មនុស្ស ៤នាក់ ដែលធ្លាប់ត្រូវសត្វជួយចិញ្ចឹម ស្រដៀងសាច់រឿង Mowgli
- 2020-08-09 08:24:52
- ចំនួនមតិ 0 | ចំនួនចែករំលែក 0
មនុស្ស ៤នាក់ ដែលធ្លាប់ត្រូវសត្វជួយចិញ្ចឹម ស្រដៀងសាច់រឿង Mowgli
ចន្លោះមិនឃើញ
មនុស្សគ្រប់គ្នាប្រាកដជាធ្លាប់ដឹងពីរឿងកូនមនុស្សធំធាត់ឡើងនៅព្រៃដោយមានសត្វជួយចិញ្ចឹម ដោយឮ ឬឃើញមានក្នុងរឿងនិទាន រឿងប្រលោមលោក ឬខ្សែភាពយន្ត ប៉ុន្តែតាមរយៈសារព័ត៌មានអង់គ្លេស Mirror បានបង្ហាញពីមនុស្ស៤នាក់ធ្លាប់ត្រូវសត្វជួយចិញ្ចឹម កើតមានពិតជាក់ស្ដែងក្នុងសង្គម។
១.ក្មេងប្រុសមាន់
នេះជារឿងរ៉ាវរន្ធត់ពីកុមារភាពរបស់បុរសជនជាតិហ្វីជីម្នាក់គឺលោក Sujit Kumar គឺនៅពេលដែលមានអាយុ៦ឆ្នាំ មិនដឹងពីមូលហេតុអ្វី លោកត្រូវបានក្រុមគ្រួសារចាក់សោបង្ខាំងទុកក្នុងទ្រុងមាន់។ អស់រយៈពេល៨ឆ្នាំដែល Sujitរស់នៅទីនោះ ក្រោយមកទើបក្រុមការងារសង្គមសប្បុរសធម៌បានរកឃើញលោក។ ពួកគេបាននាំ Sujit ទៅរស់នៅក្នុងផ្ទះអ្នកស្រុករយៈពេល២០ឆ្នាំ។ Sujit ត្រូវបានអ្នកស្រុកឲ្យដឹងថា លោកមានអាកប្បកិរិយាដូចមាន់ ដោយចឹកចំណីអាហារលើដី និងស្រែកដូចជាសត្វមាន់រងាវ។ រហូតមកដល់បច្ចុប្បន្ននេះ Sujit ទទួលបានការមើលថែពីមជ្ឈមណ្ឌលកុមារកំព្រាឯកជនមួយកន្លែង ដោយមានអ្នកស្ម័គ្រចិត្តព្យាយាមបង្រៀនឲ្យលោក ចេះដើរ និយាយ និងបង្រៀនពីការបរិភោគអាហារ។
២.ក្មេងប្រុសស្វា
ក្នុងឆ្នាំ១៩៨៨ នៅពេលដែលឪពុករបស់ John សម្លាប់ម្ដាយរបស់គេ John បានទៅរត់ពួនក្នុងព្រៃនៃប្រទេសអ៊ូហ្គាន់ដា និងត្រូវបានស្វាមួយក្រុមជួយផ្ដល់ចំណីឲ្យ។ នៅឆ្នាំ១៩៩១ John ត្រូវបានស្ត្រីកុលសម្ព័ន្ធរកឃើញ ដែលពេលនោះ John មានអាយុប្រហែល៥ឆ្នាំ ត្រូវបានគេនាំទៅភូមិអ្នកស្រុកវិញ។ John មានដំណើរនិងចរិតដូចសត្វស្វាទាំងស្រុង ហើយនៅពេលទៅដល់ភូមិ John មិនទាន់ស៊ាំនឹងចំណីអាហារឆ្អិនស្រាប់ឡើយនិងធ្លាក់ខ្លួនឈឺ។ ក្រោយមកអ្នកភូមិជួយបង្រៀនឲ្យគេចេះរស់នៅដូចមនុស្ស និងត្រូវបានប្ដីប្រពន្ធមួយគូទទួលចិញ្ចឹមផងដែរ។ រឿងរ៉ាវជីវិតរបស់ Johnត្រូវបានសារព័ត៌មាន BBC ចុះផ្សាយនៅឆ្នាំ១៩៩៩។
