ស្ថាបនិកពុម្ពអក្សរខ្មែរយូនីកូដ ធ្លាប់លើកឡើងថា «អ្នកជំនាញគួររួមគ្នា រកវិធីឲ្យប្រព័ន្ធកុំព្យូទ័រស្គាល់អក្សរខ្មែរដោយមិនប្រើ ZWSP»

2022-02-14 04:48:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថាបនិកបង្កើតពុម្ពអក្សរខ្មែរយូនីកូដ លោក ដាញ់ ហុង ចង់មានការបង្កើតប្រព័ន្ធកុំព្យូទ័រដែលអាចស្គាល់អក្សរខ្មែរដោយមិនបាច់ប្រើចន្លោះមើលមិនឃើញ។

រូបថតផ្ដល់ដោយ៖ លោក ដាញ់ ហុង

ចន្លោះមើលមិនឃើញនោះគឺ (Zero-width Space-ZWSP) លោក ហុង ថាពុំមែនស្ថិតក្នុងស្តង់ដារខ្មែរយូនីកូដទេ។ ការប្រើ ZWSP លើក្តារចុចខ្មែរ កើតឡើងតាំងពីយូរយារណាស់មកហើយ ដើម្បីឲ្យប្រព័ន្ធកុំព្យូទ័រស្គាល់ពាក្យខ្មែរលើបណ្ដាញអ៊ីនធឺណិតបណ្ដោះអាសន្ន ហើយអាចឲ្យអក្សរដែលវាយមកអាចចុះបន្ទាត់បានត្រឹមត្រូវ ប៉ុន្តែវាបែរជាត្រូវប្រើជាប់រហូតមកដល់បច្ចុប្បន្ន ដោយមិនមានការអើពើបង្កើតប្រព័ន្ធកុំព្យូទ័រស្គាល់ពាក្យខ្មែរ ដែលមិនប្រើ ZWSP ឲ្យបានសម្រេច។

លោកស្នើឲ្យ"មន្រ្តីរដ្ឋាភិបាលទទួលបន្ទុកត្រូវយកចិត្តទុកដាក់ដោះស្រាយដើម្បីឲ្យអ្នកជំនាញព័ត៌មានវិទ្យាមានឱកាសបង្កើតប្រព័ន្ធកុំព្យូទ័រស្គាល់អក្សរខ្មែរ ទោះបីមិនប្រើ ZWSP"។

លោក ហុង បញ្ជាក់ថា "អ្វីដែលខ្ញុំចង់បានសុំឲ្យមានក្តារចុចខ្មែរយូនីកូដ ត្រឹមត្រូវតាមស្តង់ដារ ហើយរឿងប្រព័ន្ធអ៊ីនធឺណិតមិនស្គាល់ពាក្យខ្មែរដែលមិនប្រើ ZWSP មន្រ្តីរដ្ឋាភិបាលទទួលបន្ទុកគួរយកចិត្តទុកដាក់ដោះស្រាយដើម្បីឲ្យអ្នកជំនាញព័ត៌មានវិទ្យាទាំងអស់មានឱកាសបង្កើតឲ្យជោគជ័យ"។

រំឮកផងដែរថា ស្នាដៃបង្កើតពុម្ពអក្សរថ្មីចុងក្រោយបំផុតចំនួន២១ របស់លោក ត្រូវបាន Google បានប្រកាសដាក់បញ្ចូលទៅក្នុង Google Font ដែលជា ពុម្ពអក្សរខ្មែរ ឬ Font Khmer កាលពីថ្ងៃទី ១០ កុម្ភៈកន្លងទៅ។

តាមការសង្កេតឃើញថា ពុម្ពអក្សរខ្មែរលើ Google Fonts ភាគច្រើនសុទ្ធសឹងតែជា ស្នាដៃលោកដាញ់ ហុង និងទេព សុវិចិត្រ។ Font Khmer នោះទៀតសោតមានសរុបចំនួន ១៣៥៩ លើ Google Fonts៕

អត្ថបទ៖ រក្សា