លោក ខូវ ឆាយ និយាយរឿងអ្នកគាំទ្របាល់ទាត់ខ្មែរ មិនចង់អស់លុយ តែចង់ឃើញលទ្ធផល

2022-03-07 04:38:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតលីគកំពូលកម្ពុជា បានចាប់ផ្ដើមដំណើរការហើយកាលពីចុងសប្ដាហ៍កន្លងទៅ ដោយក្លឹបធំៗទាំងអស់សុទ្ធតែប៉ះគ្នា តែបែរជាមិនសូវមានអ្នកចូលរួមទស្សនាទៅវិញ។

រូបភាព៖ Army FC

ក្នុងនោះដែរ កីឡដ្ឋានទាំងអស់ដែលធ្វើជាម្ចាស់ផ្ទះ ហាក់មិនសូវទទួលបានអ្នកគាំទ្រចូលទស្សនានោះទេ ដោយមានមិនដល់១ពាន់នាក់ផង ដែលស្ម័គ្រចិត្តទិញសំបុត្រចូលមើល។ ដោយនេះ វាហាក់ដូចជាខុសគ្នាឆ្ងាយណាស់ ពីការប្រកួតជម្រើសជាតិដែលអ្នកគាំទ្រសម្រុកទៅមើលរាប់ម៉ឺននាក់។ ដោយសារតែរឿងនេះហើយ ទើបបានជាធ្វើឱ្យលោក ខូវ ឆាយ អគ្គលេខាធិការសមាគមបាល់ទាត់កងយោធពលខេមរភូមិន្ទ ទម្លាយអារម្មណ៍ពិត ចំពោះការគាំទ្ររបស់អ្នកគាំទ្រផ្ទាល់។

ដោយលោក បានបញ្ជាក់ថា៖

ការប្រកួតបើកឆាកនៃលីកកំពូលកម្ពុជា រវាងក្រុមខ្លាំងទាំង4នាថ្ងៃសៅទី5មិនា មានអ្នកចូលរួមទស្សនាផ្ទាល់នៅទីលាន Tiffy Army Stadium និង Cambodia Airway Stadium ប្រហែលជាង500នាក់ដូចគ្នា។ នេះហើយជាសន្ទុះនៃការគាំទ្របាល់ទាត់លីគកម្ពុជា បើធៀបនឹងអ្នកគាំទ្រលីគវៀតណាមដែលមានអ្នកគាំទ្រជាមធ្យម10,000នាក់រាល់ការប្រកួត។ សូមត្រៀមទឹកភ្នែកសំរាប់លទ្ធផលស៊ីហ្គេម2023ដែលយើងធ្វើម្ចាស់ផ្ទះអោយហើយទៅ យើងគ្មានថ្ងៃលេងឈ្នះវៀតណាម រឺ ថៃទេបើលីគយើងនៅតែបែបនេះ ហើយសូមកុំបន្ទោសប្រធានសហព័ន្ធ កុំបន្ទោសគ្រូជំរើសជាតិ កុំបន្ទោសកីឡាករ កុំបន្ទោសប្រធានក្លឹបទាំងអស់ យើងបានធ្វើអស់ហើយ ម្នាក់ៗចំណាយពី50ម៉ឺនទៅដល់រាប់លានដុល្លាក្នុង1ឆ្នាំដើម្បីអភិវឌ្ឍន៍បាល់ទាត់ខ្មែរ។ បងប្អូនអ្នកគាំទ្រគួរសួរខ្លួនឯងវិញថាបានធ្វើអ្វីខ្លះដើម្បីបាល់ទាត់ជាតិយើង? បើសំបុត្រទស្សនាផ្ទាល់តែ5,000ទៅ10,000រៀលមិនហ៊ានចំណាយផង តើក្លឹបនិមួយៗមានថវិកាមកពីណាមកអភិវខ្ឍន៍កីឡាករដើម្បីជំរើសជាតិឈ្នះស៊ីហ្គេម2023។

អត្ថបទ៖ នរវិទូ