Griezmann យល់ព្រមកាត់ប្រាក់ខែ ៤០% ពេលត្រលប់មកកាន់ Atletico វិញ

2021-09-06 12:06:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធបារាំង Antoine Griezmann យល់ព្រមកាត់ប្រាក់ខែរបស់ខ្លួនចំនួន ៤០% នៅពេលត្រលប់មកកាន់ក្លឹប Atletico Madrid វិញក្នុងលក្ខខ័ណ្ឌខ្ចីជើង។ នេះបើតាមការចុះផ្សាយរបស់សារព័ត៌មាន Goal។

វាជារឿងមិនធម្មតាដែរសម្រាប់ករណីកុងត្រាខ្ចីជើងរបស់ Griezmann។ Atletico មិនចាំបាច់បង់ប្រាក់ទៅកាន់ Barcelona នោះទេ សម្រាប់កុងត្រាខ្ចីជើងនេះ ហើយក្លឹបអេស្ប៉ាញមួយនេះអាចមានសិទ្ធិបន្តកុងត្រាបណ្ដោះអាសន្នឱ្យ Griezmann រយៈពេលមួយឆ្នាំទៀត ប្រសិនបើខាង Barcelona យល់ព្រម។

ប្រសិនបើលើសពីមួយឆ្នាំទៀត បើតាមប្រភពខាងលើ ក្លឹប Atletico Madrid នឹងទិញផ្ដាច់ Griezmann ពីក្លឹប Barcelona ក្នុងតម្លៃ ៤៧លានដុល្លារបូករួមទាំងប្រាក់បំណាច់ផ្សេងៗ ប្រសិនបើកីឡាកររូបនេះលេងយ៉ាងតិច ៥០% នៃការប្រកួតរបស់ក្លឹបរាជធានីម៉ាឌ្រីដមួយនេះ សម្រាប់រដូវកាល២០២២/២៣។

ប្រសិនបើ Griezmann មិនលេងដល់ ៥០%នោះទេ នោះខាង Atletico នឹងមិនចំណាយទឹកប្រាក់មួយរៀលឱ្យ Barcelona នោះទេ។ ប៉ុន្តែសេណារីយ៉ូនេះកម្រនឹងកើតណាស់ លុះត្រាណាតែ Griezmann រងរបួសធ្ងន់ធ្ងរណាមួយ។

ជើងឯក World Cup ឆ្នាំ២០១៨រូបនេះ បានចំណាយពេលនៅរាជធានីម៉ាឌ្រីដរយៈពេល ៥ឆ្នាំ មុននឹងផ្លាស់ទៅកាន់ Barcelona នៅឆ្នាំ២០១៩ ក្រោមតម្លៃខ្លួន ១៤២លានដុល្លារ៕

ប្រភព៖ Goal អត្ថបទ៖ សេរី មង្គល