គួន ម៉ុម មានប្រវត្តិលេងបាល់ល្អកម្រិតណា មុនពេលចូលហាត់បាល់ទះដំបូង?

2020-12-11 07:31:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្មាត់ស្ដាំជម្រើសជាតិ គួន ម៉ុម ជាអតីតស្មាត់ធំប្រចាំភូមិស្រែឈើនៀង ស្រុកត្រាំកក់ ខេត្តតាកែវ អំឡុងមុនពេលចូលហាត់នៅមហាផ្ទៃកាលឆ្នាំ២០១៦។

គួន ម៉ុម លេខ ១៥

ស្មាត់ស្ដាំកម្ពស់ជិត២ម៉ែត្ររូបនេះបានរៀបរាប់ឲ្យដឹងថា ខ្លួនដើរលេងតាមភូមិតាំងពីនៅរៀនវិទ្យាល័យ បន្ទាប់ពីចូលហាត់លើកដំបូងនៅវិទ្យាល័យសម្ដេច ហ៊ុន សែន ព្រៃផ្អេ កាលរៀនថ្នាក់ទី៧។ ការចេះលេងដំបូងមិនល្អអីទេ ប៉ុន្តែបានមួយរយៈពេលខ្លីក៏វិវឌ្ឍន៍ខ្លួន ដើរលេងតាមកឋិន តាមភូមិ ឆ្លងពីស្រុក ឆ្លងខេត្តជាដើម។ អ្វីដែលសំខាន់ការដើរលេងរបស់គេទទួលបានការតាមគាំទ្រពី មិត្តភ័ក្ដិក្នុងស្រុកក្នុងភូមិ ពូ មីង នៅពេលលេងម្ដង មិនថានៅតារាងក្រៅស្រុក មានការគាំទ្រយ៉ាងច្រើន។

រហូត ដល់ឆ្នាំ២០១៦ ទើបសម្រេចចូលហាត់នៅក្លឹបបាល់ទះក្រសួងមហាផ្ទៃ ពោលការចាប់ផ្ដើមហាត់ដំបូងនេះក្នុងអំឡុងនោះគឺខ្លួនចេះដើរលេងសឹងពេញភ្នំពេញ និងតាមខេត្តនានារួចទៅហើយ។ យ៉ាងណា ដល់ឆ្នាំ២០១៨ ក៏សម្រេចមកចូលហាត់នៅក្លឹបវិសាខា ដោយចូលរួមរស់ដំបូងក៏ទទួលបានឱកាសទៅចូលរួមប្រកួតនៅក្រៅប្រទេសនៅថៃ ក្នុងការប្រកួតពានមិត្តភាពមួយ ដែលរៀបចំឡើងនៅលើទឹកដីថៃ។

ស្មាត់មកពីខេត្តតាកែវខាងលើមានបងប្អូនបង្កើតចំនួន ៦ នាក់ខ្លួនជាកូនទី៥ ក្នុងគ្រួសារ ឪពុករបស់គេឈ្មោះ ប៊ុន ម៉ៅ ម្ដាយឈ្មោះ កុច សុខា លោកទាំងពីរជាកសិករ ដែលមានជីវភាពមធ្យម។ គេកើតថ្ងៃទី១០ ខែកក្កដា ឆ្នាំ១៩៩៦ បច្ចុប្បន្នមានកម្ពស់ ១,៩៦ ម៉ែត្រ សម្រាប់ការសិក្សាក៏បានបញ្ចប់ថ្នាក់បរិញ្ញាប័ត្រមុខជំនាញ IT នៅសាលា វណ្ណដា ផងដែរ។

កត្តាដែលនាំឲ្យខ្លួនស្រវាចាប់យកជាកីឡាករបាល់ទះ ដោយសារតែមានចិត្តស្រលាញ់ ជាមួយទេពកោសល្យល្អពីកំណើត ពោលគឺកីឡានេះឆាប់ចាប់បាន នូវអ្វីដែលគ្រូឬរៀមច្បងបានប្រាប់។ សម្រាប់ទិសដៅនាពេលអនាគតស្មាត់ដែលមានជំនាញវ៉ៃបានបាល់គ្រប់កន្លែងរូបនេះ មិនទាន់គិតឡើយ ពោលគឺចិត្តផ្ចង់គិតអំពីការប្រកួតស៊ីហ្គេម ឆ្នាំក្រោយនាពេលដ៏ខ្លី និងការហ្វឹកហាត់ជាមួយជម្រើសជាតិបាល់ទះឲ្យកាន់តែខ្លាំងបន្ថែមទៀត។ រំលឹកថា គួន ម៉ុម ជាស្មាត់ស្ដាំល្អមួយរូបរបស់កម្ពុជា ដែលទទួលបានឱកាសទៅលេងនៅក្រៅប្រទេសលីគកំពូល ឥណ្ឌូណេស៊ី កាលពីពេលកន្លងទៅ៕