ក្ដារចុច ៧០ដុល្លារអាចបំប្លែងធ្វើជាកុំព្យ័ទ័របាន ឯអេក្រង់ Monitor ទិញថែមខ្លួនឯង

2020-11-10 09:08:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ ក្រុមអ្នកជំនាញខាងប្រព័ន្ធសុវត្ថិភាពអ៊ីនធើណិតដ៏ល្បីល្បាញ ឈ្មោះថា Raspberry អាចផលិតបាន ឧបករណ៍ដ៏ទំនើប ដែលពួកគេឱ្យឈ្មោះថា Raspberry Pi 400 អាចហៅបានថា self-contained computer built into a keyboard ។

Raspberry Pi 400

ក្ដារចុចខាងលើនេះ បំពាក់ដោយបន្ទះឈីប ដែលដំណើរការដោយ Raspberry pi OS ផ្ទាល់ និងមានរន្ធដោតជាច្រើន ដូចនឹងតួកុំព្យូទ័រយួរដៃសព្វថ្ងៃដែរ។ អ្វីដែលធ្វើឱ្យវាពិសេសនោះគឺ អ្នកគ្រាន់តែទិញអេក្រង់ Monitor (ប្រភេទណាក៏បាន) រួចហើយដោតខ្សែពីអេក្រង់ ភ្ជាប់នឹងក្តារចុចដ៏អស្ចារ្យមួយនេះបន្ទាប់មក ចុចប៊ូតុង Power វានឹងដំណើរបានភ្លាម មិនបាច់ចាំយូរឡើយ។

Raspberry Pi 400

រីឯលក្ខណសម្បត្តិខាងក្នុង នៃក្តារចុចនេះ គឺបំពាក់ដោយបន្ទះឈីប CPU Quad-core Cortex-A72 ល្បឿន 64-bits SoC@1.8Ghz , ជម្រើស RAM 4GB ប្រភេទ LPDDR4 មានភ្ជាប់ប្រព័ន្ធ Bluetooth BLE 5.0 និងមានអង់តែន Dual band Wi-Fi លេខ IEE 802.11 AC និងថែមទាំងមានកង្ហារ Heatsink រក្សាសីតុណ្ហភាពឱ្យត្រជាក់ កុំឱ្យក្ដៅខ្លាំង ដែលកង្ហារតូចនេះ ស្រដៀងនឹងកង្ហារ Water Cooling នៅលើ desktop ប្រភេទហ្គេម ឬកាត់ក្រាហ្វិកធំៗដែរ។

យោងតាមវេបសាយផ្លូវការរបស់ Raspberry បានឱ្យដឹងថា ក្តារចុចដ៏អស្ចារ្យមួយនេះ ត្រូវបានដាក់លក់ក្នុងតម្លៃតែ 70ដុល្លារប៉ុណ្ណោះ។ ចំណែកឯអេក្រង់ អ្នករកអាចទិញបានខ្លួនឯង ឬភ្ជាប់ជាមួយអេក្រង់ ដែលអ្នកកំពុងប្រើ ក៏បាន៕ ទស្សនាវីដេអូដំណើរការខាងក្រោម៖