តាមប្រសាសន៍ សម្ដេចតេជោ ព្រឹកនេះ ផ្លូវដែកបុរាណ យើងមានសង្ឃឹមហើយ!

2022-04-04 04:36:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ត្បិតថា កម្ពុជាមានខ្សែរថភ្លើងរាប់ទសវត្សន៍ក៏ពិតមែន ប៉ុន្តែបណ្ដាញគមនាគមន៍មួយប្រភេទនេះ នៅមិនទាន់បានធ្វើឲ្យមានទំនើបកម្មនៅឡើយ។ ប៉ុន្តែបើតាមប្រសាសន៍សម្ដេចតេជោ ហ៊ុន សែន នៅព្រឹកនេះផ្លូវដែកកម្ពុជាកាន់តែមានសង្ឃឹមហើយ។

នៅក្នុងកម្មវិធី សម្ពោធដាក់ឲ្យប្រើប្រាស់ជាផ្លូវការហេដ្ឋារចនាសម្ព័ន្ធផ្លូវចំនួន ៣៨ខ្សែ និងសមិទ្ធផលនៃការស្តារ កែលម្អដងស្ទឹងសៀមរាប នៅក្រុងសៀមរាប ខេត្តសៀមរាប នៅព្រឹកថ្ងៃទី ៤ មេសានេះ បានឲ្យដឹងថា សម្តេចតេជោ ហ៊ុន សែន ប្រកាសពីគិតគូរដល់ហេដ្ឋារចនាសម្ព័ន្ធផ្លូវដែក របស់កម្ពុជា ដែលសម្ដេចថា ជាប្រព័ន្ធដឹកជញ្ជូនបុរាណ ហួសសម័យ ការធ្វើដំណើរចំណាយពេលយូរ។

ដូច្នេះហើយ សម្ដេចជំរុញឲ្យស្វះស្វែងរកដៃគូដើម្បីមកអភិវឌ្ឍន៍បន្ថែមលើប្រព័ន្ធផ្លូវដែកដែលមានស្រាប់របស់កម្ពុជា។ ការងារនេះ សម្តេចតេជោ ហ៊ុន សែន ជំរុញរដ្ឋមន្ត្រីសាធារណការ និងជញ្ជូន ឯកឧត្តម ស៊ុន ចាន់ថុល ស្វះស្វែងរកដៃគូអភិវឌ្ឍន៍ផ្លូវដែក ដែលជាក្រុមហ៊ុនឯកជន ធ្វើទំនើបកម្មផ្លូវដែកបុរាណនៅកម្ពុជា។

សម្តេចនាយករដ្ឋមន្ត្រី ហ៊ុន សែន ចង់ឱ្យមានការធ្វើទំនើបកម្មផ្លូវរថភ្លើងល្បឿនលឿនដើម្បីសម្រួលដល់ការដឹកជញ្ជូន និងការចរាចរណ៍ឆាប់រហ័សជាងពេលបច្ចុប្បន្ន។

បច្ចុប្បន្ននេះ កម្ពុជាមានផ្លូវដែកចំនួន ៣ខ្សែ រួមមាន៖ ១. ផ្លូវដែកទិសនីរតី (ភ្នំពេញ-ព្រះសីហនុ)៖ ផ្លូវដែកនេះមានប្រវែងសរុប ២៦៦ គីឡូម៉ែត្រ ត្រូវបានបើកឱ្យដំណើរការឡើងវិញ កាលពីថ្ងៃទី៩ ខែមេសា ឆ្នាំ២០១៦។ ២. ផ្លូវដែក ស្ថានីយភ្នំពេញ-ព្រលានយន្តហោះអន្តរជាតិភ្នំពេញ៖ ផ្លូវដែកនេះ មានប្រវែងសរុប ១០គីឡូម៉ែត្រ ត្រូវបានបើកឱ្យដំណើរការកាលពីថ្ងៃទី១០ ខែមេសា ឆ្នាំ២០១៨៕

៣. ផ្លូវដែកទិសពាយ័ព្យ (ភ្នំពេញ-ប៉ោយប៉ែត)៖ ផ្លូវដែកនេះមានប្រវែងសរុប ៣៨៦គីឡូម៉ែត្រ ត្រូវបានបើកឱ្យដំណើរការបណ្តោះអាសន្នកាលពីថ្ងៃទី៤ ខែកក្កដា ឆ្នាំ២០១៨៕

អត្ថបទ៖ ទារិកា