ប្រភពពីស្ថានទូតរុស្ស៊ីប្រចាំនៅប្រទេសឡាវបាននិយាយថា ការចរចារកំពុងដំណើរការទាក់ទងនឹងការផ្គត់ផ្គង់វ៉ាក់សាំងSputnik V របស់ប្រទេសរុស្ស៊ីមកដល់ប្រទេសឡាវ។​​​

ប្រភពដដែលបាននិយាយទៀតថា ឥឡូវនេះមានការពិភាក្សានិងការចរចារវាងភាគីឡាវ និងភាគីរុស្ស៊ី ស្តីពីចំនួនវ៉ាក់សាំងដែលត្រូវផ្គត់ផ្គង់និងលក្ខខណ្ឌផ្សេងៗទៀតដូចជាផ្នែកខ្លះនៃវ៉ាក់សាំងនឹងត្រូវបានផ្តល់ជាជំនួយឥតសំណងពីរដ្ឋាភិបាលរុស្ស៊ី មកកាន់ប្រទេសឡាវ។

រហូតមកដល់ពេលនេះរដ្ឋាភិបាលរុស្ស៊ីបានផ្តល់វ៉ាក់សាំងចំនួន ១ពាន់ដូស ដែលបុគ្គលិកសុខាភិបាលឡាវ បានចាក់ឱ្យមនុស្សចំនួន ៥០០ នាក់ (ម្នាក់ចំនួន២ដូស) ។ វ៉ាក់សាំង Sputnik V បានចុះក្នុងបញ្ជីរួចរាល់ហើយនៅក្នុងប្រទេសឡាវ ដែលជាសញ្ញាមួយផ្តល់ភ្លើងខៀវ អាចធ្វើការប្រើប្រាស់បានដូចវ៉ាក់សាំងដទៃទៀត។

គួរឱ្យដឹងថា វ៉ាក់សាំងរុស្ស៊ីមួយនេះ ត្រូវបានចុះបញ្ជីប្រើប្រាស់នៅជាង ៦៥ ប្រទេសរួចទៅហើយ ដោយក្រុមហ៊ុនផលិត អះអាងថាប្រសិទ្ធភាពនៃវ៉ាក់សាំងក្នុងការការពារពីវីរុសកូវីដ១៩ មានរហូតដល់ទៅ ៩០% ជាង៕

ប្រភព៖ The Star   ប្រែសម្រួល ៖ សង្ហា