ខ្សែបម្រើ Liverpool មួយរូបនៅជាប់នៅហ្គីណេ ខណៈប្រទេសនេះកំពុងស្ថិតក្រោមរដ្ឋប្រហារយោធា

2021-09-06 13:24:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើកណ្ដាល Liverpool កីឡាករ Naby Keita កំពុងតែជាប់នៅហ្គីណេ ខណៈកីឡាកររូបនេះគ្រោងនឹងជួយក្រុមជម្រើសជាតិហ្គីណេ លេងវគ្គជម្រុះ World Cup ដែលដំបូងឡើយនឹងលេងនៅថ្ងៃច័ន្ទនេះ។

បើតាមអ្នកនាំពាក្យរបស់ក្លឹប Liverpool កីឡាកររូបនេះមានសុខទុក្ខជាធម្មតានោះទេ ហើយខាងក្លឹបកំពុងតែទាក់ទងជាប្រចាំទៅកាន់ក្រុមជម្រើសជាតិហ្គីណេ ដើម្បីធ្វើយ៉ាងណាឱ្យ Keita ត្រលប់មក Liverpool ឱ្យបានឆាប់ៗ និងប្រកបដោយសុវត្ថិភាព។ យ៉ាងណាមិញ ខាងក្លឹបមិនបានបញ្ជាក់ថា កីឡាកររូបនេះនឹងត្រលប់មកអង់គ្លេសវិញនៅពេលណានោះទេ។

នៅហ្គីណេ វរសេនីយ៍យោធាដឹកនាំកងកម្លាំងធ្វើរដ្ឋប្រហារទម្លាក់លោកប្រធានាធិបតី Alpha Conde ចេញពីតំណែង ហើយរំលាយរដ្ឋាភិបាលរបស់លោកចោល ក្រោយពេលដែលប្រធានាធិបតីវ័យ ៨៣ឆ្នាំរូបនេះមានគម្រោងចង់បន្តតំណែងនៅអាណត្តិទី៣ ដោយកែច្បាប់រដ្ឋធម្មនុញ្ញ។

ស្របពេលដែលស្ថានភាពនៅច្របូកច្របល់ អមជាមួយនឹងស្នូរកាំភ្លើងផូងផាងនៅរដ្ឋធានី ខាង FIFA ក៏ធ្វើការពន្យារប្រកួតរវាងហ្គីណេ និងម៉ារ៉ុក។ បន្ថែមពីលើនេះទៅទៀត កីឡាករមួយចំនួនក៏ជាប់នៅក្នុងប្រទេសនេះ ដោយក្រៅពី Keita ក៏មានខ្សែការពារ PSG ដែលលេងឱ្យម៉ារ៉ុកកីឡាករ Achraf Hakimi។ យ៉ាងណាមិញ បើតាមការបង្ហោះរបស់ Hakimi ក្រុមម៉ារ៉ុកបានត្រលប់ទៅកាន់ ស្រុករបស់ខ្លួនវិញ ដោយសុវត្ថិភាពហើយនៅក្នុងថ្ងៃនេះ៕

ប្រភព៖ Goal ប្រែសម្រួល៖ ហ៊ីម រស្មី