Google កំពុងពិចារណាធ្វើតាម Apple ដែរ រឿងឲ្យសិទ្ធអ្នកប្រើ

2021-02-05 07:07:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ចាប់ផ្ដើមពី iOS 14.5, iPadOS 14.5 និង tvOS 14.5 តទៅ Apple នឹងទាមទារឲ្យអ្នកផលិតកម្មវិធីសុំការអនុញ្ញាតពីអ្នកប្រើប្រាស់ក្នុងការតាមដានសកម្មភាពរបស់ពួកគេនៅលើកម្មវិធី ឬនៅលើវិបសាយ។ អ្នកប្រើប្រាស់នឹងឃើញផ្ទាំងដែលមានផ្ដល់នូវជម្រើស "Allow Tracking” (អនុញ្ញាត) និង "Ask App not to Track” (មិនអនុញ្ញាត) នៅពេលបើកកម្មវិធីណា ដែលចង់តាមដានសកម្មភាពរបស់ពួកគេ។

បើផ្អែកតាម Mark Gurman និង Nico Grant នៃសារព័ត៌មាន Bloomberg បានឲ្យដឹងថា Google កំពុងពិចារណាលើវិធានការស្រដៀងគ្នានេះសម្រាប់ប្រព័ន្ធប្រតិបត្តិការ Android របស់ខ្លួន ប៉ុន្តែមិនតឹងរ៉ឹងដូច Apple ឡើយ។ ប្រភពនេះបានអះអាងថាវិធានការរបស់ Google ចំពោះ Android អាចស្រដៀងនឹងការផ្លាស់ប្ដូររបស់ Google ចំពោះ Cookies នៃកម្មវិធី Chrome ដែរ។

គួរដឹងថា Cookies គឺជាវិធីសាស្ត្រសម្រាប់វិបសាយអាចតាមដានសកម្មភាពរបស់អ្នកប្រើប្រាស់មិនថាពួកគេចេញពីវិបសាយនោះហើយក្ដី ដែលធ្វើបែបនេះគឺដើម្បីអាចផ្សព្វផ្សាយពាណិជ្ជកម្មបានចំគោលដៅ មានប្រសិទ្ធភាពខ្ពស់។ Google បានប្រកាសកាលពីដើមឆ្នាំ ២០២០ កន្លងទៅ អំពីផែនការលុបបំបាត់ចោល Cookies នេះ ដើម្បីផ្ដល់ឯកជនភាពដល់អ្នកប្រើ៕

ប្រភព៖ macrumors ប្រែសម្រួល៖ សុខហេង