ប៉ះវិសាខាស្អែកនេះ នេន សុធារដ្ឋ នៅតែមិនទាន់អាចជួយក្រុមបានទេ

2022-03-11 02:35:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែការពារឆ្នើមណាហ្គាវើលដ៍ នេន សុធារដ្ឋ នៅមិនទាន់អាចជួយក្រុមបានទេ ពេលប្រកួតដណ្ដើមពានរង្វាន់ក្របខ័ណ្ឌលីគកំពូលកម្ពុជា Cambodian Premier League ស្អែកនេះ បើទោះជាគេធូរស្រាលពីរបួសដាច់សរសៃជង្គង់ ACL អំឡុងឆ្នាំ២០២១ និងបានមកហ្វឹកហាត់ជាមួយក្រុមវិញយ៉ាងណាក្ដី។

លោក ឃឹម បូរី គ្រូបង្គោលក្លឹបបាល់ទាត់ណាហ្គាវើលដ៍បានឱ្យដឹងតាមរយៈទំព័រហ្វេសក្លឹបថា ការហ្វឹកហាត់របស់អតីតកីឡាករព្រះខ័នរាជស្វាយរៀង បានវិលត្រឡប់មកវិញប្រហែល៧០ទៅ៨០%ហើយ ខណៈរៀងកាយអាចនឹងវិលដូចដើមវិញក្នុងរយៈពេលប្រមាណ១កន្លះទៅ២ខែទៀត។

គ្រូបង្គោលដែលផ្ដើមចេញពីកីឡាករដដែលនេះ បានបញ្ជាក់បន្ថែមថា ៖«ចំពោះសុធារដ្ឋ ខ្ញុំគិតថាខ្ញុំមើលការហ្វឹកហាត់ប្រចាំរបស់គាត់ខ្ញុំមើលទៅ រាងកាយរបស់គាត់អាចត្រឡប់មកវិញក្នុងរយៈពេលប្រហែលជាក្នុងចន្លោះពី១កន្លះទៅ២ខែទៀត ពីព្រោះខ្ញុំគិតថាការហ្វឹកហាត់របស់គាត់កន្លងទៅប្រហែល៧០ទៅ៨០%ហើយបាទ!»។

ក្នុងជំនួបជាមួយបឹងកេតកាលពីសប្ដាហ៍មុន កីឡាកររបស់ណាហ្គាវើលដ៍មានបញ្ហាប្រឈមជាមួយរបួសនិងជំងឺកូវីដ ដែលបណ្ដាលឱ្យក្រុមជើងខ្លាំងមួយនេះចាញ់ក្រុមនាគខៀវ ៣-១ នៅកីឡដ្ឋានខេមបូឌាអ៊ែវេ។ យ៉ាងណាក្នុងជំនួបប៉ះវិសាខានៅកីឡដ្ឋានព្រីនស៍ វេលាម៉ោង ៦ កន្លះល្ងាចស្អែកនេះ លោកថាកូនក្រុមរបស់លោកគ្មានបញ្ហាអ្វីច្រើនឡើយ ហើយលោកជឿជាក់លើកូនក្រុមថាពួកគេនឹងធ្វើបានល្អ យ៉ាងហោចណាស់ក៏អាចយកបាន១ពិន្ទុដែរ បើទោះក្លឹបវិសាខាសំបូរដោយជើងខ្លាំងក្ដី៕

អត្ថបទ៖ អ៊ុំ សុភក្តិ