នឹកស្មានមិនដល់! ណូយ វណ្ណេត ទើបសារភាពថាបទមួយរបស់លោកកាលពី៣០ឆ្នាំមុន គឺពិបាកច្រៀងបំផុត

2021-01-28 03:15:26
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងសំឡេងពីរោះវ័យជ្រេ ណូយ វណ្ណេត បានបញ្ចេញកាយវិការ និងច្រៀងជាច្រើនបទដោយគ្មានឆាកប្រគំតន្ត្រីនៅក្នុងផ្ទះខ្លួនឯងតែម្ដង ដើម្បីជួយផ្សព្វផ្សាយលក់តុក្កតាឲ្យចៅស្រីបីនាក់។ លោក ជាអ្នកផ្សព្វផ្សាយលក់ផង និងច្រៀងបទពីរោះៗតាមសំណូមពររបស់អតិថិជនផង។

ក្នុងចំណោមបទដែលលោកច្រៀងតាមការសំណូមពររបស់អតិថិជននោះ គឺមានបទមួយ គឺបទ"ដកស្នេហ៍វិញចុះ"ដែលលោក សារភាពថាពិបាកស្រែកច្រៀងជាងគេ ហើយបទនោះមានអាយុកាល៣០ឆ្នាំហើយ ពោលគឺតាំងពីឆ្នាំ១៩៩១។ កាលណោះលោកបានថតបទនេះឲ្យផលិតកម្មសាយ័នតារា។

ណូយ វណ្ណេត៖"ខ្ញុំថតឲ្យគេកាលហ្នឹងពិបាកណាស់ ព្រោះបទដកស្នេហ៍វិញចុះនេះ...តឹងណាស់បងប្អូនៗ រើហ្វ្រាំងស្រែកអត់ចង់រួចទេ"។

បទ"ដកស្នេហ៍វិញចុះ" ដែលជាសំនៀងដើមរបស់លោក ណូយ វណ្ណេត នៅតែស្ថិតនៅក្នុងក្រអៅបេះដូងអ្នកស្ដាប់មួយចំនួនធំ ហើយបទនេះក៏មានតារាចម្រៀងជំនាន់ក្រោយលើកយកទៅច្រៀងដែរ គឺមានដូចជាលោក មាស សាលី និងលោក អនុស្សាវរីយ៍ នៃផលិតកម្មសាន់ដេ ជាដើម៕

អត្ថបទ៖ ជិន សុភ័ក្ដ្រ