កម្មវិធី "Run with Sai Virtual Run 2021" សម្ពោធបើកដំណើរការហើយ នៅថ្ងៃនេះ

2021-08-27 07:21:42
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធី"Run with sai virtual run 2021" បានសម្ពោធបើកដំណើរការហើយនៅថ្ងៃទី២៧ ខែសីហា ក្រោមអធិបតីភាពឯកឧត្ដម សំហេង បុរស ប្រធានសហព័ន្ធខ្មែរអត្តពលកម្មស្ម័គ្រចិត្ត។ "ចូលរួមជាមួយពួកយើង ដើម្បីសុខភាព...ចូលរួមជាមួយពួកយើង ដើម្បីកិច្ចការងារមនុស្សធម៌" គឺជាពាក្យស្លោករបស់សាយក្នុងកម្មវិធីរត់លើកនេះ។

លោក អ៊ួន បឋម ហៅសាយ និយាយថា កម្មវិធីរត់នេះ នឹងចាប់ផ្ដើមឲ្យអ្នកចូលរួមទាំងឡាយចុះឈ្មោះតាមរយៈApp ទូរស័ព្ទមួយ ដើម្បីតាមដានការរត់របស់ខ្លួនរៀងៗខ្លួន ហើយកម្មវិធីគ្រោងនឹងរត់រួមគ្នាជាទ្រង់ទ្រាយធំនៅកន្លែងណាមួយដែលទទួលបានការអនុញ្ញាតពីអាជ្ញាធរមានសមត្ថកិច្ចនៅថ្ងៃទី៣០ និងទី៣១ ខែតុលា ខាងមុខនេះ។

សាយ៖"យើងមិនបានដាក់comitmentអីដូចលើកមុនទេ....តែយើងសង្ឃឹមថានឹងមានអ្នកចូលរួមច្រើនដើម្បីកសាងប្រវត្តិសាស្ត្រថ្មីមួយទៀតក្នុងការជួយដល់កុមាររងគ្រោះនៅក្នុងអង្គការចំនួន៣ផងដែរ។ ក្រោយចុះឈ្មោះយើងចាប់ផ្ដើមហ្វឹកហាត់ ដោយអ្នកខ្លះចុះឈ្មោះរត់៥គីឡូម៉ែត្រ និងខ្លះទៅរត់២១គីឡូម៉ែត្រ អីចឹងហើយយើងសង្ឃឹមថាកូវីដអាចនឹងស្ងប់បន្តិចហើយយើងរត់ជុំគ្នា"។

សាយ បញ្ជាក់ថា ជំនួយសប្បុរសជនតាមរយៈការចុះឈ្មោះរត់ជាមួយលោក នឹងផ្ដល់ទៅអង្គការក្នុងស្រុកចំនួនបីដែលធ្វើការងារយ៉ាងជិតស្និទ្ធជាមួយកុមារងាយរងគ្រោះដែលប្រភពជំនួយ និងសប្បុរសជនខ្លះបានមើលរំលងអង្គការទាំងនេះ។ ក្នុងនោះមានអង្គការ Save the Children ខេត្ដសៀមរាប អង្គការសាលាទន្សាយ និងអង្គការសាលាស្វាយអង្គម៉ាណាមិត។

រដ្ឋលេខាធិការក្រសួងសង្គមកិច្ច និងជាប្រធានសហព័ន្ធខ្មែរអត្តពលកម្មស្ម័គ្រចិត្តឯកឧត្ដម សំហេង បុរស ថ្លែងកោតសរសើរនូវគំនិតផ្ដួចផ្ដើមរបស់សាយ និងក្រុមការងាររត់ដើម្បីសប្បុរសធម៌ជាមួយសាយដែលបានចូលរួមកិច្ចការងារសង្គម ជាពិសេសជួយបំផុសគំនិតយុវជនឲ្យចេះស្រឡាញ់ការងារសប្បុរសធម៌ និងស្រឡាញ់សុខភាពតាមរយៈការរត់របស់សាយទាំងពីរលើកនេះ។

