អ្នកកាន់កាំភ្លើងខ្លី ក្នុងរូបថតដ៏ល្បីសម័យខ្មៅងងឹតជានរណា?
- 2021-02-08 15:21:40
- ចំនួនមតិ 0 | ចំនួនចែករំលែក 0
អ្នកកាន់កាំភ្លើងខ្លី ក្នុងរូបថតដ៏ល្បីសម័យខ្មៅងងឹតជានរណា?
ចន្លោះមិនឃើញ
ប្រិយមិត្តភាគច្រើនប្រាកដជាធ្លាប់ឃើញហើយ នូវរូបថតបុរសម្នាក់បង្ហាញសកម្មភាពស្រែកយ៉ាងខ្លាំង កំឡុងស្ថានភាពច្របូកច្របល់នៃថ្ងៃ ១៧ មេសា ឆ្នាំ១៩៧៥ ដែលជាពេលពួកខ្មែរក្រហមចូលកាន់កាប់រដ្ឋធានីភ្នំពេញ ហើយចាប់ផ្ដើមជម្លៀសប្រជាជនខ្មែរចេញពីក្រុង។
រូបថតនេះត្រូវបានថតដោយអ្នកកាសែតជនជាតិអាល្លឺម៉ង់ Christoph Froehder ហើយចុះផ្សាយនៅសារព័ត៌មាន AP។
តាមពិតបុរសនោះមិនមែនជាទាហានខ្មែរក្រហម ដូចអ្វីដែលបណ្ដាញអ៊ីនធឺណែតបានបង្ហាញនោះទេ នេះបើតាមអ្នកកាសែតអាមេរិកយកព័ត៌មានពីសង្គ្រាមនៅស្រុកខ្មែរសម័យទសវត្ស ១៩៧០ លោក Jim Laurie បានបង្ហោះនៅក្នុងបណ្ដាញសង្គមរបស់លោក ដោយលោកបានដកស្រង់សម្ដីមិត្តរួមការងាររបស់លោកឈ្មោះថា Jon Swain ដែលជាអ្នកកាសែតជនជាតិអង់គ្លេស រាយការណ៍បញ្ហាសង្គ្រាមនៅតំបន់ឥណ្ឌូចិន។
លោកបានសរសេរថា បុរសម្នាក់នោះឈ្មោះ ហែម គៀតតារា ដែលជាកូនប្រុសរបស់ឧត្ដមសេនីយ៍ក្នុងសម័យលន់ នល់ នេះបើតាមលោក Laurie។ លោកបានសរសេរថា បុរសរូបនេះមានអាយុ ២៩ឆ្នាំនៅសម័យនោះ បានទៅរៀនស្រុកបារាំង ចេះនិយាយបារាំងស្ទាត់ ហើយមានប្រពន្ធបារាំងទៀតផង។ លោក តារា មកភ្នំពេញវិញនៅឆ្នាំ១៩៧១។
អ្នកកាសែតអាមេរិកនោះបានសរសេរថា លោកដារាបានបង្ហាញឫកក្រអឺតក្រទម ហើយអួតគេឯងថា លោកវាយដាច់ភ្នំពេញ តែគ្នា ៣០០នាក់ ហើយគ្មានអ្នកស្លាប់នោះទេ។ យ៉ាងណាក៏ដោយ ក្រោយមក ពួកខ្មែរក្រហមបានចាប់លោក តារា ហើយប្រហារជីវិតនៅក្រៅក្រសួងព័ត៌មាន ជាមួយនឹងប្អូនប្រុសលន់ នល់ លោកលន់ ណុន នាយករដ្ឋមន្ត្រីសាធារណរដ្ឋខ្មែរចុងក្រោយបង្អស់លោក ឡុង បូរេត ព្រមទាំងឈ្លើយសឹកសង្គ្រាមជាង ៥០នាក់ទៀត៕
បកប្រែ និងកែសម្រួលពីការបង្ហោះរបស់លោក Jim Laurie អ្នកកាសែតអាមេរិកយកព័ត៌មានពីសង្គ្រាមនៅកម្ពុជា និងអ្នកនិពន្ធសៀវភៅ ឧទ្ធម្ភាគចក្រចុងក្រោយ៖ ២ ជីវិតនៅតំបន់ឥណ្ឌូចិន
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
