង់មតិអំពីការមានរន្ធដោតកាសលើ MacBook Pro ប៉ុន្តែកុំព្យូទ័រនេះនៅតែមានរន្ធដោតកាសនៅឡើយ។ ប៉ុន្តែលើកនេះគេចាប់អារម្មណ៍ត្រង់ថា Apple បានសួរអ្នកប្រើអំពីដុំសាក ក្រោយពីមានដំណឹងចេញផ្សាយជាហែហូរទាក់ទងនឹងការដកដុំសាកចេញពីប្រអប់ iPhone ជំនាន់ថ្មី៕