ចំណុចពិសេសទាំងនេះ ធ្វើឲ្យឡាន Prius ទាក់ចិត្តអ្នកទិញជិះកាន់តែច្រើននៅខ្មែរ

2022-04-26 01:50:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ឡានមួយទឹកនៅខ្មែរកាន់តែមានអ្នកជិះច្រើនដូចជា Lexus, Highlander, Camry ឆ្លាម បាឡែន និង Corolla ដោយសារមានតម្លៃធូរថ្លៃមានលុយល្មមៗ ១ម៉ឺនទៅ ២ម៉ឺនដុល្លារក៏អាចទីញបានជិះ។ ក្នុងនោះប្រភេទឡានរាងតូច Prius កូនកាត់ ក៏មានអ្នកកំពុងប្រើប្រាស់មិនតិចដែរ។ មានចំណុចអ្វីខ្លះដែលធ្វើឲ្យឡាន Prius កាន់តែពេញនិយមជិះនៅខ្មែរ?

ខាងក្រោមនេះគឺជាចំណុចពិសេសមួយចំនួនដែលទាក់ចិត្តអ្នកជិះមកពេញនិយមឡាន Prius មួយទឹក៖

សម្បូរគ្រឿងបន្លាស់

បើនិយាយពីគ្រឿងបន្លាស់សម្រាប់ឡាន Prius ដូចជាគ្រឿងក្រៅ គ្រឿងម៉ាស៊ីន ប្រព័ន្ធភ្លើង ពុំមែនជាបញ្ហានោះទេសម្រាប់ Prius ចាប់ពីស៊េរី ០៤ ដល់ ០១០។ ដោយសារបច្ចុប្បន្នមានជាងជាច្រើននៅតាមការាស ដែលមានជំនាញធ្វើប្រភេទឡាន Prius នេះ។ កត្តានេះហើយ ដែលធ្វើឲ្យប្រភេទឡាន Prius មួយទឹកនេះ ទទួលបានការគាំទ្រច្រើន។

ប្រព័ន្ធកម្សាន្តខាងក្នុង

ធៀបរថយន្តមួយទឹកដទៃទៀត រថយន្តកូនកាត់នេះក៏មានភាពទំនើបទាន់សម័យដែរ។ ប្រព័ន្ធខាងក្នុងរបស់ឡាន Prius មានបំពាក់ប្រព័ន្ធសោស្វ័យប្រវត្តិ (Smart Key assist) ហើយក៏មានបំពាក់ប្រព័ន្ធ ABS, VSC, Navigation system, Laser Lamp, JBL Speaker មានលក្ខណៈទំនើបដូចប្រភេទឡាន Corolla, Camry ជាដើម។

រូបរាង

បើនិយាយពីរូបរាងវិញ Prius មួយទឹក ជាជម្រើសដំបូងសម្រាប់អ្នកមានលុយសមល្មម និងប្រើប្រាស់ជាលក្ខណៈគ្រួសារ។ ជាមួយរូបរាងតូច បើធៀបទៅប្រភេទឡានមួយទឹកផ្សេងទៀត អាចទៅណាមកណាចុះចំណោមគេ។ ម្យ៉ាងទៀត រាងប៉ុណ្ណេះ Prius អាចដាក់មួយគ្រួសារមានគ្នា ៤ ទៅ ៥ នាក់បានដោយគ្មានបញ្ហា។

ប្រសិនបើអ្នកចង់បាន Prius កាន់តែទំនើប និងរាងកាន់តែស្អាត អាចទិញពួកស៊េរីចាប់ពី ២០១០ ឡើងព្រោះវាបានកែប្រែរូបរាងថ្មីជាមួយបច្ចេកវិទ្យាកាន់តែទំនើប។

កម្រិតស៊ីសាំង

ដោយសារឡាន Prius ជាប្រភេទឡានកូនកាត់សាំង និងអគ្គិសនី និងដំណើរការដោយអាគុយជាមួយប្រព័ន្ធ Hybrid System ដែលវាជួយកាត់បន្ថយអត្រាស៊ីសាំងតិចបំផុត បើធៀបជាមួយរថយន្តម៉ូដែលផ្សេង សម្រាប់ការបើកបរក្នុងក្រុង។

តម្លៃ

ជាប្រភេទឡានកំពុងពេញនិយមក្នុងស្រុកមានច្រើនជម្រើសហើយតម្លៃមានចាប់ពី ១០ ០០០ ដុល្លារ ឡើងទៅ សម្រាប់ម៉ូដែលស៊េរីឆ្នាំ ២០០៤ រហូតដល់ ជាង ១៧ ០០០ ដុល្លារ សម្រាប់ស៊េរីឆ្នាំ ២០០៧ និងខុសគ្នា ២ ០០០ ទៅ ៣០០០ ដុល្លារ តាមពណ៌ និង Option ជាដើម។ ដូច្នេះសម្រាប់អ្នកមានជីវភាពល្មម អាចលៃលកទិញយកទៅប្រើប្រាស់បាន។

ទីផ្សារលក់ចេញ

ដោយសារជាប្រភេទឡានដែលមានតម្រូវការច្រើនពីអ្នកប្រើប្រាស់ ប្រភេទឡាន Prius មួយទឹកនេះមិនពិបាករកទិញនិងលក់ចេញឡើយ ទិញជិះបានមួយខែ ពីរខែចង់ប្ដូរស៊េរីចេញបង្ហោះតែនៅលើហ្វេសបុកក៏អាចលក់ចេញបាន មិនចាំបាច់មានអ្នកគួកជេ ឬឈ្មួញកណ្ដាលអីទេ៕

អត្ថបទ៖ ម៉េងងី