៣ចំណុចបង្ហាញថា កម្ពុជាលេងយប់មិញល្អជាងប្រកួតមុនៗឆ្ងាយ

2021-06-08 01:43:25
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមជម្រើសជាតិកម្ពុជាបានប្រកួតចាញ់ក្រុមជម្រើសជាតិអ៊ឺរ៉ាក់៤-១ នៅប្រទេសបារ៉ែនកាលពីយប់មិញនេះ សម្រាប់ការប្រកួតជើងទី២ ជុំទី២ក្នុងពូល C នៃព្រឹត្តិការណ៍ជម្រុះបាល់ទាត់ពិភពលោកឆ្នាំ២០២២ ដែលនឹងធ្វើឡើងនៅប្រទេសកាតា។ យ៉ាងណាបើទោះកម្ពុជាបានប្រកួតចាញ់ក្រុមជម្រើសជាតិអ៊ឺរ៉ាក់៤-១មែន ប៉ុន្តែ៣ចំណុចនេះបង្ហាញថា កម្ពុជាខ្លាំងជាងប្រកួតមុនៗឆ្ងាយ។

១-ការបង្កើតឱកាស៖ ក្រុមជម្រើសជាតិកម្ពុជាបានបង្កើតឱកាសយ៉ាងល្អចំនូន៦លើក ហើយស៊ុតចំគោលដៅទាំងអស់នេះបើតាមស្ថិតិក្នុង LiveScore ។ ចំណុចនេះបង្ហាញថា កម្ពុជាបានរីកចម្រើនមួយកម្រិត បើធៀបនឹងកាលប្រកួតទល់ក្រុមបារ៉ែន ដែលចាញ់៨-០ និងគ្មានបាល់ស៊ុតចំគោលដៅសូម្បីមួយជើង។

កាលលេងទល់បារ៉ែន

២-ស្ថិតិគ្រប់គ្រងបាល់៖ ក្នុងស្ថិតិរបស់ LiveScore បានបង្ហាញថា កម្ពុជាមានស្ថិតិគ្រប់គ្រងបាល់រហូត៥២ភាគរយច្រើនជាងក្រុមខ្លាំងអ៊ឺរ៉ាក់ ដែលមានត្រឹម៤៨ភាគរយ។ ស្ថិតិនេះបើគិតមុនការប្រកួតគ្មានអ្នកណាជឿឡើយ ពីព្រោះប្រិយមិត្តបានដឹងហើយថា កម្ពុជាស្ថិតនៅកម្រិតណាហើយ អ៊ឺរ៉ាក់ស្ថិតនៅកម្រិតណា។ ប្រទេសអ៊ឺរ៉ាក់ជាជើងខ្លាំងក្នុងវិស័យបាល់ទាត់ដែលកំពុងប្រជែងកៅអីក្នុងពូលC នេះដើម្បីឡើងទៅជុំទី៣ ខណៈកម្ពុជាជាប្រទេសដែលបានធ្លាក់ចេញពីព្រឹត្តិការណ៍នេះហើយ។

៣-ការរកគ្រាប់បាល់ជាមួយក្រុមខ្លាំង៖ ក្នុងចំណោម៦ប្រកួតកន្លងមកប្រិយមិត្តបានឃើញហើយថា កម្ពុជារកបានតែមួយគ្រាប់ប៉ុណ្ណោះ ពោលកាលលេងស្មើហុងកុង១-១។ ប៉ុន្តែយប់មិញដែលជាប្រកួតទី៧ក្រុមគោព្រៃអាចរកបានគ្រាប់បាល់ទី២របស់ខ្លួនជាមួយក្រុមខ្លាំងអ៊ឺរ៉ាក់ ដែលប្រិយមិត្តស្ទើរតែមិនជឿឡើយ។

បច្ចុប្បន្នកម្ពុជាបានធ្លាក់ចេញពីព្រឹត្តិការណ៍ខាងលើនេះហើយ ខណៈប្រទេសកំពូលតារាងគឺ អ៊ឺរ៉ាក់ មាន១៤ពិន្ទុ អ៊ឺរ៉ង់មាន១២ពិន្ទុស្មើបារ៉ែន។ ស្របពេលកម្ពុជាស្ថិតនៅបាតតារាងមាន១ពិន្ទុ និងនៅសល់មួយប្រកួតត្រូវលេងទល់អ៊ឺរ៉ង់ ថ្ងៃទី១១ខែមិថុនា ឆ្នាំ២០២១វេលាម៉ោង៩:៣០ នាទីយប់៕