ស្វែង សុជាតា៖ ខាត១៩ម៉ឺនដុល្លារតិចណាស់ តែខ្ញុំមានទ្រព្យ១ទៀតក្បែរជើងភ្នំមានតម្លៃលើសនេះរាប់សិបដង

2021-08-10 08:33:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្រុកៗអ្នកស្រុកមើលងាយ រលាស់គូទខ្ចាយមានអោតមានភ័ន្ដ" នេះគឺជាសុភាសិតខ្មែរបានពោលសំដៅដល់មនុស្សដែលមើលពីក្រៅទៅមឹះៗមិនចេះ ឬគ្មានទ្រព្យអ្វីសោះ តែស្រាប់នៅថ្ងៃមួយធ្វើឲ្យគេស្រឡាំងកាំងនឹកស្មានមិនដល់ពីសមត្ថភាពរបស់ខ្លួន។ សុភាសិតខ្មែរនេះ ហាក់ត្រូវនឹងស្ថានភាពរបស់តារាសម្ដែងស្រីវ័យជ្រេ ស្វែង សុជាតា ខ្លាំងណាស់។

រយៈពេលជាង២ឆ្នាំ នៃការអូសបន្លាយវិបត្តិជំងឺកូវីដ-១៩ គេឃើញអ្នកនាង ស្វែង សុជាតា នៅតែតត្រុកដើរសម្ដែង និងពពាយនាយលក់ផ្ទះដើម្បីបង់ធនាគារ និងបង្កើតដើមទុនរកស៊ីជាថ្មីដោយមិនខ្វល់នឹងពាក្យពេបជ្រាយ ឬមើលងាយពីមិត្តភ័ក្ដិមួយចំនួនឡើយ ហើយនៅពេលនេះនាងបានធ្វើឲ្យមហាជនភ្ញាក់ផ្អើលដោយបង្ហាញពីទ្រព្យសម្បត្តិរបស់ខ្លួន។

អ្នកនាង ស្វែង សុជាតា ប្រាប់Sabay នៅរសៀលថ្ងៃទី១០ ខែសីហា នេះថា រូបនាង និងមិត្តភ័ក្ដិពីរ-បីនាក់ កំពុងសម្រាកពីអាជីពថតមួយរយៈ ហើយលម្ហែនៅលើដីចម្ការរបស់នាង១កន្លែងក្បែរជើងភ្នំ ស្ថិតនៅភាគខាងលិចប្រទេសកម្ពុជា។ នាងថា ធ្លាប់ចំណាយលុយចំនួន១៩ម៉ឺនដុល្លារ ដើម្បីប្រែក្លាយដីចម្ការនេះឲ្យទៅជារីហ្សត ឬតំបន់ទេសចរណ៍ធម្មជាតិ ប៉ុន្តែគម្រោងនេះមិនដើរដោយសារបញ្ហាជំងឺកូវីដ-១៩។

ស្វែង សុជាតា៖"ខ្ញុំខាតអស់១៩ម៉ឺនដុល្លារលើវា(ចម្ការ)! តែខ្ញុំជាមួយដីសម្រាប់ធ្វើរីហ្សតនេះមានតម្លៃលើសការខាតបង់ហ្នឹងរាប់សិបដង។ ខ្ញុំអត់ទាន់ហ៊ានបង្ហាញទេ ព្រោះខ្លាចគេថាខ្ញុំអួត...តែខ្ញុំចង់ប្រាប់ថាអីចេះ មនុស្សដែលមិនស្មោះត្រង់នឹងខ្ញុំ ខ្ញុំតែងតែប្រាប់គេថាក្រោយលែងប្ដីខ្ញុំគ្មានសល់អ្វីទាំងអស់ តែតាមពិតខ្ញុំមានចម្ការ និងទ្រព្យមួយចំនួនទៀត"។

រយៈពេល២ឆ្នាំចុងក្រោយនេះតារាសម្ដែង ស្វែង សុជាតា បានជួបរឿងអកុសលក្នុងជីវិតផ្ទួនៗ ដោយថ្មីៗនេះនាង និងស្វាមីដែលជាគ្រូថ្នាំខ្មែរម្នាក់ធ្លាប់រួមរស់ជាមួយគ្នាជាប្ដី-ប្រពន្ធរយៈពេល៦ឆ្នាំមកហើយនោះបានលែងលះគ្នា ហើយរឿងមួយទៀត គឺនាងត្រូវផុងខ្លួនចំណាយលុយចំនួន១៩ដុល្លារដើម្បីបង្កើតរីហ្សតតែមិនបានដំណើរការ។ វិបត្តិនេះ បានធ្វើឲ្យនាងបង្ខំចិត្តពពាយនាយលក់ផ្ទះបង់ធនាគារ និងទុកខ្លះសម្រាប់ធ្វើទុនរកស៊ីខាងគ្រឿងសម្អាងវិញម្ដង។

ទោះជាយ៉ាងណាផ្ទះល្វែងនៅម្ដុំផ្សារអូរដឹម ជាយរាជធានីភ្នំពេញដែលនាងពពាយនាយលក់ក្នុងតម្លៃ៦ម៉ឺនដុល្លារនោះ មិនទាន់ដាច់នៅឡើយទេ ខណៈដែលនាងថាមានមិត្តភ័ក្ដិខ្លះបានមើលងាយនាងដោយឃើញនាងខាតបង់ប្រាក់យ៉ាងសន្ធឹក ហើយត្រូវជួបរឿងលែងលះជាមួយប្ដីទៀតនោះ៕

អត្ថបទ៖ ជិន សុភ័ក្ដ្រ