លាភចូលផ្ដួនៗ អេលីត ចំរើន បានកាដូម៉ូតូអាសង់ ២០២២ មួយគ្រឿងពីឯកឧត្ដម យឹម លាង

2021-12-28 05:26:48
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករ អេលីត ចំរើន លាភចូលផ្ដួនៗតែម្ដងទើបឈ្នះខ្សែក្រវាត់១គ្រឿងបានប្រាក់រង្វាន់១ម៉ឺនដុល្លារ ឥលូវបានកាដូពិសេសម៉ូតូអាសង់ ២០២២ មួយគ្រឿងទៀតពីឯកឧត្ដម យឹម លាង ជាការលើកទឹកចិត្ត។

លោកជំទាវ ស៊ន សៀវម៉ី ពេលប្រគល់ម៉ូតូ

លោកជំទាវ ស៊ន សៀវម៉ី បានឲ្យដឹងថា នេះជាកាដូលើកទឹកដែលផ្ដល់ដោយឯកឧត្ដម យឹម លាង ដល់កីឡាករ អេលីត ចំរើន ដែលបានឈ្នះខ្សែក្រវាត់១គ្រឿងកាលពីថ្ងៃអាទិត្យចូលក្នុងក្លឹបប្រដាល់នាយដ្ឋានអង្គរក្ស។ ជាការលើកទឹកចិត្តចំពោះការខំប្រឹងប្រែងរបស់ ចំរើន ក្នុងការហ្វឹកហាត់ និងប្រកួតជាពិសេសកម្មវិធីសំខាន់វគ្គផ្ដាច់ព្រ័ត្រនេះ។

លោកជំទាវបន្ថែមទៀតថា ការលើកទឹកចិត្តនេះគឺមានសារសំខាន់ណាស់ដល់កីឡាករ កីឡាការិនី មិនថានៅពេលឈ្នះ ឬចាញ់នោះទេ ពោលធ្វើឲ្យពួកគេមានកម្លាំងចិត្តបន្តទៀត បន្តខំប្រឹងប្រែងថែមឆ្ពោះទៅរកភាពជោគជ័យនាពេលក្រោយៗទៀត។ ចំពោះក្លឹបនាយដ្ឋានអង្គរក្សនឹងមានជាការជួយឧបត្ថម្ភលើកទឹកចិត្តបន្តទៀត សូមកីឡាករខំប្រឹងប្រែង។

អេលីត ចំរើន និងលោក ស៊ន អេលីត

អតីតម្ចាស់មេដាយកីឡាអាស៊ីខាងលើនេះក៏សូមថ្លែងអំណរគុណដល់ឯកឧត្ដម យឹម លាង ដែលជាគណៈគ្រប់គ្រងក្លឹបនាយកដ្ឋានអង្គរក្ស និងក្រុមហ៊ុន SBC៣៦៩ ដែលតែងតែយកចិត្តទុកដាក់ក៏ដូចជាឧបត្ថម្ភកីឡាករជារហូតមក។

អេលីត ចំរើន និងម៉ូតូ

រំលឹកដែរថា ការប្រគល់ម៉ូតូអាសង់ ឆ្នាំ២០២២ មួយគ្រឿងពីឯកឧត្ដម យឹម លាង ដល់កីឡាករ អេលីត ចំរើន នេះធ្វើឡើងកាលពីព្រឹកមិញនៅក្លឹបនាយដ្ឋានអង្គរក្ស។ អេលីត ចំរើន ទើបឈ្នះខ្សែក្រវាត់១គ្រឿងអមដោយប្រាក់រង្វាន់១ម៉ឺនដុល្លារនៅសង្វៀន PNN ក្រោយឈ្នះពិន្ទុ បឺត សង្ឃឹម កាលពីថ្ងៃអាទិត្យ ទី២៦ ខែធ្នូ ឆ្នាំ២០២១៕

អត្ថបទ៖ នួន ស៊ីណា