ចុះទៅដល់ចម្ការមៀនផ្ទាល់ថ្ងៃមុន ឥឡូវ ខេមរៈ សិរីមន្ដ ប្រកាសចែកមៀនដោយឥតគិតថ្លៃ

2021-09-10 09:14:41
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងប្រុសជួរមុខរបស់ផលិតកម្មរស្មីហង្សមាស ខេមរៈ សិរីមន្ដ ប្រកាសតាមបណ្ដាញសង្គមFacebook នៅរសៀលថ្ងៃទី១០ ខែកញ្ញា នេះថា រូបលោកកំពុងត្រៀមចែកចាយមៀនប៉ៃលិនទៅតាមមណ្ឌល និងស្អែកម៉ោង៩ព្រឹក បងប្អូនអាចមកទទួលផ្លែមៀនម្នាក់៥គីឡូនៅគេហដ្ឋានលោកផ្ទាល់ដើម្បីយកទៅហូបដោយឥតគិតថ្លៃ។

តាមរយៈរូបភាពដែលបានបង្ហោះដោយតារាចម្រៀងជួរមុខរូបនេះ គេឃើញកេសដាក់មៀនប៉ៃលិនរាប់រយកេសត្រូវបានដឹកតាមឡានទ្រុងធំមួយ បានទម្លាក់ចុះនៅក្នុងផ្ទះរបស់លោកហើយ ហើយលោកគឺជាអ្នកទទួលផ្លែមៀននេះដោយផ្ទាល់ មុននឹងចែកចាយបន្តទៅតាមមណ្ឌលធ្វើចត្តាឡីស័ក ឬមណ្ឌលព្យាបាលជំងឺកូវីដ-១៩។

ខេមរៈ សិរីមន្ដ៖"មៀនប៉ៃលិន ដែលខ្ញុំបានបញ្ជារទិញពីផ្សារកសិផលធម្មជាតិរបស់អ្នកឧញ្ញា ឡេង ណាវ៉ាត្រា បានមកដល់គេហដ្ឋានខ្ញុំបាទហើយ។ សូមអធ្យាស្រ័យ មៀន មានកំណត់ មិនអាចជូនបងប្អូនបានគ្រប់គ្នានោះទេ"។

ទោះជាយ៉ាងណាលោកមិនបានបញ្ជាក់ ថាតើមៀនប៉ៃលិនដែលលោកបានបញ្ជាទិញនោះមានចំនួនប៉ុន្មានគីឡូក្រាម ហើយត្រូវបែងចែកទៅតាមមណ្ឌលធ្វើចត្ដាឡីស័ក ឬមណ្ឌលព្យាបាលជំងឺកូវីដ-១៩ ប៉ុន្មាន និងទុកចែកជូនប្រជាពលរដ្ឋនៅនឹងផ្ទះលោកផ្ទាល់ប៉ុន្មានគីឡូនោះទេ៕