ក្នុងនាមជាម្ចាស់ជយលាភីពានរង្វាន់សន្តិភាព YSP 2021 ថ្ងៃនេះ សាយ ស្ថិតនៅក្នុងកម្មវិធីមួយដ៏ឱឡារិក

2021-08-27 09:03:41
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក អ៊ួន បឋម ហៅសាយ ត្រូវបានសប្បុរសជន និងអ្នកគាំទ្រលោកដាក់រហស្សនាមថា"វីរយុវជនខ្មែរ" បន្ទាប់ពីលោកបំបែកឯកត្តកម្មរត់លើចម្ងាយផ្លូវ២៤០០គីឡូម៉ែត្រ ដើម្បីសកម្មភាពមនុស្សធម៌មួយកាលពីឆ្នាំ២០១៩។ ក្រោយមក កិត្តិនាមរបស់លោកបានល្បីសុះសាយទាំងក្នុង និងក្រៅស្រុក រហូតដល់គណៈកម្មការវាយតម្លៃពានរង្វាន់មួយឈ្មោះIAYSP Internationalដែលមានមូលដ្ឋាននៅប្រទេសកូរ៉េ សម្រេចប្រគល់ពានរង្វាន់សន្តិភាពYSP 2021 ជូនលោក។

តាមពិតពានរង្វាន់កម្រិតពីភពលោកមួយនេះ ត្រូវធ្វើពិធីប្រគល់ និងទទួលតាំងពីខែមេសា ឆ្នាំ២០២១ មកម្ល៉េះ ប៉ុន្តែដោយសារបញ្ហាជំងឺកូវីដ-១៩ ទើបពិធីនេះត្រូវបានពន្យាររហូតមកដល់ថ្ងៃទី២៧ ខែសីហា ឆ្នាំ២០២១ នេះ។ ថ្លែងទៅកាន់អ្នកមុខអ្នកការ និងតំណាងសមាគមអន្តរជាតិយុវជន និងសិស្សនិស្សិតដើម្បីសន្តិភាព នាទីស្ដីការក្រសួងសង្គមកិច្ច ព្រឹកមិញនេះ លោក អ៊ួន បឋម ថា អ្វីដែលលោកទទួលបាននៅពេលនេះមិនបានរំពឹងទុកឡើយ ព្រោះអ្វីដែលលោកធ្វើកន្លងមកនោះ គឺធ្វើដើម្បីជួយសង្គម។

សាយ៖"ខ្ញុំក៏រំភើបនៅពេលដែលទទួលស្គាល់ដោយថ្នាក់ជាតិ និងអន្តរជាតិដែលបានមេដាយនេះ ហើយខ្ញុំសង្ឃឹមថាតាមរយៈសកម្មភាពរបស់ខ្ញុំនឹងអាចជំរុញទឹកចិត្តយុវជនខ្មែរយើងផ្សេងៗទៀតក្នុងការចូលរួមការងារសង្គម ហើយគាត់អាចនឹងឈានដល់មានការទទួលស្គាល់ពីមហាជន ហើយទទួលបានមេដាយដូចខ្ញុំដែរ"។

សូមបញ្ជាក់ថា ពានរង្វាន់សន្តិភាព YSP PEASE PRIZE គឺជាពានរង្វាន់ដែលផ្ដល់ជូនដល់យុវជន និងថ្នាក់ដឹកនាំវ័យក្មេងដែលបានធ្វើការចូលរួមចំណែកដោះស្រាយបញ្ហាសង្គម និងធ្វើការផ្សព្វផ្សាយនូវសកម្មភាពដែលគាំទ្រដល់គោលដៅអភិវឌ្ឍន៍ប្រកបដោយចិរភាពរបស់អង្គការសហប្រជាជាតិដែលទទួលបាននូវលទ្ធផលជាផ្លែផ្កា និងមានការទទួលស្គាល់ពីមហាជនជាច្រើននៅក្នុងប្រទេស តំបន់ និងសកលលោក។

កាលពីថ្ងៃទី១៧ ខែមេសា ឆ្នាំ២០២១ IA YSP internation បានធ្វើការរៀបចំមហាសន្និបាតយុវជនអន្តរជាតិដែលធ្វើឡើងតាមរយៈប្រព័ន្ធអនឡាញដែលមានការចូលរួមពីសំណាក់យុវជនជាង៩០ប្រទេសជុំវិញសកលលោកដែលធ្វើការផ្សព្វផ្សាយចេញពីសាធារណរដ្ឋកូរ៉េខាងត្បូង។ អំឡុងពេលមហាសន្និបាតនោះផងដែរគណៈកម្មការពានរង្វាន់សន្តិភាពYSP បានធ្វើការប្រគល់ពានរង្វាន់ YSP PEACE PRIZE ជូនលោក អ៊ួន បឋម ហៅសាយ តាមរយៈអ្នកតំណាងនៅទីនោះ៕

អត្ថបទ៖ ជិន សុភ័ក្ដ្រ