សម្តេច​ក្រុមព្រះ ​នរោត្តម​ ​រណឫទ្ធិ​ ​ជា​ព្រះ​ប្រធាន​គណបក្ស​ហ្វ៊ុនស៊ិនប៉ិច​ ​និង​ព្រះ​ប្រធាន​ក្រុមប្រឹក្សា​ផ្ទាល់​របស់​ព្រះមហាក្សត្រ​។​ ​ព្រះអង្គ​ធ្លាប់ធ្វើ​ជានា​យក​រដ្ឋ​មន្រ្តី​ទីមួយ​នៃ​រដ្ឋាភិបាល​កម្ពុជា​ ​និង​​ធ្លាប់ធ្វើ​ជា​ប្រធានរដ្ឋសភា​ជាតិ​។​

ព្រះអង្គ​ប្រ​សូត្រ​ ​កាលពី​ថ្ងៃ​ទី​២​ ​ខែ​​មករា​ ​ឆ្នាំ​១៩៤៤​ ​នា​រាជធានី​ភ្នំពេញ​។​ ​ទ្រង់​ជា​ព្រះរាជ​បុត្រា​នៃ​ព្រះ​បរម​រត​ន​កោដ្ឋ​ ​ព្រះករុណា​ព្រះបាទ​សម្តេច​ព្រះ​នរោត្តម​ ​សីហនុ ​និង​អ្នកម្នាង​ ​ផាត់​ ​កាញ៉ុល​ ​ដែល​ជា​នាដការី​ ​នៃ​របាំ​ព្រះរាជទ្រព្យ​។​ ​ព្រះអង្គ​ជា​ព្រះ​អនុច (​ប្អូន​បង្កើត​) ​របស់​សម្តេច​រាជបុត្រី​ព្រះរាម​ ​នរោត្តម​ ​បុប្ផា​ទេវី​។​ ​ព្រះអង្គ​ជា​ព្រះ​ជេដ្ឋា ​(​បងប្រុស​) ​របស់​ព្រះករុណា​ព្រះបាទ​សម្ដេច​ ​ព្រះ​បរមនាថ​ ​នរោត្ដម​-​សីហមុនី​ ​ប៉ុន្តែ​ព្រះ​មាតា​ទីទៃ​ ​បិតា​តែមួយ​។​

កាល​នៅ​មាន​ព្រះ​ជន្ម​នៅឡើយ​ ​ព្រះអង្គ​ធ្លាប់​ជា​អ្នកនយោបាយ​ឆ្នើម​មួយ​រូប​ ​និង​ជា​អ្នកស្រាវជ្រាវ​ ​និង​សាស្រ្តាចារ្យ​ផ្នែក​ច្បាប់​នៅ​ប្រទេស​បារាំង​ ​ដោយ​បាន​រៀនចប់​ផ្នែក​ច្បាប់​នៅ​សាកលវិទ្យាល័យ​ប្រទេស​បារាំង​។​ ​ព្រះអង្គ​ប្រឡូក​ក្នុង​ឆាក​នយោបាយ​អស់​រយៈពេល​ជិត​ ​៤០​ ​ឆ្នាំ​ ​តាំងពី​ចូល​ក្រុម​រាជា​និយម​ហ្វ៊ុនស៊ិនប៉ិច​នៅ​ឆ្នាំ​ ​១៩៨៣​។​

