ហេតុអីខ្ញុំត្រូវធ្វើជានារីល្ងីល្ងើស្មោះស្នេហ៍ ដូចក្នុងចម្រៀងបែបនេះ?
- 2014-11-24 16:02:24
- ចំនួនមតិ 0 | ចំនួនចែករំលែក 0
ហេតុអីខ្ញុំត្រូវធ្វើជានារីល្ងីល្ងើស្មោះស្នេហ៍ ដូចក្នុងចម្រៀងបែបនេះ?
ចន្លោះមិនឃើញ
ខាងក្រោមនេះ គឺជាអត្ថបទស្នេហ៍មួយទៀត ដែលយុវតីម្នាក់បានផ្ញើមកកាន់ sabay កន្លងមកដើម្បីឲ្យប្រិយមិត្តអ្នកអានផ្ដល់ជាមតិយោបល់ ថាតើគួរសម្រេចចិត្តបែបណា?
… ពួកយើងបានស្គាល់គ្នាមិនយូរប៉ុន្មានក៏បង្កើតបានជាសេចក្ដី ស្រលាញ់ចំពោះគ្នាទៅវិញទៅមក ហើយការស្រលាញ់នោះ ក៏បានបង្កប់នូវអនុស្សាវរីយ៍ជាច្រើនសម្រាប់ខ្ញុំ ដែលមិនអាចបំភ្លេចបានរហូតដល់ពេលនេះ ទោះបីជាសេចក្ដីស្នេហានេះ មានរយៈពេលខ្លីក៏ដោយ។ តើខ្ញុំល្ងង់ ណាស់មែនទេដែលតែងតែគិតថា នឹងបានជួបគ្នាម្ដងទៀត ហើយសង្ឃឹមថា នឹងអាចចាប់ផ្ដើមឡើងវិញបាន?
ចាប់ តាំងពីពួកយើងបានបែកគ្នា រហូតដល់ពេលនេះ គឺមានរយៈពេល ៤ខែមកហើយ។ ប៉ុន្តែរាល់ អនុស្សាវរីយ៍ហាក់ថ្មីៗដូចម្សិលមិញ អីចឹង! រាល់ថ្ងៃ ទោះបីជាយើងនៅឆ្ងាយគ្នា ខ្ញុំតែងតែមានអារម្មណ៍ថា គាត់ហាក់រស់នៅជាមួយខ្ញុំដូចដើម ហើយរៀងរាល់រាត្រី ខ្ញុំតែងតែយល់សុបិនឃើញគាត់មិនលុះយប់ណាឡើយ។ នៅលើតុធ្វើការរបស់ខ្ញុំមានរូបថតពួកយើងទាំងពីរនាក់កាលទៅ ដើរលេងជាមួយគ្នាហើយរូបទាំងនោះ ក៏ជារូបថតចុងក្រោយផងដែរ។ គិតៗទៅ គួរឲ្យចង់សើចណាស់ គ្រប់បែបយ៉ាងគឺជាការគិត និងជាការរំពឹងទុករបស់ខ្ញុំតែម្នាក់ឯងប៉ុណ្ណោះ ព្រោះអ្វីដែលជាការពិត មិនអាចប្រឌិតបាននោះ គឺយើងបានចែកផ្លូវគ្នាទៅហើយ គេបាននៅជាមួយគូអនាគតរបស់គេយ៉ាងមានសេចក្ដីសុខ ដោយមិនដែលគិតថា មានមនុស្សម្នាក់កំពុងនឹកដល់គេនោះទេ។
នៅពេលខ្ញុំនឹកគាត់ ខ្ញុំតែងតែឆែក Profile Facebook របស់គាត់ ក្រែងបានឃើញគាត់ Check in នៅកន្លែងណាមួយ ឫមានរូបថត ដែលទើបនឹងថតថ្មីៗ។ ប៉ុន្តែគ្មានអ្វី ដែលជាការកត់សម្គាល់នោះទេ។ ខ្ញុំបានត្រឹមតែលួចមើលគាត់តាមមធ្យោបាយនេះប៉ុណ្ណោះ។ ខ្ញុំតែង តែបើកមើលរូបថត ទាំងអស់ ដែលយើងបានថតជាមួយគ្នា និង វីដេអូ ដែលគាត់បានចងក្រងសម្រាប់ទុកជាអនុស្សាវរីយ៍នៃសេចក្ដីស្នេហា របស់យើង នៅថ្ងៃខួបកំណើតរបស់ខ្ញុំ។ ខ្ញុំសុខចិត្តទិញសំបុត្រយន្តហោះទៅរកគាត់ បើទោះជាខ្ញុំមិនសូវស្គាល់ផ្លូវច្បាស់ក៏ដោយ។ សំណាងល្អ ខ្ញុំអាចរកកន្លែង គាត់ស្នាក់នៅដើម្បីបន្តការសិក្សានោះឃើញ។
