បាត់មុខ Love Riya ស្រាប់តែមកលេចមុខជាមួយ អេនឌី រាំផង ច្រៀងផងពីរោះដូចតារាអាជីព

2022-03-29 08:03:45
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលក់ឡេដ៏ល្បីល្បាញប៉ុន្មានឆ្នាំមុន Love Riya បានបាត់មុខឈឹងមួយរយៈធំ ស្រាប់តែពេលនេះ នាងបានបង្ហាញខ្លួនក្នុងពិភពសិល្បៈ រាំផង ច្រៀងផងជាមួយ អេនឌី យ៉ាងរំពើតរំពើន មើលទៅដូចតារាអាជីព។

តាមការបញ្ជាក់របស់លោក អេនឌី អ្នកលក់ឡេលើអនឡាន Love Riya បានស្ម័គ្រមកចូលរួមការងារសិល្បៈជាមួយលោក ដោយបានថត និងច្រៀងរួមគ្នានូវបទចម្រៀងប្រជាប្រិយខ្មែរប្រមាណជិត ១០បទ ភាគច្រើនសុទ្ធជាចង្វាក់រាំវង់។ លោកថា បទចម្រៀងទាំងនោះសុទ្ធជាបទមរតកដើម ហើយលោក និង Riya រួមគ្នាធ្វើ ទុកជាចំណងដៃសម្រាប់បងប្អូនខ្មែរស្ដាប់ និងរាំលេងកម្សាន្តនាឱកាសបុណ្យចូលឆ្នាំដែលនឹងមកដល់ពេលខាងមុខនេះ។

នេះគឺជាការងារសិល្បៈលើកដំបូងរបស់ អ្នកលក់ឡេលើអនឡាញល្បីឈ្មោះ។ ប៉ុន្តែទោះជាបែបនេះក្ដី Riya ត្រូវបានគេមើលឃើញថា ធ្វើបានយ៉ាងល្អ មិនខុសគ្នាប៉ុន្មាននឹងសិល្បការិនីអាជីពនោះឡើយ។ ចំណុចនេះ លោក អេនឌី ខ្លួនឯងក៏ស្ងើចសរសើរដែរ។

តារាប្រុសលើកឡើងថា លោកមានការភ្ញាក់ផ្អើល ចំពោះសមត្ថភាពសិល្បៈរបស់អ្នកលក់ឡេ ពោលគឺធ្វើបានល្អទាំងកាយវិការ ទឹកមុខ ការចូលតួបានល្អ។ មិនត្រឹមប៉ុណ្ណឹង Riya មិនត្រឹមតែមានរូបសម្រស់ស្រស់ស្អាតនោះទេ សូម្បីតែសំឡេងក៏ល្អល្មមអាចទទួលយកបានដែរ។ "និយាយទៅសំឡេងគាត់ ជាសំឡេងអ្នកចម្រៀង ប្រសិនបើគាត់ចង់ ហើយកុំស្រែកលក់ឡេខ្លាំង ធ្វើឲ្យខូចសំឡេង គឺសំឡេងគាត់អាចធ្វើអ្នកចម្រៀងបាន!”។ អេនឌី ថ្លែង។

Love Riya នឹងលោក អេនឌី បានច្រៀង និងសម្ដែងរួមគ្នាបទបទចម្រៀងជិត ១០បទ ក្នុងនោះមានដូចជាបទ "នារីសម័យ" “ស្រីស្រស់ប្រុសស្អាត" និងបទ "ខែចែត្រចូលឆ្នាំ" ជាដើម។ បទទាំងនេះបានបង្ហោះចេញរួចហើយនៅលើប្រព័ន្ធយូធូប។ តាមលោក អេនឌី នៅមានបទចម្រៀងរបស់ពួកគេ ៣-៤ បទទៀត នឹងចេញបន្តបន្ទាប់ឆាប់ៗខាងមុខនេះ។

តោះ...ទៅមើលការសម្ដែងរបស់អ្នកលក់ឡេងទាំងអស់គ្នា តិចថាមិនជឿ!