ខែក្រោយ Sony នឹងចេញស្មាតហ្វូនថ្មីដាក់អេក្រង់ Refresh Rate 120Hz

2020-08-28 01:40:49
ចំនួនមតិ 0 | ចំនួនចែករំលែក 0

ចន្លោះមិនឃើញ

Sony ត្រៀមប្រកាសចេញស្មាតហ្វូនថ្មីនាថ្ងៃទី១៧ ខែកញ្ញាខាងមុខនេះ ដែលពេលនេះលក្ខណៈសម្បត្តិរបស់វាបានលេចធ្លាយស្ទើរតែទាំងស្រុង និងបានចែករំលែកដោយវិបសាយ Android Headlines។

វិបសាយខាងលើបានឲ្យដឹងថាស្មាតហ្វូនថ្មីម៉ូដែល Sony Xperia 5 II នឹងបន្តប្រើរចនាបថខ្លួនវែងដូចជាស្មាតហ្វូន Sony នាពេលថ្មីៗកន្លងទៅដែរ។ អេក្រង់របស់វានៅតែមានទំហំ ៦,១អ៊ីញ ជាប្រភេទ OLED អាចបង្ហាញរូបកម្រិត FHD+ និងទ្រាំទ្រ HDR ហើយមាន Refresh Rate ដល់ 120Hz ជាលើកដំបូងសម្រាប់ស្មាតហ្វូន Sony។

ចំពោះផ្នែកកាមេរ៉ាក៏មានបង្កើនសមត្ថភាពផងដែរ ដោយកាមេរ៉ាបីគ្រាប់ខាងក្រោយមានការតម្រៀបស្រដៀងនឹង Xperia 1 II ហើយមានប្រើឡេនម៉ាក Zeiss ទៀតផង។ កាមេរ៉ាមេមានទំហំ ១២MP ដែលមាន Aperture f/1.7, កាមេរ៉ា Ultrawide ទំហំ ១២MP អាចថតប្លង់ទំហំ ១២៤ដឺក្រេ និងកាមេរ៉ា Telephoto ទំហំ ១២MP អាច Zoom បាន៣ដង។

នៅផ្នែកខាងក្នុងគឺមានបំពាក់ថ្មទំហំ ៤០០០ mAh និងគួបផ្សំដោយឈីប Snapdragon 865, RAM ទំហំ ៨GB, អង្គផ្ទុកទំហំ ១២៨GB, មានរន្ធដាក់មេមូរីកាត និងមានរន្ធសម្រាប់ដោតកាស 3.5 ទៀតផង៕

ប្រភព៖ The Verge ប្រែសម្រួល៖ សុខហេង