៣០ឆ្នាំហើយ ស្វែង សុជាតា មិនដែលកោសខ្យល់ទាល់តែសោះ តែឈឺលើកនេះទើបហ៊ានប្រថុយ

2020-11-11 07:49:26
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង ស្វែង សុជាតា បានពុលអាហារ រហូតដល់មិត្តរួមអាជីព និងក្រុមការងារថតរឿងជួយសង្គ្រោះនាងដោយការកោសខ្យល់។ នាងបញ្ជាក់ថា រូបនាងមិនដែលកោសខ្យល់ទាល់តែសោះក្នុងរយៈពេល៣០ឆ្នាំមកហើយ ប៉ុន្ដែពេលនេះត្រូវតែប្រថុយ។

តារាសម្ដែងវ័យជ្រេរូបនេះ បានបង្ហោះសារមួយដោយមានភ្ជាប់រូបថត និងវីដេអូសកម្មភាពកោសខ្យល់របស់នាងនៅមុននេះបន្តិចថា ដោយសារហូបចំណីអាហារខុស បានធ្វើឲ្យនាងធ្លាក់ខ្លួនឈឺ ត្រូវរកវិធីសង្គ្រោះបន្ទាន់បើមិនដូច្នោះទេ នាងនឹងត្រូវខាតការងារមិនខាន។

នៅគ្រាហ៍ដែលតារាផ្សេងៗអំពាវនាវឲ្យប្រជាពលរដ្ឋខ្មែរគ្រប់រូបប្រុងប្រយ័ត្នពីជំងឺកូវីដ-១៩ ស្វែង សុជាតា បានអំពាវនាវឲ្យពលរដ្ឋខ្មែរគ្រប់រូបប្រុងប្រយ័ត្នចំពោះចំណីអាហារបច្ចុប្បន្ន កុំហូបតាមឃ្លាន ក្រោយពីនាងវិលមុខ និងចុក រកចង់ក្អួតដោយសារពុលអាហារ។

អ្នកនាង ស្វែង សុជាតា ក៏បានអគុណដល់តារាដែលជាមិត្តរួមអាជីពបានជួយកោសខ្យល់ឲ្យនាងភ្លាមៗ ដើម្បីបានបន្តការងារថតទៅទៀត។ ទន្ទឹមគ្នានេះ នាងក៏បាននិយាយទៅកាន់អ្នកគាំទ្រនាងថា នឹក បារម្ភ និងស្រឡាញ់ប្រជាជនកម្ពុជាទាំងអស់៕

អត្ថបទ៖ ជិន សុភ័ក្ដ្រ