អ.ហ បញ្ចេញរូបភាពថ្មីៗប៉ុន្មានសន្លឹក ខណៈប្រិយមិត្តពោលថា អេតវីន អស់អនាគតគួរឲ្យសោកស្ដាយ

2021-06-24 00:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កងរាជអាវុធហត្ថរាជធានី បានបញ្ចេញរូបភាពលោក យិត មាសឧស្សាហ៍ ហៅ អេតវីន ថ្មីៗប៉ុន្មានសន្លឹកលើបណ្ដាញសង្គម ដោយលោកត្រូវបានដាក់ខ្នោះដៃ បណ្ដើរឡើងរថយន្តរបស់សមត្ថកិច្ចឆ្ពោះមន្ទីរឃុំឃាំង។

នេះជារូបភាពថ្មីបំផុតបរិយាយពីសាច់រឿងក្ដីក្ដាំ ចាប់តាំងពី អេតវីន បានរងបណ្ដឹងពីអតីតមិត្តស្រីឈ្មោះ សុទ្ធ បញ្ចាការ ក្រោយពីមានជម្លោះហិង្សាធ្វើឲ្យមិត្តស្រីរងរបួសពេញខ្លួនប្រាណកាលពីថ្ងៃទី ១៥ មិថុនា ២០២១។ រូបភាពទាំងនេះ ក៏ចេញទន្ទឹមនឹងលោក អេតវីន ត្រូវបានតុលាការបានចេញដីការបង្គាប់ឲ្យបញ្ជូនទៅឃុំខ្លួននៅពន្ធនាគារព្រៃស។

អេតវីន ពាក់អាវសដៃវែង ទឹកមុខស្រពោន ឈរសំឡឹងមកកាមេរ៉ាសមត្ថកិច្ច ដោយដៃទាំងពីរត្រូវបំពាក់ខ្នោះដៃរួចទៅហើយ។ ទិដ្ឋភាពនេះ ប្រិយមិត្តមួយចំនួនបានពោលថា អេតវីន អស់អនាគតគួរឲ្យសោកស្ដាយ។

លោក អេដវីន មានឈ្មោះពិត យិត មាសឧស្សាហ៍ អាយុ២៦ឆ្នាំ ត្រូវបានសមត្ថកិច្ចជំនាញ នៃការិយាល័យប្រឆាំងការជួញដូរមនុស្ស កងរាជអាវុធហត្ថរាជធានីភ្នំពេញ ឃាត់ខ្លួនកាលពីថ្ងៃទី ២០ មិថុនា បន្ទាប់ពីមានពាក្យបណ្តឹងរបស់ភាគីនារីរងគ្រោះជាអតីតសង្សារ គឺអ្នកនាង សុទ្ធ បញ្ចកា ពាក់ព័ន្ធករណី អំពើហិង្សាយ៉ាងព្រៃផ្សៃ បង្កឲ្យមានរបួសស្នាម ជាច្រើនកន្លែង និងបំផ្លិចបំផ្លាញនូវទ្រព្យសម្បត្តិ ក្នុងលំនៅដ្ឋានជនរងគ្រោះ ស្នាក់នៅ ដែលលំនៅដ្ឋាននេះ គឺជាកម្មសិទ្ធិរបស់ម្តាយបង្កើតជនរងគ្រោះ។

ក្រោយបញ្ចប់ការសាកសួរ នៅថ្ងៃទី ២៣ ខែឆ្នាំដដែល លោកត្រូវបានតុលាការចេញដីការបង្គាប់ឲ្យបញ្ជូនទៅកាន់ ពន្ធនាគារព្រៃស ដើម្បីឃុំខ្លួន តាមដីការលេខ៖ ៤៤៣៥ "ញ"ដ.ឃ.ដ ចុះហត្ថលេខា និងបោះត្រាដោយ ចៅក្រមស៊ើបសួរ សាន ប៊ុនធឿន។ លោក ត្រូវបានសាលាដំបូងរាជធានីភ្នំពេញ សម្រេចដាក់ឱ្យស្ថិត ក្រោមការពិនិត្យ ពីបទ អំពើហិង្សាប្រព្រឹត្តដោយសហព័ទ្ធ ឬអនិតិសង្វាសជន និងបទធ្វើឱ្យខូចខាតដោយចេតនា និងសម្រេចឱ្យឃុំខ្លួនជាបណ្តោះអាសន្ន។

តាមការឲ្យដឹងពីសមត្ថកិច្ច អ្នកនាង សុទ្ធ បញ្ចាការ ដែលជាដើមបណ្ដឹង បានព្យាយាមដកពាក្យបណ្ដឹងវិញ ដើម្បីដកបន្ទុកលើអតីតមិត្តប្រុស ដោយមិនទាមទារសំណងអ្វីទាំងអស់។ ប៉ុន្តែអ្វីៗបានហួសពេល ដោយនៅទីបំផុត តារាសម្តែងលោក អេដវីន ត្រូវបានបញ្ជូនចូលពន្ធនាគារព្រៃស បានសម្រេចនារសៀលថ្ងៃទី២៣ ខែមិថុនា ម្សិលមិញ៕