ញៀនទូរសព្ទពេក សាកថ្នាំនេះទៅអាចដឹងលទ្ធផលភ្លាមៗ

2020-07-27 06:20:29
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមដងផ្លូវ កន្លែងអង្គុយលេងតាមសួនច្បារ ហាងកាហ្វេ ពេលទទួលទានអាហារជុំគ្នា ពេលរៀន ឃើញងោកចុះក្រោមអូសចុះឡើងៗលើទូរសព្ទ សឹងគ្រប់ដៃ។ មកដល់ផ្ទះ ហើយឆ្លៀតបន្តសកម្មភាពទៀត សូម្បីតែលើគ្រែគេង ដូចពាក្យគេនិយាយលេង មិនញៀនទេ គ្រាន់តែអត់មិនបាន។

ទូរសព្ទ ជាឧបករណ៍ប្រើទាញប្រយោជន៍ក្នុងការទទួលបានព័ត៌មានថ្មីៗ ឬសម្រេចការងារមួយចំនួន។ តែបើចំណាយពេលលើវាច្រើនពេក អាចរំខានសេចក្តីសុខនិងប៉ះពាល់ដល់សុខភាពទៅវិញ។

មនុស្សជាច្រើន ចង់ចំណាយពេលតិចបំផុតលើស្មាតហ្វូន តែមិនទាន់ច្បាស់លាស់តើត្រូវគ្រប់គ្រងយ៉ាងម៉េចដើម្បីកែប្រែទម្លាប់នេះបាន។

ដឹងរយៈពេលអ្នកចំណាយលើទូរសព្ទ

អ្នកអាចដំឡើងកម្មវិធីដូចជា Moment ឬ OFFTIME ដែលនឹងប្រមូលទិន្នន័យការចំណាយក្នុងមួយថ្ងៃលើទូរសព្ទ។ ព័ត៌មានទាំងនេះ អាចជួយជាយោបល់ តាមដាន និងឈានដល់ការកាត់បន្ថយទម្លាប់ការប្រើប្រាស់ទូរសព្ទរបស់អ្នក។

កំណត់អ្វីអ្នកចង់ធ្វើ ពេលទំនេរ

ផ្ដោតលើសកម្មភាពចង់ធ្វើ ឧទាហរណ៍ បើចង់អានសៀវភៅ ដាក់សៀវភៅលើតុ ក្បែរខ្លួន ងាយយកមកមើល។ បើចង់ហាត់លេងភ្លេង យកឧបករណ៍ចេញក្រៅដាក់លើធ្នើរ កន្លែងទូលាយ ងាយស្រួលរក ចាប់កាន់មកលេង។ បើចង់ចំណាយពេលច្រើនជាមួយក្រុមគ្រួសារ ឬមិត្តភក្ដិ ធ្វើចុះ ហើយដាក់ទូរសព្ទ ក្នុងហោប៉ៅ ឬកាបូប កំឡុងពេលជួបជុំ។

ប្រើកម្មវិធីជំនួយ

កម្មវិធីដូចជា Freedom (iOS), OFFTIME និង Flipd ក៏ជា Tool ដ៏ល្អ ធ្វើឲ្យអ្នកកាត់បន្ថយការនឹកនានៅពេលចង់ប្រើទូរសព្ទ។

រំលឹកខ្លួនឯង

មិនតិចដងទេ កាន់ទូរសព្ទប្រើ ភ្លេចៗខ្លួនកន្លះម៉ោងបាត់។ គួរមានអ្វីមួយជាឧបសគ្គ ដូចជាសម្បកគ្របជិត ដែលតម្រូវឲ្យអ្នកដោះចេញ ដើម្បីចូលប្រើប្រាស់ ឬកំណត់រូបភាពលើ Lock screen ជាមួយសាររំលឹកខ្លួនឯងជាសំនួរ ដូចជាបើកធ្វើអ្វី? ហេតុអ្វីបានបើកពេលនេះ?

លុបកម្មវិធីបណ្ដាញសង្គម

គ្មានអ្វីចំណាយពេលវេលាអ្នកច្រើនជាង កម្មវិធីបណ្ដាញសង្គមនោះឡើយ។ នេះមិនចម្លែកនោះទេ ព្រោះកម្មវិធីទាំងនេះរចនាឡើង ឲ្យអ្នកចំណាយពេលច្រើនបំផុតលើកម្មវិធី។

គ្រប់ពេល ចំណាយលើបណ្ដាញសង្គម មានឱកាសច្រើនក្រុមហ៊ុនបង្ហាញពាណិជ្ជកម្ម ផ្អែកលើព័ត៌មានផ្ទាល់ខ្លួនរបស់អ្នក។ យើងមិនមែនជាអតិថិជនរបស់កម្មវិធីបណ្ដាញសង្គមទេ តែអ្នកផ្សាយពាណិជ្ជកម្មទៅវិញទេ។

មិនឃាត់ទេ អាចប្រើបណ្ដាញសង្គមបាន តែគោលបំណងចំណាយពេលតិចលើទូរសព្ទ ដូចនេះគួរប្រើបណ្ដាញសង្គមត្រឹមលើកុំព្យូទ័រជំនួសវិញ។

ឆ្លើយតបសារដោយស្វ័យប្រវត្តិ

មនុស្សជាច្រើន ស្ទាក់ស្ទើរឃ្លាតឆ្ងាយពីទូរសព្ទ ដោយសារត្រូវចំណាយពេលឆ្លើយតបសារ។ អាចកំណត់ផ្ញើសារដោយស្វ័យប្រវត្តិ ប្រាប់អ្នកដទៃ ខ្លួនរវល់ និងឆ្លើយតបពេលក្រោយ។

ចាប់ពី iOS 11 ក្រុមហ៊ុន Apple ផ្ដល់មុខងារ Do Not Disturb While Driving អាចប្រើពេលបើកបរបាន។ Android ក៏មានកម្មវិធី អាចប្រើបានដូចជា LilSpace ឬ SMS Auto-Reply Text Message។

រៀបចំអ្វីអាចធ្វើបាន

រៀបចំកន្លែងសាកថ្ម កុំឲ្យនៅជិតគ្រែគេង។
បិទរាល់ Notifications លើកលែងតែ ការហៅទូរសព្ទ សារ និងប្រតិទិន អាចបើកវិញម្ដងមួយៗ ពេលក្រោយបាន។
រចនា Home Screen ដោយបង្ហាញត្រឹមកម្មវិធីសំខាន់ៗ
ប្រើនាឡិកា ឬនាឡិការោទ៍ ជៀសជាងទូរសព្ទ
បិទទូរសព្ទ ឬដាក់ Silent ពេលទទួលទានអាហាររួមគ្នា។

ទន្ទេញឲ្យចាំគោលបំណង

ចង់ចំណាយពេលតិចលើទូរសព្ទ តែមិនផ្លាស់ប្ដូរទម្លាប់ ដូចចង់សម្រកទម្ងន់ តែមិនព្រមតមចំណីអាហារ មិនធ្វើលំហាត់ប្រាណ លទ្ធផលមិនបាច់ឆ្ងល់ទេ ដដែលៗ។ រំលឹក និងគិតពីចំណុចវិជ្ជមាន ពីការចំណេញពេលវេលា បន្ទាប់ពីកាត់បន្ថយកម្រិតប្រើប្រាស់ទូរសព្ទប្រចាំថ្ងៃ៕

ប្រភព៖ Time ប្រែសម្រួល៖ ប៊ុនធឿន