Honda ផ្ដាំកីឡាករកុំមានមោទកភាពចំពោះអ្វីដែលខ្លួនមានសព្វថ្ងៃ

2022-06-14 03:54:41
ចំនួនមតិ 0 | ចំនួនចែករំលែក 0

ចន្លោះមិនឃើញ

Honda បានផ្ដាំទៅកាន់កីឡាករកម្ពុជាទាំងអស់ថា មិនត្រូវមានមោទកភាពទេ ចំពោះអ្វីដែលខ្លួនមានសព្វថ្ងៃនេះ ត្រូវស្វែងរកភាពរីកចម្រើនដើម្បីសម្រេចក្ដីស្រមៃរបស់ខ្លួននាពេលអនាគត។

រូប FFC

ការលើកឡើងនេះលោកបាននិយាយទៅកាន់កីឡាករកម្ពុជាកាលពីម្សិលមិញក្នុងពេលដែលកីឡាករធ្វើពិធីខួបកំណើតជូនលោកនៅប្រទេសឥណ្ឌា។ លោកបានលើកឡើងថា កីឡាករត្រូវតែប្រឹងប្រែងសម្រាប់ការប្រកួតល្ងាចនេះម៉ោង ៦:៣០នាទី ទល់ក្រុម អាហ្វហ្គានីស្ថាន សម្រាប់ការប្រកួតទី៣ក្នុងពូល D នៃព្រឹត្តិការណ៍ជម្រុះ AFC Asian Cup 2023 ។

អ្នកចាត់ការសញ្ជាតិជប៉ុនបាននិយាយរំលឹកកីឡាករកម្ពុជាទាំងអស់ថា ដាច់ខាតត្រូវតែស្រេកឃ្លានជ័យជម្នះ មិនត្រូវមានមោទកភាពដែលខ្លួនមានសព្វថ្ងៃនេះឡើយ។ កីឡាករគ្រប់រូបគួរតែគិតធ្វើយ៉ាងណាស្វែងរកវិធីដើម្បីអភិវឌ្ឍន៍ខ្លួនឯងឲ្យកាន់តែមានភាពប្រសើរជាងនេះ ទើបជីវិតកីឡាករអាចរីកចម្រើនទៅរកភាពជោគជ័យបាន។

រំលឹកថា កម្ពុជាបានចាញ់២ប្រកួតហើយ ក្នុងពានរង្វាន់ខាងលើ ពោលគឺចាញ់ ឥណ្ឌា កាលប្រកួតបើកឆាក ២-០ និងប្រកួតទី២ ចាញ់ ហុងកុង ៣-០ បើសរុបទៅកម្ពុជាបានធ្លាក់ចេញពីពានរង្វាន់មួយនេះហើយ ហើយការប្រកួតល្ងាចនេះគ្រាន់តែជាការប្រកួតបង្គ្រប់កិច្ចប៉ុណ្ណោះ៕

អត្ថបទ៖ ស្រី សុវណ្ណដារ៉ា