ផ្លូវការហើយ! ខ្សែប្រយុទ្ធ ABEE NDJOO ផ្ទេរទៅកាន់បឹងកេត

2021-08-19 07:46:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបបាល់ទាត់ អាស៊ី អឺរ៉ុប យូណាយធីត បានប្រកាសពីការផ្ទេរកីឡាករ ABEE NDJOO HURBERT ទៅកាន់ក្លឹបបាល់ទាត់បឹងកេតហើយនៅរសៀលថ្ងៃនេះ។

ជុំវិញការផ្ទេរនេះលោក សុក វាសនា គ្រូបង្គោលក្លឹបអាស៊ីអឺរ៉ុបបានបង្ហាញការសោកស្ដាយដែរ ប៉ុន្តែនេះជាបាល់ទាត់ ហើយអ្វីដែលសំខាន់លោកសប្បាយចិត្តទៅវិញទេ ដែលកូនក្រុមរបស់លោកមានសមត្ថភាព និងមានឱកាសទៅលេងក្លឹបធំ។

លោក សុក វាសនា ប្រាប់ថា ៖«ចំពោះការសោកស្ដាយវាតែងតែមាន ប៉ុន្តែអ្វីដែលយើងសប្បាយចិត្តគឺយើង បង្កើតឱកាសនិងរៀបចំឱ្យកីឡាករមួយចំនួនឱ្យគាត់មានឱកាស ដើម្បីបង្កើនសមត្ថភាពត្រូវលេងនៅក្លឹបធំៗចឹងគឺវាប្រសើរ ប្រសើរ ទី១កត្តាជីវភាព គាត់មកលេងដើម្បីជីវភាពគ្រួសារ ទី២គឺកេរឈ្មោះ ទី៣គឺការវិវឌ្ឍលេងបាល់ទាត់ យើងរីករាយទទួលអ្វីដែលគាត់មាន»។

តាមការឱ្យដឹងពីលោកសុក វាសនា មិនថាកីឡាករខ្មែរឬបរទេសទេឱ្យតែមានសមត្ថភាព ក្លឹបនឹងបើកឱកាសទៅលេងនៅក្លឹបធំៗ ហើយណាមួយក្លឹបធំៗក៏មានប្រាក់បៀវត្សច្រើនសម្រាប់ពួកគេដែរ ដើម្បីផ្គត់ផ្គង់ជីវភាពគ្រួសារ។

ការផ្ទេរទៅកាន់ក្លឹបការពារជើងឯកលីគកំពូលកម្ពុជា លោកជឿជាក់ថា ABEE NDJOO នឹងអាចធ្វើបានល្អ ប៉ុន្តែដៃគូប្រយុទ្ធមុតស្រួចរបស់ Gbenga Samuel ក៏ត្រូវមានមិត្តរួមក្រុមដែលយល់ចិត្តដែរ។

គិតត្រឹមសប្ដាហ៍ទី១១ ខ្សែប្រយុទ្ធ ABEE រកគ្រាប់បាល់បាន ១០គ្រាប់ជាប់ជាអ្នកស៊ុតបញ្ចូលទីច្រើនជាងគេលំដាប់ទី២នៅលីគកំពូលកម្ពុជា បន្ទាប់ពីកីឡាករ Privat របស់ព្រះខ័នរាជស្វាយរៀងរកបាន១១គ្រាប់៕

អត្ថបទ៖ អ៊ុំ សុភក្តិ