ពលរដ្ឋ​ខ្មែរ​ទូទៅ​នៅ​ប្រទេស​កម្ពុជា​ ​ចាប់ផ្តើម​ស្គាល់​ព្រះអង្គ​ខ្លាំង​ ​ក្នុង​ព្រឹត្តិការ​បោះ​ឆ្នោតជាតិ​ឆ្នាំ​១៩៩៣​ ​ដែល​រៀបចំ​ដោយ​អង្គការសហប្រជាជាតិ​ ​ដែល​កាលណោះ​គណបក្ស​ហ្វ៊ុនស៊ិនប៉ិច​ ​ដែល​ព្រះអង្គ​ជា​ព្រះ​ប្រធាន​ ​បាន​ឈ្នះ​គណបក្សប្រជាជន​កម្ពុជា​​ ​ដោយ​គណបក្ស​ហ្វ៊ុនស៊ិនប៉ិច​ទទួល​បាន​ ​៥៨​ ​អាសនៈ​ទល់នឹង​គណបក្សប្រជាជន​កម្ពុជា​ទទួល​បាន​ ​៥១​ ​អាសនៈ ដោយសម្តេច​ក្រុមព្រះ​នរោត្តម​ ​រណឫទ្ធិ​ ​ជានា​យក​រដ្ឋ​មន្រ្តី​ទី​១​ ​និង​សម្ដេច ​ហ៊ុន​ ​សែន​ ​ជានា​យក​រដ្ឋ​មន្រ្តី​ទី​ ​២​។

នៅ​ឆ្នាំ​១៩៩៨​ ព្រះអង្គ​ ​ត្រូវបានតែងតាំងជា​ប្រធានរដ្ឋសភា​ ក្រោយបង្កើតរដ្ឋាភិបាល​ចម្រុះ​ជាមួយ​គណបក្សប្រជាជនកម្ពុជា។ ហើយក្នុងការបោះឆ្នោតឆ្នាំ ២០០៣ គណបក្សហ្វ៊ុនស៊ិនប៉ិច​ ​ទទួលបានអសនៈ​ ​២៦​ ​ ​ក្នុងចំណោម​អសនៈ​សភាជាតិ​សរុប​ ​១២០​ ​អសនៈព្រះអង្គបានក្លាយជាប្រធានរដ្ឋសភាម្ដងទៀត។

ព្រះអង្គ​មាន​មហេសី​ពីរ​ ​មហេសី​ទីមួយ​ ​គឺ​ព្រះអង្គម្ចាស់​ក្សត្រិយ៍​នរោត្តម​ ​ម៉ារី​ ​រណឫទ្ធិ (​ឈ្មោះ​ដើម​អ្នកស្រី​ ​អេង​ ​ម៉ារី​) ​បាន​បុត្រ​បី​អង្គ​ ​គឺ​ព្រះអង្គម្ចាស់​ ​នរោត្ដម​ ​ចក្រាវុឌ្ឍ ​ព្រះអង្គម្ចាស់​ ​នរោត្តម​ ​សីហឫទ្ធិ​ ​និង​ព្រះអង្គម្ចាស់ក្សត្រីយ៍ ​នរោត្តម​ ​រតនា​ទេវី​។​ ​មហេសី​ទីពីរ ​គឺ​អ្នកម្នាង​ ​អ៊ុក​ ​ផល្លា​ ​ដែល​ជា​អ្នក​របាំ​បុរាណ​ដ៏​ឆ្នើម​ម្នាក់​។​ ​

ជាមួយ​អ្នកម្នាង​ ​អ៊ុក​ ​ផល្លា​ ​ទ្រង់​បាន​បុត្រ​ពីរ​អង្គ​ ​គឺ​អ្នកអង្គម្ចាស់​ ​នរោត្តម​ ​សុធាឫទ្ធិ​ ​និង​ ​អ្នកអង្គម្ចាស់​ ​នរោត្ដម​ ​រណវង្ស​។​ ​អ្នកម្នាង​ ​អ៊ុក​ ​ផល្លា​ ​បាន​ស្លាប់​ក្នុង​គ្រោះថ្នាក់​ចរាចរណ៍​មួយ​ ​នៅ​ស្រុក​ព្រៃ​នប់​ ​ខេត្ត​ព្រះ​សី​ហ​នុ ​កាលពី​ឆ្នាំ​ ​២០១៨​។​ ​ក្នុង​គ្រោះថ្នាក់​នោះ​ ​សម្តេច​ក្រុមព្រះ​នរោត្តម​ ​រណឫទ្ធិ​ ​រង​របួសធ្ងន់​ ​ដែល​ពិការ​ ​និង​ជិះ​លើ​រទេះរុញ​តាំងពី​ពេល​នោះ​ ​រហូតដល់​ថ្ងៃ​សោយទិវង្គត​៕