នឹកឃើញទៀតហើយ! ឆាយ វីរៈយុទ្ធ ប្រើវិធីដុសខាត់សំនៀងជឿនលឿនដូចតារាចម្រៀងនៅបទេសដែរ

2020-07-09 08:24:29
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងលំដាប់កំពូលរបស់ផលិតកម្មសាន់ដេ លោក ឆាយ វីរៈយុទ្ធ នឹងបើកស្ទូឌីយោផ្ទាល់ខ្លួនតូចល្មមមួយនៅក្នុងផ្ទះ ដើម្បីហាត់សមច្រៀងខ្លួនឯងផង និងថតចម្រៀងចាស់ៗលោកឡើងវិញផង។

ស្ទូឌីយោផ្ទាល់ខ្លួនរបស់លោក ឆាយ វីរៈយុទ្ធ នេះ ត្រូវចំណាយប្រាក់ក្នុងរង្វង់៣០០០ ទៅ៥០០០ដុល្លារ ហើយសម្ភារៈដំឡើងក្នុងស្ទូឌីយោបានកុម្ម៉ង់ពីក្រៅប្រទេសរួចហើយ ប៉ុន្តែដោយសារបញ្ហាជំងឺកូវីដ-១៩ ធ្វើឲ្យរាំងស្ទះដល់ការនាំសម្ភារៈទាំងនោះចូល។ វីរៈយុទ្ធ ជឿថា យ៉ាងយូរបីខែទៀត សម្ភារៈនឹងមកដល់កម្ពុជា ហើយលោកអាចនឹងរៀបចំរួចរាល់ដើម្បីដំណើរការបានទាំងស្រុងនៅចុងឆ្នាំ២០២០ ខាងមុខនេះ។

រូបភាព៖ហ្វេសបុក ឆាយ វីរៈយុទ្ធ

ឆាយ វីរៈយុទ្ធ៖"ខ្ញុំឃើញអ្នកចម្រៀងនៅស្រុកគេ មានស្ទូឌីយោផ្ទាល់ខ្លួន អីចឹងហើយបានខ្ញុំចង់មានដែរ ដើម្បីជួយសម្រួលដល់ការហាត់សមសំឡេងខ្ញុំផង និងថតបទចាស់ៗរបស់ខ្ញុំដែលគេ(អ្នកគាំទ្រ)ចង់ឲ្យខ្ញុំថតឡើងវិញ"។

តារាចម្រៀងរូបសង្ហាឆាយ វីរៈយុទ្ធ ឲ្យដឹងថា ដោយអ្នកគាំទ្រច្រើនពេក បានសុំអោយលោកច្រៀងចម្រៀងចាស់ៗរបស់លោកឡើងវិញ ទើបលោកត្រូវច្រៀងចម្រៀងមួយបទមុនគេទាំងដែលមិនទាន់មានស្ទូឌីយោខ្លួនឯងផងនោះ។ បទនោះ គឺមានចំណងជើងថា "អ្នកណាឲ្យអូនឃ្លាត" ដែលជាបទទទួលបានការគាំទ្រច្រើនកាលពី៥ឆ្នាំមុន ហើយវាក៏ជាបទដែលលោកស្រឡាញ់ជាងគេដែរ៕

អត្ថបទ៖ ជិន សុភ័ក្ដ្រ