ឯកឧត្ដម សំហេង បុរស៖"ចេញពីគំនិតរបស់សាយមួយនេះ បានបង្កើតជាកម្លាំងជួយសង្គមរាប់ពាន់នាក់ ដោយថវិកាមិនបានមកតែពីយុវជនប៉ុន្មាននាក់ហ្នឹងទេ គឺគាត់គ្រាន់តែលះបង់កម្លាំងកាយចិត្ដ ហើយប្រភពចំណូលធំបំផុតគឺមហាជនដែលបានតាមដានសកម្មភាពរបស់សាយ និងក្រុមការងារ...ហើយយើងកំពុងតែគិតថាយ៉ាងជួយជ្រោមជ្រែងយ៉ាងម៉េចបានទៀតក្នុងកម្មវិធីនេះ"។

ចូលរួមក្នុងកម្មវិធីនេះដែរ នាយកក្រុមហ៊ុនSabay group លោក ជី សិលា ថ្លែងថា Sabay តែងតែចូលរួមក្នុងសកម្មភាពសង្គម ដើម្បីបង្កើតភាពសុខដុមរមនា និងភាពសប្បាយរីករាយក្នុងសង្គម ហើយរូបលោកផ្ទាល់គិតថា កីឡាគឺជាប៉ូលមួយធ្វើឲ្យកាយសម្បទាមនុស្សរឹងមាំ មានសុខភាពល្អ និងប្រាជ្ញាវាងវៃ ទើបធ្វើឲ្យសង្គមរីកចម្រើន និងសុខសប្បាយ។

លោក ជី សិលា៖"ខ្លួនខ្ញុំផ្ទាល់ក៏ជាអ្នកចូលចិត្តកីឡាខ្លាំង ខ្ញុំបានហាត់កីឡាច្រើនមែនទែន សូម្បីតែកូនខ្ញុំក៏ខ្ញុំបំផុសគំនិតឲ្យគាត់ស្រឡាញ់កីឡាដែរ រហូតដល់គាត់ទៅរត់ជាមួយសាយអស់១០០គីឡូម៉ែត្រ...អីចឹងហើយទើបយើងតែងតែចូលរួមគាំទ្រ និងផ្សព្វផ្សាយពីបេសកកម្មរបស់សាយកន្លងមក"។

កម្មវិធីរត់ដើម្បីសប្បុរសធម៌របស់សាយ និងក្រុមការងារក្នុងឆ្នាំ២០២១ នេះ គឺមិនកំណត់ចម្ងាយផ្លូវ ឬពេលវេលាដើម្បីរត់លើដងផ្លូវជាក់ស្ដែងដូចកម្មវិធីរត់កាលពីឆ្នាំ២០១៩ នោះទេ ដោយសារបញ្ហាឆ្លងរាតត្បាត នៃជំងឺកូវីដ-១៩។ កម្មវិធីសម្រេច បើកឲ្យសប្បុរសជន ជាពិសេសអ្នកស្រឡាញ់កីឡា និងគាំទ្រសកម្មភាពរបស់សាយ ជួយចូលរួមបរិច្ចាគថវិកាតាមរយៈការចុះឈ្មោះតាមApp ក្នុងទូរស័ព្ទដៃដើម្បីតាមដានការរត់រៀងៗខ្លួន ហើយកំណត់រត់ជុំគ្នាតែ២ថ្ងៃប៉ុណ្ណោះ គឺនៅថ្ងៃទី៣០ និង៣១ ខែសីហា។

សូមរំលឹកថា លោក អ៊ួន បឋម ហៅសាយ ធ្លាប់បំបែកឯកត្តកម្មជាប្រវត្តិសាស្ត្រសម្រាប់កម្ពុជាម្ដងហើយក្នុងការរត់បានឆ្ងាយជាងគេ ពោលគឺស្ទើរជុំវិញស្រុកខ្មែរ ដើម្បីរៃអង្គាសប្រាក់ទៅជួយដល់មន្ទីរពេទ្យកុមារអង្គរនូវទឹកប្រាក់យ៉ាងច្រើនដើម្បីបន្តដំណើរការមន្ទីរពេទ្យនេះ។ តាមរយៈបេសកកម្មមនុស្សធម៌លើកទី១ បានធ្វើឲ្យមហាជនស្គាល់សាយ និងគាំទ្រសាយ កាន់តែខ្លាំងក្លា៕

អត្ថបទ៖ ជិន សុភ័ក្ដ្រ