៣.ក្មេងប្រុសសុនខ
នៅពេល Ivan Mishukov មានអាយុ៤ឆ្នាំ ដោយនៅជាមួយឪពុកចុងជាមនុស្សស្រវឹងខួបនិងតែងរករឿងឈ្លោះជាមួយម្ដាយខ្លួន ក្នុងឆ្នាំ១៩៩៦ រូបគេបានរត់ចេញពីផ្ទះទៅរស់នៅតាមដងផ្លូវ។ ជីវិតលើដងផ្លូវរបស់ Ivan រស់នៅជាមួយក្រុមសត្វសុនខអនាថា ដោយចែករំលែកអាហារគ្នា ចំណែកក្រុមសត្វសុនខក៏ចូលចិត្តនិងតាមការពារ Ivan ប្រៀបដូចជាកូនបង្កើត។ រយៈពេលពីរឆ្នាំដែល Ivan រស់នៅជាមួយសុនខ រហូតដល់ពេលមួយប៉ូលិសបានកត់សម្គាល់ឃើញពីសកម្មភាពរបស់គេនិងព្យាយាមនាំIvan ទៅរស់នៅជាមួយមនុស្សវិញ។ ប៉ូលិសខំពន្យល់ Ivan បីដងទើបរូបគេព្រមទៅនៅក្នុងមណ្ឌលកុមារនិងទៅសាលារៀន។ រយៈពេលក្រោយមក Ivan បានចូលបម្រើក្នុងជួរកងទ័ពរុស្ស៊ី។
៤.ក្មេងស្រីចចក
Amala អាយុ៨ឆ្នាំ និង Kamala អាយុ១៨ខែ ត្រូវបានលោក Reverend Jal Singh សាសនទូតម្នាក់រកឃើញនៅក្នុងរូងដ៏ជ្រៅរបស់សត្វឆ្កែចចកក្នុងឆ្នាំ១៩២០ ក្នុងរដ្ឋ West Bengal ប្រទេសឥណ្ឌា។ ការរកឃើញនោះបន្ទាប់ពី លោក Reverend បានឮពីអ្នកស្រុកថាមានឮសំឡេងខ្មោចមនុស្សនៅក្នុងព្រៃ។ Amala និង Kamala ត្រូវប្រទះឃើញស្ថិតក្នុងសភាពននលគោក កខ្វក់និងស្ទុះមកខាំក្រញីមនុស្ស។ យ៉ាងណាក្ដី ពួកគេទាំងពីរត្រូវនាំយកទៅមណ្ឌលកុមារកំព្រា។ នៅទីនោះ Amala និង Kamala មានចរិតដូចសត្វឆ្កែចចកទាំងស្រុង ដោយវារជើងបួនយ៉ាងលឿន ចេញវាររកចំណី និងស្រែកដូចសំឡេងចចកលូនាពាក់កណ្ដាលយប់អាធ្រាត្រ។ ទោះបីជាអ្នកមើលថែជួយស្លៀកពាក់ខោអាវឲ្យពួកគេតែងខំក្រញីអាវចេញខ្ទេចអស់ផងដែរ។ Amala បានស្លាប់នៅមួយឆ្នាំក្រោយពេលរស់នៅមណ្ឌលកុមារ ចំណែក Kamala នៅរស់រយៈពេល៩ឆ្នាំក្រោយមកទៀត។ មុនKamala ស្លាប់ នាងអាចឈរដើរទ្រេតទ្រោតនិងអាចនិយាយបានតែពីរបីពាក្យប៉ុណ្ណោះ៕