លោក បែ មករា ក៏មានគម្រោងអញ្ជើញក្លឹបបរទេសចូលរួម Cambodia Airways Cup 2022 ដែរ

2022-02-08 02:41:47
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតពានរង្វាន់ Cambodia Airways Cup លើកទី២ដែលធ្វើឡើងដោយក្លឹបបាល់ទាត់បឹងកេត នឹងចាប់ផ្ដើមនៅថ្ងៃទី១៥ ទី១៦ ខែកុម្ភៈ ឆ្នាំ២០២២ខាងមុខ ដោយមានសមាសភាពក្រុមខ្លាំងៗចំនួនបួនចូលរួមដូចជា បឹងកេត ណាហ្គាវើលដ៍ ព្រះខ័នរាជស្វាយរៀង និងអង្គរថាយហ្គឺរ។

លោក បែ មករា អ្នកចាត់ការទូរទៅក្លឹបនាគខៀវ និងជាតំណាងប្រធានគណៈកម្មការរៀបចំការប្រកួត

ក្នុងសន្និសីទ្ធសារព័ត៌មានកាលពីថ្ងៃទី០៧ ខែកុម្ភៈ ឆ្នាំ២០២២ លោក បែ មករា អ្នកចាត់ការទូរទៅក្លឹបនាគខៀវ និងជាតំណាងប្រធានគណៈកម្មការរៀបចំការប្រកួតមានប្រសាសន៍ថា ក្លឹបគ្រោងអញ្ជើញក្រុមបរទេសមកចូលរួមដែរ ប៉ុន្តែដោយសារស្ថានភាពកូវីដ-១៩ ទើបក្លឹបមិនអាចធ្វើទៅបាន។

លោក បែ មករា បានបញ្ជាក់ថា ៖«ការពិតទៅគឺយើងក៏មានគម្រោងរៀបចំអញ្ជើញក្រុមបរទេសចូលរួមផងដែរ ប៉ុន្តែដោយសារតែបរិបទនៃកូវីដ ក៏យើងមិនអាចធ្វើទៅបាន ហើយសង្ឃឹមថានៅឆ្នាំបន្តបន្ទាប់ទៀត យើងនឹងអាចធ្វើឱ្យប្រសើរនៅការប្រកួតនៅក្នុងពានរង្វាន់នេះ»។

គួរបញ្ជាក់ថា នេះជាឆ្នាំទី២ហើយដែលបឹងកេតបានធ្វើពាន Cambodia Airways Cup។ នៅថ្ងៃទី១៥ ខែកម្ភៈ ឆ្នាំ២០២២ ក្រុមណាហ្គាវើលដ៍នឹងត្រូវប្រកួតជាមួយព្រះខ័នរាជស្វាយរៀង ចំណែកថ្ងៃទី១៦ ខែកុម្ភៈ ឆ្នាំ២០២១ បឹងកេតត្រូវប្រកួតជាមួយអង្គរថាយហ្គឺរ។

ចំពោះរូបមន្តនៃការប្រកួតគឺក្រុមឈ្នះនឹងឡើងទៅប៉ះក្រុមឈ្នះ នៅវគ្គផ្ដាច់ព្រ័ត្រនាថ្ងៃទី១៩ ខែកុម្ភៈ ខណៈក្រុមចាញ់នឹងត្រូវប៉ះក្រុមចាញ់ដណ្ដើមលេខ៣ នៅថ្ងៃទី១៨ ខែកុម្ភៈ ឆ្នាំ២០២២។

ចំពោះកីឡាករបរទេសសម្រាប់ក្រុមនីមួយៗគឺមានបួនរូបនៅលើទីលាន បីនាក់បូកនឹងអាស៊ីម្នាក់៕

អត្ថបទ៖ អ៊ុំ សុភក្តិ