មកស្គាល់អតីតអ្នកប្រដាល់គុនខ្មែរ ៣រូប ធ្លាប់ធ្វើឲ្យកក្រើក និងឈ្នះខ្សែក្រវាត់ពិភពលោក

2021-03-22 03:30:15
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃនេះ Sabay នាំបងប្អូនអ្នកគាំទ្រប្រដាល់ងាកទៅអតីតកាលបន្តិចរំលឹកអនុស្សាវរីយ៍អតីតជើងខ្លាំងគុនខ្មែរពីមុនដែលធ្លាប់ធ្វើឲ្យកក្រើកសង្វៀន និងធ្លាប់ឈ្នះខ្សែក្រវាត់ពិភពលោកជូនកម្ពុជានាពេលកន្លងទៅ។ កីឡាករ៣រូបនោះរួមមាន អតីតកែងឆេះជង្គង់ហោះ អេ ភូថង ដៃមហាទម្ងន់ វ៉ន វីវ៉ា និងអ្នកលេងស្នៀតជង្គង់ មាស ចន្ថា។

លោក អេ ភូថង ពេលឈ្នះខ្សែក្រវាត់ពិភពលោក

**ទី១ លោក អេ ភូថង**

អតីតជើងខ្លាំងរបស់កម្ពុជាដែលស្ទើរពេញផ្ទៃប្រទេសទៅហើយគេស្គាល់ពីកេរ្តិ៍ឈ្មោះ និងសមត្ថភាពប្រកួតលោក អេ ភូថត នាអំឡុង ១៥-២០ឆ្នាំមុន។ កីឡាករល្អគ្រប់ក្បាច់រូបនេះមានប្រវត្តិប្រកួតដណ្ដើមខ្សែក្រវាត់ពិភពលោកចំនួន ២ដងនៅកម្ពុជាអំឡុងឆ្នាំ ២០០២ ជាកីឡាករ Faitsal Zakariya របស់ប្រទេសសូដង់។ ការដណ្ដើមលើកទី១ របស់លោក អេ ភូថង មិនបានសម្រេចទេដោយភ្លាត់សន្លប់ទៀតផង។ ប៉ុន្តែលើកទី២ ឪពុករបស់ ម៉ឺន មេឃា រូបនេះបានវ៉ៃឲ្យកីឡាករ Faitsal ត្រូវអាជ្ញាកណ្ដាលរាប់ដល់ ៨ ក្នុងទឹក៤ យ៉ាងណាការប្រកួតនៅតែបន្តរហូតបញ្ចប់ពេញ៥ទឺកជ័យជម្នះបានមកកម្ពុជានៅពេលនោះ។ គ្រានោះដែរកីឡាករល្អពុះកែងជើងរបស់សូដង់ ខាងលើ ក៏យល់ស្រប និងបានអបអរចំពោះជ័យជម្នះ និងការគ្រង់ខ្សែក្រវាត់របស់លោក អេ ភូថង ផងដែរ។

លោក វ៉ន វីវ៉ា ពេលឈ្នះខ្សែក្រវាត់ពិភពលោក

ទី២ លោក វ៉ន វីវ៉ា

អតីតអ្នកលេងកណ្ដាប់ដៃរូបនេះក៏ល្បី និងមានសមត្ថភាពខ្លាំងមិនធម្មតាដែរជាពិសេសកណ្ដាប់ដៃមហាទម្ងន់របស់គេតែម្ដង។ អ្នកប្រដាល់ដើមកំណើតពីខេត្តកំពង់ចាមម្នាក់នេះក៏ធ្លាប់សាងកេរ្តិ៍ឈ្មោះល្បីល្បាញផងដែរជាពិសេសលើសង្វៀនទូរទស្សន៍ CTN ដែលដឹកនាំផ្នែកកីឡាដោយលោក ម៉ា សេរី កន្លងទៅ។ គេនៅចាំមិនភ្លេចឡើយអំឡុងឆ្នាំ ២០០៨ វ៉ន វីវា បានប្រកួតដណ្ដើមខ្សែក្រវាត់ពិភពលោក ISKA លើកីឡាករ Alban Ahmeti ជនជាតិអាល្លឺម៉ង់ បានសម្រេចនៅ CTN។ អ្នកលេងគុនខ្មែររូបនេះក៏បានការពារខ្សែក្រវាត់របស់ខ្លួនពីការដណ្ដើមរបស់ Ben Barwise ជនជាតិ អង់គ្លេសអំឡុង ឆ្នាំ ២០១១ បានសម្រេចនៅ CTN រក្សាទុកដល់សព្វថ្ងៃនេះ។

លោក មាស ចន្ថា ពេលឈ្នះខ្សែក្រវាត់ពិភពលោក

ទី៣ លោក មាស ចន្ថា

អតីតអ្នកប្រដាល់ល្អជង្គង់រូបនេះពីមុនមានកេរ្តិ៍ឈ្មោះខ្លាំង និងធ្លាប់ប៉ះកីឡាករល្អៗជំនាន់នោះស្ទើរអស់ទៅហើយ។ អ្នកលេងគុនខ្មែររូបនេះក៏ធ្លាប់ឈ្នះខ្សែក្រវាត់ពិភពលោក ១គ្រឿង ដែរអំឡុងឆ្នាំ ២០០៨ ដោយប្រកួតដណ្ដើមបានសម្រេចលើកីឡាករ Frankie Hudders ។ ប៉ុន្តែកីឡាករកំពុងរស់នៅប្រទេសអូស្ត្រាលី ខាងលើនេះត្រូវបាត់បង់ខ្សែក្រវាត់ ISKA នេះវិញនៅឆ្នាំ២០១១ បន្ទាប់ពីប្រកួតការពារមិនបានសម្រេចជាមួយកីឡាករ Tim Thomas ដែលកាលនោះរៀបចំដោយស្ថានីយទូរទស្សន៍ CTN ៕

វីដេអូប្រកួត៖