អ្ហា៎ក...ខាតដល់ម្ល៉ឹង! ស្វែង សុជាតា របូតប្រាក់ខ្ទង់ម៉ឺនដុល្លារ ឥឡូវប្រកាសលក់ផ្ទះបន្ទាន់ដើម្បីស្ដារស្ថានភាព

2021-04-07 07:03:08
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងស្រីវ័យជ្រេ ស្វែង សុជាតា អស់ភាពអៀនខ្មាសនឹងពាក្យថា"អ្នកសិល្បៈជំពាក់បំណុលគេជុំទិស" បន្ទាប់ពីនាងប្រកាសលក់ផ្ទះ១ល្វែងជាបន្ទាន់ក្នុងតម្លៃ៦ម៉ឺនដុល្លារ ដើម្បីដោះបំណុលធនាគារ និងបង្កើតភាគហ៊ុនរកស៊ីថ្មីជាមួយមិត្តភ័ក្ដិក្នុងអាជីវកម្មលក់ផលិតផលថែសម្ផស្ស។

អ្នកនាង ស្វែង សុជាតា បានប្រាប់ Sabay នៅរសៀលថ្ងៃទី៧ ខែមេសា នេះថា ស្ថានភាពជីវភាព និងការរកស៊ីរបស់នាងចំនួន២កន្លែង កាន់តែខាតឡុងចុងងើបលែងរួចក្នុងរយៈពេល៣ខែដើមឆ្នាំ២០២១ ដោយសារបញ្ហាជំងឺកូវីដ-១៩។នាងថា ដើមទុនខ្ទង់ម៉ឺនដុល្លារ បានបាត់ទាំងស្រុង ខណៈដែលចំណូលពីអាជីពសិល្បៈស្ទើរ១០០% ក៏បាត់បង់ដែរនោះ ប៉ុន្តែនាងកាតព្វកិច្ចបង់ធនាគារផង និងខំរើបម្រាស់ចេញពីជីវភាពខ្វះខាតនេះ តាមរយៈបង្កើតមុខរបរថ្មីជាមួយមិត្តភ័ក្ដិ។

ស្វែង សុជាតា៖"អ្នកខ្លះឆាតមកសួថាប្រកាសលក់ផ្ទះមិនចេះខ្មាសគេទេអី? ខ្ញុំមិនរវល់...ហើយមានរឿងអីត្រូវខ្មាសខ្ញុំមានផ្ទះលក់ដើម្បីយកលុយធ្វើដើមរកស៊ី។ បើលក់ដាច់...ខ្ញុំយកលុយនេះទៅបង់ធនាគារខ្លះ និងចូលហ៊ុនជាមួយមិត្តភ័ក្ដិនាំចូលផលិតពីប្រទេសថៃវិញម្ដងៗ"។

បញ្ហាជំងឺកូវីដ-១៩ អូសបន្លាយជាង១ឆ្នាំមកនេះ មានសិល្បករ-សិល្បការិនីខ្មែរមិនតិចទេដែលត្អូញត្អែររឿងបាត់ប្រាក់ចំណូល និងជួបបញ្ហាសេដ្ឋកិច្ចគ្រួសារ។ ដោយឡែកអ្នកនាង ស្វែង សុជាតា ទើបទម្លាយរឿងលក់ផ្ទះដើម្បីដោះបំណុលគេ ដោយសារទ្រាំទ្រនឹងការប៉ះពាល់ផ្នែកសេដ្ឋកិច្ចកើតចេញពីជំងឺកូវីដ-១៩ ទៀតលែងបាន។

កាលពីព្រឹកមិញតារាសម្ដែង ស្វែង សុជាតា បានប្រកាសលក់ផ្ទះ១ល្វែងបន្ទាន់ ដែលមានទីតាំងនៅក្នុងបុរីឈឹម ឈាងហាក់ អូរដឹម ផ្លូវចូលក្បែររបងរោងចក្រ សាន់ នី។ នាងបញ្ជាក់ថា ផ្ទះនេះមានប្លង់រឹង ដោយបានបានបង់រំលស់ជាមួយបុរីដាច់អស់ហើយ៕

អត្ថបទ៖ ជិន សុភ័ក្ដ្រ