៥ឆ្នាំក្រោយ 4Minute បំបែក តើសមាជិកទាំង ៥ វិវត្តទៅជាយ៉ាងណាខ្លះហើយបច្ចុប្បន្ន?

2021-05-03 02:54:35
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងពីក្រុម 4Minute សម្រេចបំបែកក្រុមកាលពីខែមិថុនា ឆ្នាំ២០១៦មក គិតមកដល់ពេលនេះវាមានរយៈពេល ៥ឆ្នាំហើយ។ ក្រុមចម្រៀងដែលធ្លាប់ជាគ្រាប់ពេជ្ររបស់ផលិតកម្ម Cube ពេលនេះ តើសមាជិកទាំងអស់នៅទីណា ទៅជាយ៉ាងណាទៅហើយនាពេលបច្ចុប្បន្ននេះ?

១. Jihyun

Son Jihyun គឺជាអតីតមេក្រុម 4Minute ជាអ្នករាំនាំមុខក្រុម និង Visual ប្រចាំក្រុម។ បន្ទាប់ពីបំបែកក្រុមហើយ Jihyun បានត្រឡប់មកកាន់ពិភពសម្ដែងវិញម្ដង ដោយប្រឡូកពេញទំហឹងតែម្ដង។

នាងបានចុះកុងត្រាជាមួយនឹងផលិតកម្ម Artist Company នឹងបានសម្ដែងរឿងភាគជាច្រើនដូចជា «Strongest Deliveryman», «Grand Prince», «When the Devil Calls Your Name» និង «Love is Annoying, But I Hate Being Lonely» ក៏ដូចជាភាពយន្តខ្នាតធំ «Trade Your Love» ផងដែរ។

២. Gayoon

កាលពីនៅក្នុងក្រុម នាងទទួលនាទីខាងច្រៀង ដូច្នេះពេលនោះ Gayoon ត្រូវផ្ដោតខ្លាំងតែលើការច្រៀងមួយមុខគត់សំខាន់ជាងគេ។

ប៉ុន្តែក្រោយក្រុមរំសាយ នាងក៏បានចាប់យកអាជីពជាតារាសម្ដែងវិញ ដោយធ្លាប់បានបង្ហាញសា្នដៃក្នុងរឿង «The Drug King» និង «Search Out» ជាដើម។

៣. Jiyoon

ពេលនេះអតីតសមាជិកពូកែរ៉េបរបស់ 4Minute រូបនេះ ក្លាយខ្លួនមកជា «Jenyer» វិញហើយ បន្ទាប់ពីចេញពី Cube។ ដូចនេះនាងបានចូលផលិតកម្ម JS E&M ដើម្បីប្រែខ្លួនជាតារាទោល។

Jenyer ក៏បានចេញអាល់ប៊ុមទោលខ្លួនឯងដែរមាន «Day and Night», «Bad» និង «The Moment I Loved»។ ក្រៅពីនោះក៏នៅមានបទចម្រៀងល្បីៗចេញជាបន្តបន្ទាប់។

៤. HyunA

កាលពីនៅក្នុងក្រុមនាងគឺជា Main Dancer, Main Rapper និងជាតំណាងក្រុម ហើយក្រោយក្រុមបំបែកនាងក៏នៅបន្តកុងត្រាជាថ្មីជាមួយផលិតកម្ម Cube ដែរ ក្នុងនាមជាតារាទោល និងចូលរួមជាមួយក្រុមតូច Triple H ជាមួយ Hui និង Dawn។ ប៉ុន្តែនាងក៏បានចាកចេញ ក្រោយដំណឹងទាក់ទងស្នេហារវាងនាង និង Dawn បែកធ្លាយ ហើយស្រាប់តែត្រូវមានបញ្ហាជាមួយក្រុមហ៊ុន ជាហេតុនាងត្រូវបញ្ចប់កុងត្រា។

ទោះជាយ៉ាងណា HyunA នៅតែមានសមត្ថភាពស្ដារភាពល្បីល្បាញបានដដែល បើទោះបីនាងមានរឿងច្រើនក្នុងជីវិត ទាំងការបាក់ទឹកចិត្ត ទាំងបាត់បង់ជំនឿចិត្ត រហូតធ្វើឲ្យនាងធ្លាក់ចុះក្នុងសភាពលំបាក តែនាងនៅតែស៊ូជម្នះបាន រហូតរះចែងចាំជាថ្មីនៅពេលនេះ ជាពិសេសក្រោយពេលចូលមកជាតារារបស់ផលិតកម្ម P NATION របស់ PSY។ ចំណែកទំនាក់ទំនងស្នេហារវាងនាង និង Dawn នៅតែរឹងមាំដដែល។

៥. Sohyun

ចំណែកសមាជិកពៅគេក្នុងក្រុមនេះវិញ ក៏បានចាប់យកអាជីពជាតារាសម្ដែងដែរ ក្រោយ 4Minute រំសាយ។ ដោយសារជានិស្សិតចាប់យកមុខជំនាញផ្នែកសម្ដែងស្រាប់ផង ដូចនេះនាងចង់ប្រើប្រាស់អ្វីដែលនាងរៀនសូត្រ នងតបតាមការស្រឡាញ់ ចូលប្រឡូកក្នុងវិស័យនេះតែម្ដង។