តារា​មួយ​ចំនួន​តែង​មាន​ក្ដី​ស្រមៃ​ពីតូច​ចង់​ក្លាយ​ជា​បុគ្គល​ល្បី​ឈ្មោះ​ រហូតពួកគេ​ខិត​ខំ​ទាល់​តែ​បាន​សម្រេច។ ប៉ុន្តែ​មិន​មែន​ទាំង​អស់​នោះទេ ព្រោះ​ថា​ខ្លះ​បែរ​ជាប្រកបមុខរបរផ្សេងខុសពីសិល្បៈ ដូចជា​​មេធាវី ឬ​វិស្វករ​ជាដើម​ពេល​ធំឡើង។

ប៉ុន្តែ​វាសនា​មើល​មិន​ឃើញ​ ដូច​តារា​ទាំង​នេះ​ជា​ដើម​ បច្ចុប្បន្ន​នេះ​ពួកគេ​ទទួល​ជោគជ័យ​ខ្លាំង​ហួស​ស្មាន​លើ​វិថី​សិល្បៈ ខុសពី​អ្វី​ដែល​គេ​ប៉ង​កាល​ពីតូច៖

១. Rosé (ក្រុម BLACKPINK)

ក្ដី​សុបិន​របស់ Rosé គឺ​ចង់​ក្លាយជា​មេធាវី ប៉ុន្តែ​ដោយសារ​មាន​ដុង​ និង​ស្រឡាញ់​ខាង​សិល្បៈផង​នោះ​ នាង​ក៏​បាន​បោះ​បង់​ក្ដី​សុបិន​នោះ​ចោល និង​តស៊ូ​ខិត​ខំ​រហូត​ក្លាយ​ជា​តារា​ K-Pop លំដាប់​អន្តរជាតិ​ដូចពេល​នេះ។

បើ​តាម​វិបសាយ​ Kpopstarz ក៏​បាន​បញ្ជាក់​បន្ថែម​ដែរ Rosé គឺ​ជា​សិស្ស​មហាវិទ្យាល័យ​ Canterbury Girls Secondary College ដោយ​ចាប់​យក​មុខជំនាញ​ផ្នែក​ ច្បាប់។ នាង​ក៏​ជា​កូន​ស្រី​ដែលធំ​ដឹង​ក្ដី​ក្នុង​គ្រួសារ​ដែល​មាន​ឪពុក​ជា​មេធាវី​ជើងចាស់ដែរ។

២. Sojin (ក្រុម Girls' Day)

បើ​មិន​ចូល​សិល្បៈ​ទេ កុំអី Sojin ត្រូវ​ក្លាយ​ជា​វិស្វករ​មេកានិចទៅហើយ។ តាម​ការ​ឲ្យដឹង​ នាង​បាន​សិក្សា​នៅ​សាកលវិទ្យល័យ​ Youngnam University ជំនាញ​វិស្វកម្មមេកានិច។

៣. Kyuhyun (ក្រុម Super Junior)

តាមពិត​ទៅ​ Kyuhyun មិន​បាន​រៀនជំនាញច្បាប់ ឬ​វិស្វករ​ទេ ប៉ុន្តែ​លោក​បាន​និយាយ​ថា​ ប្រសិន​បើ​មិន​ឈាន​ជើង​ដើរ​វិថី​សិល្បៈ​ លោក​ប្រហែល​ជា​ក្លាយ​ជា​មេធាវី​ម្នាក់​ហើយ។

ឪពុក​របស់​លោក​ គឺ​ជា​ម្ចាស់​សាលា​មួយ​កន្លែង​នៅ​តៃវ៉ាន់ ដូចនេះ​ទើបវា​ក្លាយ​ជា​ហេតុផល​ធំ​មួយ​ជម្រុញ​ចិត្ត​ Kyuhyun ឲ្យ​ខិតខំ​រៀន​ និង​រៀន​កាន់​តែ​ពូកែ​ ពិសេស​រាល់ពេល​ប្រឡង​ លោក​តែង​ធ្វើ​បាន​ល្អ​ជា​និច្ច។ គម្រោង​នាពេល​អនាគត​ធំ​បំផុត​របស់​លោក​គឺ​ក្លាយ​ជា​ មេធាវី ប៉ុន្តែ​ចៃដន្យ​អី​ពេល​រៀន​ថ្នាក់​វិទ្យាល័យ​ លោក​ស្រាប់​តែ​មាន​ទំនោរ​ទៅ​ខាង​តន្ត្រី​ ជា​ហេតុ​លោក​ចូល​ក្នុង​ក្រុម​តន្ត្រី​មួយ​នៅពេល​នោះ​តែម្ដង។

៤. Jungwoo (ក្រុម NCT)

មាន​សេចក្ដី រាយការណ៍​ថា​ Jungwoo ជា​សិស្ស​ផ្នែក​វិស្វកម្មមេកានិចនៅ​វិទ្យាល័យ​ Gimpo Jeil Technical។ អ្នក​គាំទ្រ​នាំ​គ្នា​លើក​ឡើង​ដូចគ្នា​ថា​ប្រសិន​លោក​ផ្ដោត​លើ​ជំនាញ​នោះ​ លោក​ក៏​ប្រហែល​ក្លាយ​ទៅជា​វិស្វករ​ទៅហើយ។ ប៉ុន្តែ​យ៉ាង​ណា​ក៏​មិន​ថ្វី​ ព្រោះ​ថា​ពេល​នេះ​ Jungwoo ក៏ជា​តារា​ល្បី​ប្រចាំ​ពិភព K-Pop ដែល​មាន​អ្នក​គាំទ្រ​ច្រើន​ដែរ៕

ប្រភព៖ kpopstarz   ប្រែ​សម្រួល៖ យី សុធារី