តោះ...ដឹងពីបំណងយកកូនបន្ថែមរបស់តារាចម្រៀង ឆាយ វីរៈយុទ្ធ!

2020-07-16 08:48:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងលំដាប់កំពូលប្រចាំផលិតកម្មសាន់ដេ លោក ឆាយ វីរៈយុទ្ធ មានបំណងចង់បានកូនចំនួន២នាក់ គឺប្រុស១ និងស្រី១ ឬស្រីទាំង២ក៏បាន ដើម្បីបង្កើតជាគ្រួសារដ៏កក់ក្ដៅតូចល្មមមួយនៅថ្ងៃអនាគត។

លោក ឆាយ វីរៈយុទ្ធ និយាយថា រូបលោក និងភរិយាពុំទាន់បានគិតថានឹងយកកូនមួយទៀតនៅឆ្នាំណានោះទេ ព្រោះកូនស្រីរបស់លោកទើបមានអាយុជិត១០ខែ។ ប៉ុន្តែលោកបានគិតហើយថានឹងយកកូនយ៉ាងតិច២នាក់។

ចាប់តាំងពីតារាចម្រៀងល្បីឈ្មោះរូបនេះ លាភាពកម្លោះកាលពីឆ្នាំ២០១៧ គេសង្កេតឃើញលោកផ្ដល់ភាពកក់ក្ដៅបំផុតដល់ភរិយា បើទោះបីជាលោកមមាញឹកនឹងអាជីពសិល្បៈ និងការងាររកស៊ីផ្ទាល់ខ្លួនក៏ដោយ ព្រោះលោកយល់ថាការផ្ដល់ភាពកក់ក្ដៅដល់គ្រួសារ គឺជារឿងសំខាន់បំផុតសម្រាប់គ្រួសារលោក។

តារាចម្រៀងរូបសង្ហា ឆាយ វីរៈយុទ្ធ បានរៀបការជាមួយកូនស្រីថៅកែរោងម៉ាស៊ីនកិនស្រូវមួយនៅខេត្ដកំពង់ចាម ឈ្មោះ សែ ចាន់ឌី កាលពីចុងខែឧសភា ឆ្នាំ២០១៧។ គិតមកដល់ពេលនេះ ពួកគេបានចាប់ដៃគ្នាជាស្វាមី-ភរិយាអស់រយៈពេលជាង៣ឆ្នាំហើយ។ គូស្វាមីភរិយារបស់តារាចម្រៀងរូបនេះ បានរស់នៅយ៉ាងមានសុភមង្គល ហើយទើបបង្កើតបានកូនស្រីដ៏គួរឲ្យស្រឡាញ់ម្នាក់ដែលលោកដាក់ឈ្មោះថា វីរៈយុទ្ធ អភិជាតាទេវី ទៀតផង៕

អត្ថបទ៖ ជិន សុភ័ក្ដ្រ