ម៉ុន វ៉ាន់ដា ទទួលស្គាល់ថា ចាប់ផ្ដើមហាត់បាល់វ័យច្រើន ធ្វើឲ្យសមត្ថភាពខ្វះខាតច្រើន

2021-05-06 07:54:18
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតខ្សែប្រយុទ្ធបឹងកេត និងទ័ព ម៉ុន វ៉ាន់ដា ទទួលស្គាល់ថា សមត្ថភាពរបស់ខ្លួននៅមានចំណុចខ្វះខាតច្រើន នេះដោយសារខ្លួនយល់ថា ការចាប់ផ្ដើមហ្វឹកហាត់បាល់ទាត់ដំបូងមានវ័យច្រើនទៅហើយ។

ស្ទើរតែគ្រប់បណ្ដាប្រទេសនៅលើពិភពលោក កីឡាករដែលទទួលបានជោគជ័យច្រើនតែជាកីឡាករដែលចាប់ផ្ដើមហ្វឹកហាត់ពីតូច។ ប៉ុន្តែសម្រាប់ វ៉ាន់ដា បានចាប់ផ្ដើមហ្វឹកហាត់បាល់ទាត់ដំបូងនៅវ័យ១៨ឆ្នាំទៅហើយ ជាមួយយុវជនទ័ពកាលឆ្នាំ២០១៥ ដែលវ័យនេះហាក់ទទួលបានការបណ្ដុះបណ្ដាលតិចនាំឲ្យសមត្ថភាពរបស់ខ្លួននៅមានចន្លោះខ្វះខាតច្រើន។

ទាក់ទងចំណុចនេះ ខ្សែប្រយុទ្ធរបស់ព្រះខ័នរាជស្វាយរៀងរៀបរាប់បែបនេះថា « និយាយទៅសម្រាប់ខ្ញុំការហ្វឹកហាត់វាចាប់ផ្ដើមរាងយឺតតិចហើយ។ ខ្ញុំមកភ្នំពេញក្រោយចប់វិទ្យាល័យវ័យ១៨ ឆ្នាំទៅហើយ ពេលនោះចូលហាត់បាល់ទាត់ជាមួយទ័ពហាត់បានមួយរយៈពេលខ្លីក៏ឡើងលេងឈុតធំ។ និយាយទៅបងយើងលេងនៅខេត្តមែនតែការហ្វឹកហាត់យើងនៅខ្វះខាតច្រើន។ ដូច្នេះនាំឲ្យបច្ចុប្បន្នមានការប្រជែងកៅអី១១នាក់ដំបូងក៏ពិបាកដែរ ព្រោះអីសមត្ថភាពយើងនៅខ្វះខាតច្រើនទាំងបច្ចេកទេស និងបទពិសោធបង»។

រំលឹកថា កន្លងមកលោក ឡុង រចនា អតីតអ្នកចាត់ការទ័ព ក៏ធ្លាប់បានរៀបរាប់ផងដែរថា ស្រុកគេកីឡាករចាប់ផ្ដើមហ្វឹកហាត់តាំងពីដើរមិនទាន់ត្រង់ផ្លូវ និយាយទៅអាយុ៥ឬ៦ឆ្នាំគេចូលសាលាបាល់ទាត់ហើយ នេះជាដើមហេតុនាំឲ្យវិស័យបាល់ទាត់ស្រុកគេលឿនទៅមុខបែបនេះ៕