តើក្លឹបចំណាយលុយទេ និងគោរពលក្ខណអ្វីខ្លះ ពេលយកកីឡាករបាទី?
- 2021-01-15 07:07:20
- ចំនួនមតិ 0 | ចំនួនចែករំលែក 0
តើក្លឹបចំណាយលុយទេ និងគោរពលក្ខណអ្វីខ្លះ ពេលយកកីឡាករបាទី?
ចន្លោះមិនឃើញ
កាលពីព្រឹកមិញនេះសាលាបាល់ទាត់ជាតិបាទី បានប្រកាសរំសាយកីឡាកររបស់ខ្លួនចំនួន ១២ នាក់ ដែលមាន ៨នាក់ នឹងបង្ហាញខ្លួនក្នុងក្លឹបអាជីពនៃលីគកំពូលកម្ពុជា ឆ្នាំ២០២១ ស្របពេល ៤ នាក់ទៀតកំពុងស្ថិតក្នុងការចរចា។ យ៉ាងណាការនាំយកកីឡាករបាទីទៅចូលរួមក្រុមតើក្លឹបត្រូវចំណាយលុយទៅឲ្យសហព័ន្ធបាល់ទាត់ឬទេ?
បើតាមលោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជាបានឲ្យដឹងថា សម្រាប់បណ្ដាប្រទេសនៅលើពិភពលោក គឺគេយកប្រាក់។ ប៉ុន្តែសហព័ន្ធកីឡាបាល់ទាត់កម្ពុជាមិនយកឡើយ ដោយគ្រាន់តែទាមទារ ៤ ចំណុចសំខាន់ៗពីក្លឹបក្នុងការចរចាយកយុវជនរបស់ខ្លួន តែប៉ុណ្ណោះ។
លក្ខណទាំង៤នោះគឺ៖
១-ផ្ដល់មកឲ្យសហព័ន្ធវិញនៅពេលដែល ជម្រើសជាតិកោះហៅ
២-ត្រូវទទួលបានការហ្វឹកហាត់ដិតដល់ និងមានឱកាសបានចូលលេងក្នុងលីគ ឬ Hun Sen Cup
៣-ត្រូវតែផ្ដល់ការសិក្សា ដល់យុវជនទាំងនោះឲ្យបានចប់ចុងជាប់ដើម
៤-មានសិទ្ធក្នុងការសម្របសម្រួល នៅពេលក្លឹបចង់លក់ចេញ ឬដោះដូរកីឡាកររូបនេះទៅកាន់ក្លឹបផ្សេង
ជាការពិតសហព័ន្ធជាអ្នកបណ្ដុះបណ្ដាល ដោយប្រមូលពីបណ្ដាខេត្តឬក្រុង២៥ នាក់ជារៀងរាល់ឆ្នាំ ហើយការបណ្ដុះបណ្ដាលនេះ មានយុវជនខ្លះចំណាយពេលច្រើនរហូតដល់ ៤ឬ ៥ ឆ្នាំ ដូច្នេះបើគិតជាប្រាក់គឺមិនតិចឡើយ។ សម្រាប់យុវជនទាំង១២ នាក់នោះគឺមាន ជូ ស៊ីនទី, រី លាភផេង, សេង សម្បត្តិ, ស្រួច ជីវ័ណ្ណ, អ៊ឹម វីនុន, កយ សាលីម, តាំង ប៊ុនឆៃ, ភេម សៅសិញ, ឈឹម ពេជពន្លឺ, ជា សុខម៉េង, ទូច សរ៉ូត និង ធី លៀង៕