ខ្ញុំឡើងទៅដល់មុខផ្ទះប៉ុន្តែខ្ញុំមិនហ៊ានគោះទ្វារនោះទេ គ្រាន់តែបាននិយាយពាក្យថា Happy Birthday ទាំងទឹកភ្នែកហើយក៏រត់ទៅចំណតឡានក្រុងដើម្បីត្រលប់ទៅសណ្ឋាគារ ម្នាក់ឯង។ នឹកឃើញចង់សើចណាស់ ខ្ញុំមិននឹកស្មានថា ខ្ញុំមានសេចក្ដីក្លាហាន ដោយសារតែមនុស្សម្នាក់មិនដែលគិតពីយើងសោះ ហើយរហូតហ៊ានឆ្លងប្រទេសទៅរកគេ ដើម្បីតែពាក្យជូនពរថ្ងៃខួបកំណើត នៅមុខផ្ទះរបស់គេ ទោះដឹងថា មិនអាចជួបហើយនៅតែព្យាយាម។
រូបតំណាង
រហូត ដល់ថ្ងៃគេត្រលប់មកប្រទេសវិញ ខ្ញុំនៅមានមុខរង់ចាំគេនៅប្រលានយន្តហោះទៀត។ ប៉ុន្តែបានត្រឹមអង្គុយមើលគេពីចម្ងាយ។ តាមពិតទៅខ្ញុំចង់ទៅជួបគេហើយប្រាប់គេថា ខ្ញុំនឹកគេខ្លាំងណាស់!!! តែខ្ញុំបានត្រឹមតែលួចមើលគេពីចម្ងាយហើយលួចយំក្នុងចិត្តតែ ម្នាក់ឯង ដោយសារខ្ញុំគ្មានសិទ្ធិទៅជួបគេទៀតនោះទេ ព្រោះយើងមិនត្រូវជាអ្វីនឹងគ្នាដូចកាលពីមុនឡើយ។ ខ្ញុំពិតជាពិបាករៀបរាប់ និងអធិប្បាយពីអារម្មណ៍របស់ខ្លួនខ្លាំងណាស់ ដែលបានត្រឹមអង្គុយមើលមនុស្ស ដែលខ្លួនស្រលាញ់ពីចម្ងាយ។
ខ្ញុំដឹងពេល អ្នកទាំងអស់គ្នាបានអានអត្ថបទនេះហើយ ពិតជាហួសចិត្តណាស់មែនទេ? ហើយប្រាកដជានិយាយថា៖ “ចាំបាច់អីធ្វើបែបនេះ?” ខ្ញុំក៏ដឹងដែរថា ហេតុអ្វីចាំបាច់ធ្វើបាបខ្លួនបែបនេះ?
នៅ ពេលអ្នកស្រលាញ់មនុស្សម្នាក់ពិតប្រាកដអ្នកនឹងយល់ពីអារម្មណ៍ បែបនោះ។ ទោះបីវាជារឿង ឆ្គួតក៏ដោយហេតុដែលខ្ញុំសរសេរវាឡើងគឺគ្រាន់ តែធ្វើឲ្យខ្លួនឯងធូរចិត្ត និងបានទទួលនូវការផ្តល់ជាមតិយោបល់ខ្លះៗពីប្រិយមិត្តអ្នកអាន។ តើខ្ញុំគួរធ្វើអារម្មណ៍បែបណាដើម្បីបំភ្លេចមនុស្សម្នាក់នោះ?
ខ្ញុំសូមជូនពរមិត្តអ្នកអានទាំងអស់មានសំណាងល្អ និងជួបនូវអ្វីដែលល្អៗ!
ចុចត្រង់នេះ ដើម្បីចូលទៅបណ្ដុំអត្ថបទស្នេហាជាច្រើនទៀត
ពីខ្ញុំ៖ SB
ប្រសិនបើ ប្រិយមិត្ត មានបញ្ហាស្នេហាដែលចង់ចែករំលែកដល់មិត្តអ្នកអានបានជាបទ ពិសោធន៍ ឬជួយជាយោបល់ក្នុងការដោះស្រាយសូមផ្ញើអត្ថបទរឿងរ៉ាវពិតរបស់ អ្នកមកកាន់ may.soklim@cidc.com.kh។ ឬអ្នកអាចទូរស័ព្ទមកយើង ០១៦ ៧៩២ ១៥១។ Sabay នឹងចុះផ្សាយជូន។
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
