Barry៖ ភាពឈ្លាសវៃយកឈ្នះនៅនាទីចុងក្រោយរបស់សូលទីឡូគឺអស្ចារ្យណាស់!

2021-09-03 04:24:22
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លឹបសូលទីឡូអង្គរ បានយកឈ្នះក្រុមភ្ញៀវនគរបាលជាតិនៅនាទី ៩០+១ ដោយគ្រាប់បាល់របស់កីឡាករ រ័ត្ន សំណាង។ ចប់ការប្រកួតម្ចាស់ផ្ទះឈ្នះក្រុមភ្ញៀវ ៣-២។

ជុំវិញជ័យជម្នះលើកដំបូងនេះខ្សែប្រយុទ្ធចំណូលថ្មី ត្រៀមសម្រាប់ជុំទី២ Barry Lelouma បានចាត់ទុកជារឿងដ៏អស្ចារ្យរបស់សូលទីឡូអង្គរ។

អតីតខ្សែប្រយុទ្ធរបស់គិរីវង់សុខសែនជ័យ និងណាហ្គាវើលដ៍បានសង្កត់ធ្ងន់ថា ៖«ភាពឈ្លាសវៃដែលពួកគេបង្ហាញដោយឆក់យកឈ្នះនៅនាទីចុងក្រោយគឺអស្ចារ្យណាស់ គ្រប់គ្នាប្រយុទ្ធដូចជាតោមួយក្បាល ស្រេកឃ្លានជ័យជម្នៈលើកដំបូង»។

ខ្សែប្រយុទ្ធដែលធ្លាប់ប្រកបអាជីពនៅលីគថៃ មីយ៉ាន់ម៉ា និងហ្គីណេ ត្រូវបានគ្រូបង្គោលលោក អ៊ុក សុធី ចុះកិច្ចសន្យាមកជួយក្រុមសម្រាប់ជុំទី២ នៃការប្រកួតពានរង្វាន់លីគកំពូលកម្ពុជា។ ហាត់ជាមួយសូលទីឡូបានមួយសប្ដាហ៍ Barry ថាកីឡាករទាំងអស់ហាក់យល់ចិត្តគ្នា ហើយវាច្បាស់ណាស់នឹងមានអ្វីប្លែកជាក់ជាមិនខាន។ កីឡាករវ័យ២៧ឆ្នាំបានផ្ដល់ទំនុកចិត្តលើខ្លួនឯងថានឹងជួយសូលទីឡូអង្គរបានច្រើន។

Barry បញ្ជាក់ថា ៖«ពិតណាស់ខ្ញុំជឿជាក់លើខ្លួនឯង បើខ្ញុំមិនជឿថាជួយក្រុមបានទេខ្ញុំមិនមកទីនេះឡើយ ខ្ញុំហាត់ជាមួយពួកគេបាន១សប្ដាហ៍ វាពិតជាអស្ចារ្យណាស់ គ្រូបង្វឹកថ្មីក៏ល្អ ពួកគេនឹងមានការប្រែប្រួល ខ្ញុំជឿជាក់ពួកយើងនឹងជួយសង្គ្រោះក្រុមបាន»។

ក្រុមសូលទីឡូអង្គរកំពុងឈរនៅលេខរៀងទី១២ មាន៤ពិន្ទុក្រោយឆ្លងកាត់១០ប្រកួត ចាញ់៨ ឈ្នះ១ និងស្មើ១ តាមពីក្រោយដោយក្រុមបាតតារាងនគរបាលជាតិ មាន១ពិន្ទុ ក្រោយឆ្លងកាត់៨ប្រកួត ចាញ់៧ប្រកួត ស្មើ១ប្រកួត៕

អត្ថបទ៖ អ៊ុំ សុភក្តិ