ក្រៅពីធ្លាប់ធ្លាក់ការប្រកួត ៥០ដង តើ HyunA តារាទោលជោគជ័យរបស់ K-Pop រូបនេះមានរឿងអ្វីទៀតនៅពីក្រោយ?

2021-03-26 06:58:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតចាប់ពីឆ្នាំ ២០០៦មក HyunA បានបណ្ដែតខ្លួនលើវិថីសិល្បៈប្រកួតប្រជែងយ៉ាងខ្នះខ្នែង ដើម្បីសាងកេរ្តិ៍ឈ្មោះឲ្យបានខ្ពស់ត្រដែត ហើយតបនឹងការខិតខំប្រឹងប្រែងទាំងឡាយ ពេលនេះនាងត្រូវបានលើកជាតារាទោលនារីប្រចាំ K-Pop ដែលមានការកោតសរសើរស្ទើរពេញពិភពលោក។

ក្បាច់រាំរស់រវើក ជាមួយនឹងសមត្ថភាពរ៉េប និងច្រៀងពិតជាអាចជួយឲ្យនាងហក់ឡើងលឿន បូករួមនឹងភាពក្លាហានបង្កើតអ្វីថ្មីសម្រាប់អ្នកគាំទ្រទៀត ផ្សំជាហេតុផលចម្បងមិនអាចបដិសេធបានហេតុអ្វីនាងជោគជ័យដូចពេលនេះ។

ក្រៅពីភាពល្បីល្បាញទាំងព្រមរបស់ HyunA ដូចនេះយើងទៅដឹងបន្ថែមនូវចំណុចផ្សេងៗពីតារាស្រីរូបនេះទាំងអស់គ្នា៖

១. Kim Hyun Ah ជាឈ្មោះពេញរបស់នារីម្នាក់ដែលកើតនៅថ្ងៃទី ០៦ ខែមិថុនា ឆ្នាំ១៩៩២ នៅខេត្ត Jeolla ប្រទេសកូរ៉េខាងត្បូង។

២. ក្នុងគ្រួសារនាងមានប្អូនប្រុស ២នាក់ ហើយម្ដាយឪពុកបានលែងលះគ្នា។

៣. បំណងប្រាថ្នាពីតូចគឺចង់ក្លាយជាតារាសម្ដែងទេ ប៉ុន្តែនាងបានបោះបង់ក្ដីស្រមៃនេះចោល បន្ទាប់ពីធ្លាក់ការប្រកួតជាច្រើនដងពេក (ដល់ទៅ៥០ដង) កាលពីអាយុ ៧ឆ្នាំ។ ក្រោយមកពេលធំពេញវ័យច្រើន នាងក៏មានទំនោរទៅខាងការរាំ ពេលរៀនថ្នាក់វិទ្យាល័យ។

៤. បទពិសោធកាលពីជីវិតជាអ្នកហ្វឹកហាត់ចំណូលថ្មី (Trainee) ក៏នាងហែលឆ្លងច្រើនដែរ តាំងពីហាត់នៅផលិតកម្ម SM, Cube និង JYP។

៥. មុនក្លាយជាសមាជិកពេញមុខរបស់ 4Minute តារាស្រីរូបនេះក៏ធ្លាប់ជាសមាជិករបស់ក្រុម Wonder Girls ដែរ តែក្នុងរយៈពេលខ្លីប៉ុណ្ណោះគឺ ពីឆ្នាំ ២០០៧-២០០៨។ មូលហេតុធំដែលបណ្ដាលឲ្យនាងសម្រេចដើរចេញពីក្រុម ក៏ព្រោះឪពុកម្ដាយបារម្ភខ្លាំងពីសុខភាពរបស់នាង។

កាលនៅជាក្រុម Wonder Girls

៦. ក្រៅពីភាសាកូរ៉េដែលជាភាសាកំណើត HyunA ក៏អាចនិយាយភាសាជប៉ុន អង់គ្លេស និងចិនបានខ្លះដែរ។

៧. និយាយពីចរិតវិញ តារាស្រីកើតឆ្នាំ ១៩៩២រូបនេះជាមនុស្សសុទិដ្ឋិនិយម ប្រឹងប្រែងធ្វើការ គួរឲ្យស្រឡាញ់។

៨. បើទំនេរនាងចូលចិត្តធ្វើម្ហូប មើលរឿង ថតរូប និងពូកែបំផុតខាង Selfie។

៩. HyunA មានសាក់ច្រើនកន្លែងណាស់ (បើគិតត្រឹមឆ្នាំ ២០១៩ នាងមានសាក់សរុប ១៨) ប៉ុន្តែមួយក្នុងចំណោមនោះមានអត្ថន័យចាក់ដោតជាងគេ ព្រោះនាងសាក់ជាឃ្លាជូនសម្រាប់ម្ដាយ «My mother is the heart that keeps me alive»។

១០. HyunA ធ្លាប់បានបង្ហើបបេះដូងពិតថា ប្រភេទបុរសដែលនាងប៉ងចង់បានជាគូ សូមឲ្យជាអ្នកដែលអាចទទួលយកគុណវិបត្តិគ្រប់យ៉ាង និងទំហំបេះដូងនៃចិត្តស្រឡាញ់របស់នាង។ ជាក់ស្ដែងមកទល់ពេលនេះ នាងរកបានម្ចាស់បេះដូងពិតប្រាកដហើយនោះគឺ E’Dawn។ គូស្នេហ៍មួយនេះតែងផ្ដល់នូវការយកចិត្តទុកដាក់ បារម្ភ លើកទឹកចិត្ត និងនៅក្បែរគ្នាគ្រប់ពេល ធ្វើឲ្យមនុស្សមិនតិចទេលួចច្រណែននឹងភាពស្មោះស្ម័គ្ររបស់អ្នកទាំង ២៕