លី ម៉ារីណា បញ្ចេញអាយុពិតឃើញថា ត្បិតថាច្រើនពិតមែន តែសាច់សខ្ចីល្វក់ ក្រមុំ ១៨មិនដូរទេ

2020-08-31 05:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង លី ម៉ារីណា ថ្មីៗនេះបានបើកបង្ហាញពីតួលេខអាយុពិតយ៉ាងកម្រ ធ្វើឲ្យមានការភ្ញាក់ផ្អើល ខណៈអ្នកខ្លះបើកភ្នែកធំៗ ត្បិតថា ស្ទើរមិនជឿថា លី ម៉ារីណា មានវ័យច្រើនទៅហើយ ប៉ុន្តែសាច់របស់នាងវិញនៅតែសខ្ចីថ្លា ក្រមុំវ័យ ១៨ មិនខ្ចីដូរ។

ម៉ារីណា បានបើកបង្ហាញពីរឿងនេះជាលើកដំបូង នៅក្នុងកម្មវិធីសម្ពោធផលិតផលថែរក្សា និងលើកកម្ពស់សម្រស់មួយនាចុងសប្ដាហ៍មុន។ តាមការបញ្ជាក់របស់តារាស្រី បានឲ្យដឹងថា មកដល់ពេលនេះ នាងមានវ័យដល់ទៅ ៤០ឆ្នាំទៅហើយ។ តួលេខនេះ មិនត្រឹមតែភ្ញៀវកិត្តិយសនោះទេបើកភ្នែកធំៗ សូម្បីតែពិធីករ សុខ រ៉ាស៊ី ក៏ទប់មាត់មិនបានដែរ។ "Wow អ្នកនាង ម៉ារីណា អាយុ ៤០ឆ្នាំហើយ តែកុំមើលសាច់ឡើងខ្ចី...ស្ទើរមិនចង់ជឿទេ!”។ រ៉ាស៊ី លាន់មាត់។

ជុំវិញរឿងការរក្សាបានសម្បុរស្បែក សស្អាតនេះ ម៉ារីណា បញ្ជាក់ថា មិនមែនជារឿងចៃដន្យ ប៉ុន្តែនាង គឺជានារីម្នាក់ដែលស្រឡាញ់សម្ផស្សស្បែក ហើយបានព្យាយាមមើលថែវាបានដិតដល់បំផុតរហូតមកអស់ពេលជាច្រើនឆ្នាំកន្លងមកហើយ ពោលគឺតាំងពីនាងពេញវ័យ ក្នុងនោះមានទាំងការប្រើប្រាស់ ផលិតផលថែរក្សាសម្រស់នានា ប្រភេទដែលអាចទុកចិត្តបាន មានគុណភាពពិតប្រាកដ។

ក្រៅពីនេះនាងមានទម្លាប់ប្រចាំខ្លួនមួយតាំងពីក្មេងមក ដែលនាងយល់ថា ជាអំណោយផលមួយសម្រាប់សម្ផស្សស្បែករបស់នាង។ "ចាស វិធីសាស្ត្រផ្សេងក្រៅពីប្រើផលិតផលគឺមានដែរ...និយាយហ្សីនហ្មង ខ្ញុំចូលចិត្តញុំាពន្លៃ និងរមៀត... តាំងពីតូចៗមក ម៉ាក់ខ្ញុំគាត់ចូលចិត្តបុកពន្លៃ រមៀតហ្នឹងលាយជាមួយទឹកឃ្មុំឲ្យញុំា ហើយខ្ញុំញុំាវាតាំងពីក្មេងរហូតមកដល់វ័យប៉ុណ្ណឹងហ្មង!”។

សម្ផស្សស្បែករបស់ លី ម៉ារីណា ត្រូវបានទទួលស្គាល់ ហើយវ័យជាង ៤០ ត្រូវបានផាត់ចោល ខណៈនៅចុងសប្ដាហ៍មុននេះ នាងបានបង្ហាញខ្លួន ក្នុងនាមជាតារាតំណាងផលិតផល(BA)របស់ក្រុមហ៊ុន HK7។ អ្នកនាង អ៊ឹម សុគន្ធា អតីតជាតារាម៉ូដែល បច្ចុប្បន្នជាអគ្គនាយិកាក្រុមហ៊ុន បានលើកឡើងថា លី ម៉ារីណា គឺជាតារាស្រីដែលមានចរិតឬកពារ រម្យទម ថ្លៃថ្នូរ ហើយអ្នកនាង ស្រឡាញ់គាំទ្រតាំងពីនៅក្មេងៗ។

ចំណុចពិសេសមួយទៀត គឺថា ម៉ារីណា ត្បិតថាវ័យច្រើនក៏ពិតមែន ប៉ុន្តែនាងជាសិល្បការិនីមានសម្ផស្សស្បែកស្អាតបំផុតម្នាក់ក្នុងចំណោមសិល្បការិនីនានា និងជាចំណុចពិសេសដែលមិនអាចផាត់ចោលបាន ហើយនេះជាមូលហេតុដែលអ្នកនាងជ្រើសរើសរៀមច្បងធ្វើជា BA ដោយឥតស្ទាក់ស្ទើរ។

លី ម៉ារីណា បញ្ជាក់ថា មុនទទួលការងារនេះ នាងក៏ជាអ្នកប្រើប្រាស់ផលិតផលខាងលើដែរ។ តារាស្រីទទួលកុងត្រាជាមួយក្រុមហ៊ុនអគ្គនាយិកា អតីតជាសិល្បការិនីមួយរូបដែរ រយៈពេល ១ឆ្នាំ។ ប្រសិនបើអ្វីៗដំណើរល្អ ភាគីទាំងពីរនឹងអាចបន្ថែមរយៈពេលទៀត នៅពេលជាក់ស្ដែង៕