ធ្វើពិធីក្រុងពាលីថតរឿងសោះ ផ្អើលអ្នកចូលរួមដោយសារហ្វូងមនុស្ស និងសត្វដំរីធំៗពីរក្បាល

2021-02-19 06:50:08
ចំនួនមតិ 0 | ចំនួនចែករំលែក 0

ចន្លោះមិនឃើញ

គេកម្រឃើញពិធីក្រុងពាលីថតរឿងភាគ ឬរឿងខ្នាតធំណាដែលប្រើមនុស្សសម្ដែងទាំងហ្វូង ជាមួយសត្វដំរីធំៗពីរក្បាល ដើម្បីបង្ហាញជូនអ្នកចូលរួមទស្សនាណាស់។ ប៉ុន្តែនៅព្រឹកថ្ងៃទី១៩ ខែកុម្ភៈ ផលិតកម្មភូមិពេជ្រភាពយន្ត បានសហការជាមួយស្ថានីយទូរទស្សន៍ ភី អិន អិន បានបង្កើតភាពភ្ញាក់ផ្អើលនេះឡើង។

ផលិតកម្មភូមិពេជ្រភាពយន្ត បានលើកយកឈុតមួយក្នុងរឿង"មរណមាតា" ដែលកំពុងធ្វើពិធីក្រុងពាលីដើម្បីចាប់ផ្ដើមចេញថតនោះមកសម្ដែងជាក់ស្ដែងតែម្ដង ដោយយកបរិវេណស្ថានីយទូរទស្សន៍ ភី អិន អិន ស្ថិតនៅសង្កាត់ព្រែកតាសេក ខណ្ឌជ្រោយចង្វា។ ឈុតនេះ គឺជាឈុតដែលព្រះរាជា ត្រាស់បង្គាប់ឲ្យសេនាទៅនាំយកមហេសីដែលជានាងមរណមាតា ចូលមករស់នៅក្នុងវាំង។ ក្នុងដំណើរទៅទទួលនាងមរណមាតានេះ គឺព្រះរាជា ប្រើដំរីជាយានជំនិះ អមដោយអាមាត្យ សេនា និងអ្នកបម្រើប្រុសស្រីដើរហែហមជាច្រើននាក់។

អ្នកគ្រប់គ្រងកម្មវិធីផ្សាយរបស់ភី អិន អិន អ្នកស្រី ទូច បុប្ផា ឲ្យដឹងថា "មរណមាតា" គឺជាខ្សែភាពយន្តបុរាណខ្មែរមួយក្នុងចំណោមរឿងបុរាណខ្មែរមួយចំនួនទៀតដែលទូរទស្សន៍អ្នកស្រីទទួលបានសិទ្ធិពីក្រសួងវប្បធម៌ និងវិចិត្រសិល្បៈ ដើម្បីផលិតជារឿងភាគកាលពីឆ្នាំ២០២០។ ឈុតខ្លះក្នុងរឿង"មរណមាតា" បានថតតាំងពីពាក់កណ្ដាលខែមករា ឆ្នាំ២០២១ ហើយគ្រោងនឹងថតបញ្ចប់ទាំង៤០ភាគនៅដំណាច់ខែមិថុនា ឆ្នាំ២០២១ ខាងមុខ។

ខ្សែភាពយន្តភាគខ្មែររឿង"មរណមាតា" ដែលនឹងចាក់បញ្ចាំងនៅលើកញ្ចក់ទូរទស្សន៍ ភី អិន អិន នេះ គឺជាការជួបគ្នាលើកទី២ របស់តួអង្គឯកប្រុស លី សុខគឹមសាន្ដ ហៅប្រុសខួច ជាមួយនឹងកញ្ញា ឈាង ហ៊ួយឡេង ហៅចែឡេង។ ក្រៅពីតារាទាំងពីរដួងក៏មានតារាល្បីជាច្រើនទៀតដែរដែលនឹងចូលរួមសម្ដែងគឺមានដូចជា៖ លោក ទេព រិនដារ៉ូ កញ្ញា អ៊ឹង និមល អ្នកនាង ស្វែង សុជាតា លោក ឬទ្ធី យ៉ាន និងកញ្ញា ហ្វាហ្វា ជាដើម៕